Samuel 2 Chapter 12
שמואל ב פרק יב
Source: https://ajew.org/reader/tanach-shmuel-b/1/12

Segment 1
HE:
וישלח יהוה את נתן אל דוד ויבא אליו ויאמר לו שני אנשים היו בעיר אחת אחד עשיר ואחד ראש:

Segment 2
HE:
לעשיר היה צאן ובקר הרבה מאד:

Segment 3
HE:
ולרש אין כל כי אם כבשה אחת קטנה אשר קנה ויחיה ותגדל עמו ועם בניו יחדו מפתו תאכל ומכסו תשתה ובחיקו תשכב ותהי לו כבת:

Segment 4
HE:
ויבא הלך לאיש העשיר ויחמל לקחת מצאנו ומבקרו לעשות לארח הבא לו ויקח את כבשת האיש הראש ויעשה לאיש הבא אליו:

Segment 5
HE:
ויחר אף דוד באיש מאד ויאמר אל נתן חי יהוה כי בן מות האיש העשה זאת:

Segment 6
HE:
ואת הכבשה ישלם ארבעתים עקב אשר עשה את הדבר הזה ועל אשר לא חמל:

Segment 7
HE:
ויאמר נתן אל דוד אתה האיש כה אמר יהוה אלהי ישראל אנכי משחתיך למלך על ישראל ואנכי הצלתיך מיד שאול:

Segment 8
HE:
ואתנה לך את בית אדניך ואת נשי אדניך בחיקך ואתנה לך את בית ישראל ויהודה ואם מעט ואספה לך כהנה וכהנה:

Segment 9
HE:
מדוע בזית את דבר יהוה לעשות הרע (בעינו) בעיני את אוריה החתי הכית בחרב ואת אשתו לקחת לך לאשה ואתו הרגת בחרב בני עמון:

Segment 10
HE:
ועתה לא תסור חרב מביתך עד עולם עקב כי בזתני ותקח את אשת אוריה החתי להיות לך לאשה: (ס)

Segment 11
HE:
כה אמר יהוה הנני מקים עליך רעה מביתך ולקחתי את נשיך לעיניך ונתתי לרעיך ושכב עם נשיך לעיני השמש הזאת:

Segment 12
HE:
כי אתה עשית בסתר ואני אעשה את הדבר הזה נגד כל ישראל ונגד השמש: (ס)

Segment 13
HE:
ויאמר דוד אל נתן חטאתי ליהוה (ס) ויאמר נתן אל דוד גם יהוה העביר חטאתך לא תמות:

Segment 14
HE:
אפס כי נאץ נאצת את איבי יהוה בדבר הזה גם הבן הילוד לך מות ימות:

Segment 15
HE:
וילך נתן אל ביתו ויגף יהוה את הילד אשר ילדה אשת אוריה לדוד ויאנש:

Segment 16
HE:
ויבקש דוד את האלהים בעד הנער ויצם דוד צום ובא ולן ושכב ארצה:

Segment 17
HE:
ויקמו זקני ביתו עליו להקימו מן הארץ ולא אבה ולא ברא אתם לחם:

Segment 18
HE:
ויהי ביום השביעי וימת הילד ויראו עבדי דוד להגיד לו כי מת הילד כי אמרו הנה בהיות הילד חי דברנו אליו ולא שמע בקולנו ואיך נאמר אליו מת הילד ועשה רעה:

Segment 19
HE:
וירא דוד כי עבדיו מתלחשים ויבן דוד כי מת הילד ויאמר דוד אל עבדיו המת הילד ויאמרו מת:

Segment 20
HE:
ויקם דוד מהארץ וירחץ ויסך ויחלף (שמלתו) שמלתיו ויבא בית יהוה וישתחו ויבא אל ביתו וישאל וישימו לו לחם ויאכל:

Segment 21
HE:
ויאמרו עבדיו אליו מה הדבר הזה אשר עשיתה בעבור הילד חי צמת ותבך וכאשר מת הילד קמת ותאכל לחם:

Segment 22
HE:
ויאמר בעוד הילד חי צמתי ואבכה כי אמרתי מי יודע (יחנני) וחנני יהוה וחי הילד:

Segment 23
HE:
ועתה מת למה זה אני צם האוכל להשיבו עוד אני הלך אליו והוא לא ישוב אלי:

Segment 24
HE:
וינחם דוד את בת שבע אשתו ויבא אליה וישכב עמה ותלד בן (ויקרא) ותקרא את שמו שלמה ויהוה אהבו:

Segment 25
HE:
וישלח ביד נתן הנביא ויקרא את שמו ידידיה בעבור יהוה: (פ)

Segment 26
HE:
וילחם יואב ברבת בני עמון וילכד את עיר המלוכה:

Segment 27
HE:
וישלח יואב מלאכים אל דוד ויאמר נלחמתי ברבה גם לכדתי את עיר המים:

Segment 28
HE:
ועתה אסף את יתר העם וחנה על העיר ולכדה פן אלכד אני את העיר ונקרא שמי עליה:

Segment 29
HE:
ויאסף דוד את כל העם וילך רבתה וילחם בה וילכדה:

Segment 30
HE:
ויקח את עטרת מלכם מעל ראשו ומשקלה ככר זהב ואבן יקרה ותהי על ראש דוד ושלל העיר הוציא הרבה מאד:

Segment 31
HE:
ואת העם אשר בה הוציא וישם במגרה ובחרצי הברזל ובמגזרת הברזל והעביר אותם (במלכן) במלבן וכן יעשה לכל ערי בני עמון וישב דוד וכל העם ירושלם: (פ)