{
  "bookId": "tanach-shmuel-a",
  "part": "1",
  "torah": "6",
  "title": "Samuel 1 Chapter 6",
  "hebrewTitle": "שמואל א פרק ו",
  "sourceUrl": "/reader/tanach-shmuel-a/1/6",
  "plainUrl": "/reader-plain/tanach-shmuel-a/1/6/",
  "segments": [
    {
      "index": 1,
      "he": "ויהי ארון יהוה בשדה פלשתים שבעה חדשים:",
      "en": ""
    },
    {
      "index": 2,
      "he": "ויקראו פלשתים לכהנים ולקסמים לאמר מה נעשה לארון יהוה הודענו במה נשלחנו למקומו:",
      "en": ""
    },
    {
      "index": 3,
      "he": "ויאמרו אם משלחים את ארון אלהי ישראל אל תשלחו אתו ריקם כי השב תשיבו לו אשם אז תרפאו ונודע לכם למה לא תסור ידו מכם:",
      "en": ""
    },
    {
      "index": 4,
      "he": "ויאמרו מה האשם אשר נשיב לו ויאמרו מספר סרני פלשתים חמשה (עפלי) טחרי זהב וחמשה עכברי זהב כי מגפה אחת לכלם ולסרניכם:",
      "en": ""
    },
    {
      "index": 5,
      "he": "ועשיתם צלמי (עפליכם) טחריכם וצלמי עכבריכם המשחיתם את הארץ ונתתם לאלהי ישראל כבוד אולי יקל את ידו מעליכם ומעל אלהיכם ומעל ארצכם:",
      "en": ""
    },
    {
      "index": 6,
      "he": "ולמה תכבדו את לבבכם כאשר כבדו מצרים ופרעה את לבם הלוא כאשר התעלל בהם וישלחום וילכו:",
      "en": ""
    },
    {
      "index": 7,
      "he": "ועתה קחו ועשו עגלה חדשה אחת ושתי פרות עלות אשר לא עלה עליהם על ואסרתם את הפרות בעגלה והשיבתם בניהם מאחריהם הביתה:",
      "en": ""
    },
    {
      "index": 8,
      "he": "ולקחתם את ארון יהוה ונתתם אתו אל העגלה ואת כלי הזהב אשר השבתם לו אשם תשימו בארגז מצדו ושלחתם אתו והלך:",
      "en": ""
    },
    {
      "index": 9,
      "he": "וראיתם אם דרך גבולו יעלה בית שמש הוא עשה לנו את הרעה הגדולה הזאת ואם לא וידענו כי לא ידו נגעה בנו מקרה הוא היה לנו:",
      "en": ""
    },
    {
      "index": 10,
      "he": "ויעשו האנשים כן ויקחו שתי פרות עלות ויאסרום בעגלה ואת בניהם כלו בבית:",
      "en": ""
    },
    {
      "index": 11,
      "he": "וישמו את ארון יהוה אל העגלה ואת הארגז ואת עכברי הזהב ואת צלמי טחריהם:",
      "en": ""
    },
    {
      "index": 12,
      "he": "וישרנה הפרות בדרך על דרך בית שמש במסלה אחת הלכו הלך וגעו ולא סרו ימין ושמאול וסרני פלשתים הלכים אחריהם עד גבול בית שמש:",
      "en": ""
    },
    {
      "index": 13,
      "he": "ובית שמש קצרים קציר חטים בעמק וישאו את עיניהם ויראו את הארון וישמחו לראות:",
      "en": ""
    },
    {
      "index": 14,
      "he": "והעגלה באה אל שדה יהושע בית השמשי ותעמד שם ושם אבן גדולה ויבקעו את עצי העגלה ואת הפרות העלו עלה ליהוה: (ס)",
      "en": ""
    },
    {
      "index": 15,
      "he": "והלוים הורידו את ארון יהוה ואת הארגז אשר אתו אשר בו כלי זהב וישמו אל האבן הגדולה ואנשי בית שמש העלו עלות ויזבחו זבחים ביום ההוא ליהוה:",
      "en": ""
    },
    {
      "index": 16,
      "he": "וחמשה סרני פלשתים ראו וישבו עקרון ביום ההוא: (ס)",
      "en": ""
    },
    {
      "index": 17,
      "he": "ואלה טחרי הזהב אשר השיבו פלשתים אשם ליהוה לאשדוד אחד לעזה אחד לאשקלון אחד לגת אחד לעקרון אחד: (ס)",
      "en": ""
    },
    {
      "index": 18,
      "he": "ועכברי הזהב מספר כל ערי פלשתים לחמשת הסרנים מעיר מבצר ועד כפר הפרזי ועד אבל הגדולה אשר הניחו עליה את ארון יהוה עד היום הזה בשדה יהושע בית השמשי:",
      "en": ""
    },
    {
      "index": 19,
      "he": "ויך באנשי בית שמש כי ראו בארון יהוה ויך בעם שבעים איש חמשים אלף איש ויתאבלו העם כי הכה יהוה בעם מכה גדולה",
      "en": ""
    },
    {
      "index": 20,
      "he": "ויאמרו אנשי בית שמש מי יוכל לעמד לפני יהוה האלהים הקדוש הזה ואל מי יעלה מעלינו: (ס)",
      "en": ""
    },
    {
      "index": 21,
      "he": "וישלחו מלאכים אל יושבי קרית יערים לאמר השבו פלשתים את ארון יהוה רדו העלו אתו אליכם:",
      "en": ""
    }
  ]
}