Samuel 2 Chapter 15
שמואל ב פרק טו
Source: https://ajew.org/reader/tanach-shmuel-b/1/15

Segment 1
HE:
ויהי מאחרי כן ויעש לו אבשלום מרכבה וססים וחמשים איש רצים לפניו:

Segment 2
HE:
והשכים אבשלום ועמד על יד דרך השער ויהי כל האיש אשר יהיה לו ריב לבוא אל המלך למשפט ויקרא אבשלום אליו ויאמר אי מזה עיר אתה ויאמר מאחד שבטי ישראל עבדך:

Segment 3
HE:
ויאמר אליו אבשלום ראה דברך טובים ונכחים ושמע אין לך מאת המלך:

Segment 4
HE:
ויאמר אבשלום מי ישמני שפט בארץ ועלי יבוא כל איש אשר יהיה לו ריב ומשפט והצדקתיו:

Segment 5
HE:
והיה בקרב איש להשתחות לו ושלח את ידו והחזיק לו ונשק לו:

Segment 6
HE:
ויעש אבשלום כדבר הזה לכל ישראל אשר יבאו למשפט אל המלך ויגנב אבשלום את לב אנשי ישראל: (פ)

Segment 7
HE:
ויהי מקץ ארבעים שנה ויאמר אבשלום אל המלך אלכה נא ואשלם את נדרי אשר נדרתי ליהוה בחברון:

Segment 8
HE:
כי נדר נדר עבדך בשבתי בגשור בארם לאמר אם (ישיב) ישוב ישיבני יהוה ירושלם ועבדתי את יהוה:

Segment 9
HE:
ויאמר לו המלך לך בשלום ויקם וילך חברונה: (פ)

Segment 10
HE:
וישלח אבשלום מרגלים בכל שבטי ישראל לאמר כשמעכם את קול השפר ואמרתם מלך אבשלום בחברון:

Segment 11
HE:
ואת אבשלום הלכו מאתים איש מירושלם קראים והלכים לתמם ולא ידעו כל דבר:

Segment 12
HE:
וישלח אבשלום את אחיתפל הגילני יועץ דוד מעירו מגלה בזבחו את הזבחים ויהי הקשר אמץ והעם הולך ורב את אבשלום:

Segment 13
HE:
ויבא המגיד אל דוד לאמר היה לב איש ישראל אחרי אבשלום:

Segment 14
HE:
ויאמר דוד לכל עבדיו אשר אתו בירושלם קומו ונברחה כי לא תהיה לנו פליטה מפני אבשלום מהרו ללכת פן ימהר והשגנו והדיח עלינו את הרעה והכה העיר לפי חרב:

Segment 15
HE:
ויאמרו עבדי המלך אל המלך ככל אשר יבחר אדני המלך הנה עבדיך:

Segment 16
HE:
ויצא המלך וכל ביתו ברגליו ויעזב המלך את עשר נשים פלגשים לשמר הבית:

Segment 17
HE:
ויצא המלך וכל העם ברגליו ויעמדו בית המרחק:

Segment 18
HE:
וכל עבדיו עברים על ידו וכל הכרתי וכל הפלתי וכל הגתים שש מאות איש אשר באו ברגלו מגת עברים על פני המלך:

Segment 19
HE:
ויאמר המלך אל אתי הגתי למה תלך גם אתה אתנו שוב ושב עם המלך כי נכרי אתה וגם גלה אתה למקומך:

Segment 20
HE:
תמול בואך והיום (אנועך) אניעך עמנו ללכת ואני הולך על אשר אני הולך שוב והשב את אחיך עמך חסד ואמת:

Segment 21
HE:
ויען אתי את המלך ויאמר חי יהוה וחי אדני המלך כי אם במקום אשר יהיה שם אדני המלך אם למות אם לחיים כי שם יהיה עבדך:

Segment 22
HE:
ויאמר דוד אל אתי לך ועבר ויעבר אתי הגתי וכל אנשיו וכל הטף אשר אתו:

Segment 23
HE:
וכל הארץ בוכים קול גדול וכל העם עברים והמלך עבר בנחל קדרון וכל העם עברים על פני דרך את המדבר:

Segment 24
HE:
והנה גם צדוק וכל הלוים אתו נשאים את ארון ברית האלהים ויצקו את ארון האלהים ויעל אביתר עד תם כל העם לעבור מן העיר:

Segment 25
HE:
ויאמר המלך לצדוק השב את ארון האלהים העיר אם אמצא חן בעיני יהוה והשבני והראני אתו ואת נוהו:

Segment 26
HE:
ואם כה יאמר לא חפצתי בך הנני יעשה לי כאשר טוב בעיניו: (ס)

Segment 27
HE:
ויאמר המלך אל צדוק הכהן הרואה אתה שבה העיר בשלום ואחימעץ בנך ויהונתן בן אביתר שני בניכם אתכם:

Segment 28
HE:
ראו אנכי מתמהמה (בעברות) בערבות המדבר עד בוא דבר מעמכם להגיד לי:

Segment 29
HE:
וישב צדוק ואביתר את ארון האלהים ירושלם וישבו שם:

Segment 30
HE:
ודוד עלה במעלה הזיתים עלה ובוכה וראש לו חפוי והוא הלך יחף וכל העם אשר אתו חפו איש ראשו ועלו עלה ובכה:

Segment 31
HE:
ודוד הגיד לאמר אחיתפל בקשרים עם אבשלום ויאמר דוד סכל נא את עצת אחיתפל יהוה:

Segment 32
HE:
ויהי דוד בא עד הראש אשר ישתחוה שם לאלהים והנה לקראתו חושי הארכי קרוע כתנתו ואדמה על ראשו:

Segment 33
HE:
ויאמר לו דוד אם עברת אתי והית עלי למשא:

Segment 34
HE:
ואם העיר תשוב ואמרת לאבשלום עבדך אני המלך אהיה עבד אביך ואני מאז ועתה ואני עבדך והפרתה לי את עצת אחיתפל:

Segment 35
HE:
והלוא עמך שם צדוק ואביתר הכהנים והיה כל הדבר אשר תשמע מבית המלך תגיד לצדוק ולאביתר הכהנים:

Segment 36
HE:
הנה שם עמם שני בניהם אחימעץ לצדוק ויהונתן לאביתר ושלחתם בידם אלי כל דבר אשר תשמעו:

Segment 37
HE:
ויבא חושי רעה דוד העיר ואבשלם יבא ירושלם: