Samuel 1 Chapter 17
שמואל א פרק יז
Source: https://ajew.org/reader/tanach-shmuel-a/1/17

Segment 1
HE:
ויאספו פלשתים את מחניהם למלחמה ויאספו שכה אשר ליהודה ויחנו בין שוכה ובין עזקה באפס דמים:

Segment 2
HE:
ושאול ואיש ישראל נאספו ויחנו בעמק האלה ויערכו מלחמה לקראת פלשתים:

Segment 3
HE:
ופלשתים עמדים אל ההר מזה וישראל עמדים אל ההר מזה והגיא ביניהם:

Segment 4
HE:
ויצא איש הבנים ממחנות פלשתים גלית שמו מגת גבהו שש אמות וזרת:

Segment 5
HE:
וכובע נחשת על ראשו ושריון קשקשים הוא לבוש ומשקל השריון חמשת אלפים שקלים נחשת:

Segment 6
HE:
ומצחת נחשת על רגליו וכידון נחשת בין כתפיו:

Segment 7
HE:
(וחץ) ועץ חניתו כמנור ארגים ולהבת חניתו שש מאות שקלים ברזל ונשא הצנה הלך לפניו:

Segment 8
HE:
ויעמד ויקרא אל מערכת ישראל ויאמר להם למה תצאו לערך מלחמה הלוא אנכי הפלשתי ואתם עבדים לשאול ברו לכם איש וירד אלי:

Segment 9
HE:
אם יוכל להלחם אתי והכני והיינו לכם לעבדים ואם אני אוכל לו והכיתיו והייתם לנו לעבדים ועבדתם אתנו:

Segment 10
HE:
ויאמר הפלשתי אני חרפתי את מערכות ישראל היום הזה תנו לי איש ונלחמה יחד:

Segment 11
HE:
וישמע שאול וכל ישראל את דברי הפלשתי האלה ויחתו ויראו מאד: (פ)

Segment 12
HE:
ודוד בן איש אפרתי הזה מבית לחם יהודה ושמו ישי ולו שמנה בנים והאיש בימי שאול זקן בא באנשים:

Segment 13
HE:
וילכו שלשת בני ישי הגדלים הלכו אחרי שאול למלחמה ושם שלשת בניו אשר הלכו במלחמה אליאב הבכור ומשנהו אבינדב והשלשי שמה:

Segment 14
HE:
ודוד הוא הקטן ושלשה הגדלים הלכו אחרי שאול: (ס)

Segment 15
HE:
ודוד הלך ושב מעל שאול לרעות את צאן אביו בית לחם:

Segment 16
HE:
ויגש הפלשתי השכם והערב ויתיצב ארבעים יום: (פ)

Segment 17
HE:
ויאמר ישי לדוד בנו קח נא לאחיך איפת הקליא הזה ועשרה לחם הזה והרץ המחנה לאחיך:

Segment 18
HE:
ואת עשרת חרצי החלב האלה תביא לשר האלף ואת אחיך תפקד לשלום ואת ערבתם תקח:

Segment 19
HE:
ושאול והמה וכל איש ישראל בעמק האלה נלחמים עם פלשתים:

Segment 20
HE:
וישכם דוד בבקר ויטש את הצאן על שמר וישא וילך כאשר צוהו ישי ויבא המעגלה והחיל היצא אל המערכה והרעו במלחמה:

Segment 21
HE:
ותערך ישראל ופלשתים מערכה לקראת מערכה:

Segment 22
HE:
ויטש דוד את הכלים מעליו על יד שומר הכלים וירץ המערכה ויבא וישאל לאחיו לשלום:

Segment 23
HE:
והוא מדבר עמם והנה איש הבנים עולה גלית הפלשתי שמו מגת (ממערות) ממערכות פלשתים וידבר כדברים האלה וישמע דוד:

Segment 24
HE:
וכל איש ישראל בראותם את האיש וינסו מפניו וייראו מאד:

Segment 25
HE:
ויאמר איש ישראל הראיתם האיש העלה הזה כי לחרף את ישראל עלה והיה האיש אשר יכנו יעשרנו המלך עשר גדול ואת בתו יתן לו ואת בית אביו יעשה חפשי בישראל:

Segment 26
HE:
ויאמר דוד אל האנשים העמדים עמו לאמר מה יעשה לאיש אשר יכה את הפלשתי הלז והסיר חרפה מעל ישראל כי מי הפלשתי הערל הזה כי חרף מערכות אלהים חיים:

Segment 27
HE:
ויאמר לו העם כדבר הזה לאמר כה יעשה לאיש אשר יכנו:

Segment 28
HE:
וישמע אליאב אחיו הגדול בדברו אל האנשים ויחר אף אליאב בדוד ויאמר למה זה ירדת ועל מי נטשת מעט הצאן ההנה במדבר אני ידעתי את זדנך ואת רע לבבך כי למען ראות המלחמה ירדת:

Segment 29
HE:
ויאמר דוד מה עשיתי עתה הלוא דבר הוא:

