Samuel 1 Chapter 19
שמואל א פרק יט
Source: https://ajew.org/reader/tanach-shmuel-a/1/19

Segment 1
HE:
וידבר שאול אל יונתן בנו ואל כל עבדיו להמית את דוד ויהונתן בן שאול חפץ בדוד מאד:

Segment 2
HE:
ויגד יהונתן לדוד לאמר מבקש שאול אבי להמיתך ועתה השמר נא בבקר וישבת בסתר ונחבאת:

Segment 3
HE:
ואני אצא ועמדתי ליד אבי בשדה אשר אתה שם ואני אדבר בך אל אבי וראיתי מה והגדתי לך: (ס)

Segment 4
HE:
וידבר יהונתן בדוד טוב אל שאול אביו ויאמר אליו אל יחטא המלך בעבדו בדוד כי לוא חטא לך וכי מעשיו טוב לך מאד:

Segment 5
HE:
וישם את נפשו בכפו ויך את הפלשתי ויעש יהוה תשועה גדולה לכל ישראל ראית ותשמח ולמה תחטא בדם נקי להמית את דוד חנם:

Segment 6
HE:
וישמע שאול בקול יהונתן וישבע שאול חי יהוה אם יומת:

Segment 7
HE:
ויקרא יהונתן לדוד ויגד לו יהונתן את כל הדברים האלה ויבא יהונתן את דוד אל שאול ויהי לפניו כאתמול שלשום: (ס)

Segment 8
HE:
ותוסף המלחמה להיות ויצא דוד וילחם בפלשתים ויך בהם מכה גדולה וינסו מפניו:

Segment 9
HE:
ותהי רוח יהוה רעה אל שאול והוא בביתו יושב וחניתו בידו ודוד מנגן ביד:

Segment 10
HE:
ויבקש שאול להכות בחנית בדוד ובקיר ויפטר מפני שאול ויך את החנית בקיר ודוד נס וימלט בלילה הוא: (פ)

Segment 11
HE:
וישלח שאול מלאכים אל בית דוד לשמרו ולהמיתו בבקר ותגד לדוד מיכל אשתו לאמר אם אינך ממלט את נפשך הלילה מחר אתה מומת:

Segment 12
HE:
ותרד מיכל את דוד בעד החלון וילך ויברח וימלט:

Segment 13
HE:
ותקח מיכל את התרפים ותשם אל המטה ואת כביר העזים שמה מראשתיו ותכס בבגד: (ס)

Segment 14
HE:
וישלח שאול מלאכים לקחת את דוד ותאמר חלה הוא: (פ)

Segment 15
HE:
וישלח שאול את המלאכים לראות את דוד לאמר העלו אתו במטה אלי להמתו:

Segment 16
HE:
ויבאו המלאכים והנה התרפים אל המטה וכביר העזים מראשתיו:

Segment 17
HE:
ויאמר שאול אל מיכל למה ככה רמיתני ותשלחי את איבי וימלט ותאמר מיכל אל שאול הוא אמר אלי שלחני למה אמיתך:

Segment 18
HE:
ודוד ברח וימלט ויבא אל שמואל הרמתה ויגד לו את כל אשר עשה לו שאול וילך הוא ושמואל וישבו (בנוית) בניות:

Segment 19
HE:
ויגד לשאול לאמר הנה דוד (בנוית) בניות ברמה:

Segment 20
HE:
וישלח שאול מלאכים לקחת את דוד וירא את להקת הנביאים נבאים ושמואל עמד נצב עליהם ותהי על מלאכי שאול רוח אלהים ויתנבאו גם המה:

Segment 21
HE:
ויגדו לשאול וישלח מלאכים אחרים ויתנבאו גם המה ויסף שאול וישלח מלאכים שלשים ויתנבאו גם המה:

Segment 22
HE:
וילך גם הוא הרמתה ויבא עד בור הגדול אשר בשכו וישאל ויאמר איפה שמואל ודוד ויאמר הנה (בנוית) בניות ברמה:

Segment 23
HE:
וילך שם אל (נוית) ניות ברמה ותהי עליו גם הוא רוח אלהים וילך הלוך ויתנבא עד באו (בנוית) בניות ברמה:

Segment 24
HE:
ויפשט גם הוא בגדיו ויתנבא גם הוא לפני שמואל ויפל ערם כל היום ההוא וכל הלילה על כן יאמרו הגם שאול בנביאם: (פ)