Samuel 2 Chapter 14
שמואל ב פרק יד
Source: https://ajew.org/reader/tanach-shmuel-b/1/14

Segment 1
HE:
וידע יואב בן צריה כי לב המלך על אבשלום:

Segment 2
HE:
וישלח יואב תקועה ויקח משם אשה חכמה ויאמר אליה התאבלי נא ולבשי נא בגדי אבל ואל תסוכי שמן והיית כאשה זה ימים רבים מתאבלת על מת:

Segment 3
HE:
ובאת אל המלך ודברת אליו כדבר הזה וישם יואב את הדברים בפיה:

Segment 4
HE:
ותאמר האשה התקעית אל המלך ותפל על אפיה ארצה ותשתחו ותאמר הושעה המלך: (ס)

Segment 5
HE:
ויאמר לה המלך מה לך ותאמר אבל אשה אלמנה אני וימת אישי:

Segment 6
HE:
ולשפחתך שני בנים וינצו שניהם בשדה ואין מציל ביניהם ויכו האחד את האחד וימת אתו:

Segment 7
HE:
והנה קמה כל המשפחה על שפחתך ויאמרו תני את מכה אחיו ונמתהו בנפש אחיו אשר הרג ונשמידה גם את היורש וכבו את גחלתי אשר נשארה לבלתי (שום) שים לאישי שם ושארית על פני האדמה: (פ)

Segment 8
HE:
ויאמר המלך אל האשה לכי לביתך ואני אצוה עליך:

Segment 9
HE:
ותאמר האשה התקועית אל המלך עלי אדני המלך העון ועל בית אבי והמלך וכסאו נקי: (ס)

Segment 10
HE:
ויאמר המלך המדבר אליך והבאתו אלי ולא יסיף עוד לגעת בך:

Segment 11
HE:
ותאמר יזכר נא המלך את יהוה אלהיך (מהרבית) מהרבת גאל הדם לשחת ולא ישמידו את בני ויאמר חי יהוה אם יפל משערת בנך ארצה:

Segment 12
HE:
ותאמר האשה תדבר נא שפחתך אל אדני המלך דבר ויאמר דברי: (ס)

Segment 13
HE:
ותאמר האשה ולמה חשבתה כזאת על עם אלהים ומדבר המלך הדבר הזה כאשם לבלתי השיב המלך את נדחו:

Segment 14
HE:
כי מות נמות וכמים הנגרים ארצה אשר לא יאספו ולא ישא אלהים נפש וחשב מחשבות לבלתי ידח ממנו נדח:

Segment 15
HE:
ועתה אשר באתי לדבר אל המלך אדני את הדבר הזה כי יראני העם ותאמר שפחתך אדברה נא אל המלך אולי יעשה המלך את דבר אמתו:

Segment 16
HE:
כי ישמע המלך להציל את אמתו מכף האיש להשמיד אתי ואת בני יחד מנחלת אלהים:

Segment 17
HE:
ותאמר שפחתך יהיה נא דבר אדני המלך למנוחה כי כמלאך האלהים כן אדני המלך לשמע הטוב והרע ויהוה אלהיך יהי עמך: (פ)

Segment 18
HE:
ויען המלך ויאמר אל האשה אל נא תכחדי ממני דבר אשר אנכי שאל אתך ותאמר האשה ידבר נא אדני המלך:

Segment 19
HE:
ויאמר המלך היד יואב אתך בכל זאת ותען האשה ותאמר חי נפשך אדני המלך אם אש להמין ולהשמיל מכל אשר דבר אדני המלך כי עבדך יואב הוא צוני והוא שם בפי שפחתך את כל הדברים האלה:

Segment 20
HE:
לבעבור סבב את פני הדבר עשה עבדך יואב את הדבר הזה ואדני חכם כחכמת מלאך האלהים לדעת את כל אשר בארץ: (ס)

Segment 21
HE:
ויאמר המלך אל יואב הנה נא עשיתי את הדבר הזה ולך השב את הנער את אבשלום:

Segment 22
HE:
ויפל יואב אל פניו ארצה וישתחו ויברך את המלך ויאמר יואב היום ידע עבדך כי מצאתי חן בעיניך אדני המלך אשר עשה המלך את דבר (עבדו) עבדך:

Segment 23
HE:
ויקם יואב וילך גשורה ויבא את אבשלום ירושלם: (פ)

Segment 24
HE:
ויאמר המלך יסב אל ביתו ופני לא יראה ויסב אבשלום אל ביתו ופני המלך לא ראה: (ס)

Segment 25
HE:
וכאבשלום לא היה איש יפה בכל ישראל להלל מאד מכף רגלו ועד קדקדו לא היה בו מום:

Segment 26
HE:
ובגלחו את ראשו והיה מקץ ימים לימים אשר יגלח כי כבד עליו וגלחו ושקל את שער ראשו מאתים שקלים באבן המלך:

Segment 27
HE:
ויולדו לאבשלום שלושה בנים ובת אחת ושמה תמר היא היתה אשה יפת מראה: (פ)

Segment 28
HE:
וישב אבשלום בירושלם שנתים ימים ופני המלך לא ראה:

Segment 29
HE:
וישלח אבשלום אל יואב לשלח אתו אל המלך ולא אבה לבוא אליו וישלח עוד שנית ולא אבה לבוא:

Segment 30
HE:
ויאמר אל עבדיו ראו חלקת יואב אל ידי ולו שם שערים לכו (והוצתיה) והציתוה באש ויצתו עבדי אבשלום את החלקה באש: (פ)

Segment 31
HE:
ויקם יואב ויבא אל אבשלום הביתה ויאמר אליו למה הציתו עבדך את החלקה אשר לי באש:

Segment 32
HE:
ויאמר אבשלום אל יואב הנה שלחתי אליך לאמר בא הנה ואשלחה אתך אל המלך לאמר למה באתי מגשור טוב לי עד אני שם ועתה אראה פני המלך ואם יש בי עון והמתני:

Segment 33
HE:
ויבא יואב אל המלך ויגד לו ויקרא אל אבשלום ויבא אל המלך וישתחו לו על אפיו ארצה לפני המלך וישק המלך לאבשלום: (פ)