Segment 30
HE:
ויסב מאצלו אל מול אחר ויאמר כדבר הזה וישבהו העם דבר כדבר הראשון:

Segment 31
HE:
וישמעו הדברים אשר דבר דוד ויגדו לפני שאול ויקחהו:

Segment 32
HE:
ויאמר דוד אל שאול אל יפל לב אדם עליו עבדך ילך ונלחם עם הפלשתי הזה:

Segment 33
HE:
ויאמר שאול אל דוד לא תוכל ללכת אל הפלשתי הזה להלחם עמו כי נער אתה והוא איש מלחמה מנעריו: (ס)

Segment 34
HE:
ויאמר דוד אל שאול רעה היה עבדך לאביו בצאן ובא הארי ואת הדוב ונשא שה מהעדר:

Segment 35
HE:
ויצאתי אחריו והכתיו והצלתי מפיו ויקם עלי והחזקתי בזקנו והכתיו והמיתיו:

Segment 36
HE:
גם את הארי גם הדוב הכה עבדך והיה הפלשתי הערל הזה כאחד מהם כי חרף מערכת אלהים חיים: (ס)

Segment 37
HE:
ויאמר דוד יהוה אשר הצלני מיד הארי ומיד הדב הוא יצילני מיד הפלשתי הזה (ס) ויאמר שאול אל דוד לך ויהוה יהיה עמך:

Segment 38
HE:
וילבש שאול את דוד מדיו ונתן קובע נחשת על ראשו וילבש אתו שריון:

Segment 39
HE:
ויחגר דוד את חרבו מעל למדיו ויאל ללכת כי לא נסה ויאמר דוד אל שאול לא אוכל ללכת באלה כי לא נסיתי ויסרם דוד מעליו:

Segment 40
HE:
ויקח מקלו בידו ויבחר לו חמשה חלקי אבנים מן הנחל וישם אתם בכלי הרעים אשר לו ובילקוט וקלעו בידו ויגש אל הפלשתי:

Segment 41
HE:
וילך הפלשתי הלך וקרב אל דוד והאיש נשא הצנה לפניו:

Segment 42
HE:
ויבט הפלשתי ויראה את דוד ויבזהו כי היה נער ואדמני עם יפה מראה:

Segment 43
HE:
ויאמר הפלשתי אל דוד הכלב אנכי כי אתה בא אלי במקלות ויקלל הפלשתי את דוד באלהיו:

Segment 44
HE:
ויאמר הפלשתי אל דוד לכה אלי ואתנה את בשרך לעוף השמים ולבהמת השדה: (ס)

Segment 45
HE:
ויאמר דוד אל הפלשתי אתה בא אלי בחרב ובחנית ובכידון ואנכי בא אליך בשם יהוה צבאות אלהי מערכות ישראל אשר חרפת:

Segment 46
HE:
היום הזה יסגרך יהוה בידי והכיתך והסרתי את ראשך מעליך ונתתי פגר מחנה פלשתים היום הזה לעוף השמים ולחית הארץ וידעו כל הארץ כי יש אלהים לישראל:

Segment 47
HE:
וידעו כל הקהל הזה כי לא בחרב ובחנית יהושיע יהוה כי ליהוה המלחמה ונתן אתכם בידנו:

Segment 48
HE:
והיה כי קם הפלשתי וילך ויקרב לקראת דוד וימהר דוד וירץ המערכה לקראת הפלשתי:

Segment 49
HE:
וישלח דוד את ידו אל הכלי ויקח משם אבן ויקלע ויך את הפלשתי אל מצחו ותטבע האבן במצחו ויפל על פניו ארצה:

Segment 50
HE:
ויחזק דוד מן הפלשתי בקלע ובאבן ויך את הפלשתי וימיתהו וחרב אין ביד דוד:

Segment 51
HE:
וירץ דוד ויעמד אל הפלשתי ויקח את חרבו וישלפה מתערה וימתתהו ויכרת בה את ראשו ויראו הפלשתים כי מת גבורם וינסו:

Segment 52
HE:
ויקמו אנשי ישראל ויהודה וירעו וירדפו את הפלשתים עד בואך גיא ועד שערי עקרון ויפלו חללי פלשתים בדרך שערים ועד גת ועד עקרון:

Segment 53
HE:
וישבו בני ישראל מדלק אחרי פלשתים וישסו את מחניהם:

Segment 54
HE:
ויקח דוד את ראש הפלשתי ויבאהו ירושלם ואת כליו שם באהלו: (ס)

Segment 55
HE:
וכראות שאול את דוד יצא לקראת הפלשתי אמר אל אבנר שר הצבא בן מי זה הנער אבנר ויאמר אבנר חי נפשך המלך אם ידעתי:

Segment 56
HE:
ויאמר המלך שאל אתה בן מי זה העלם: (ס)

Segment 57
HE:
וכשוב דוד מהכות את הפלשתי ויקח אתו אבנר ויבאהו לפני שאול וראש הפלשתי בידו:

Segment 58
HE:
ויאמר אליו שאול בן מי אתה הנער ויאמר דוד בן עבדך ישי בית הלחמי: