Samuel 2 Chapter 16
שמואל ב פרק טז
Source: https://ajew.org/reader/tanach-shmuel-b/1/16

Segment 1
HE:
ודוד עבר מעט מהראש והנה ציבא נער מפי בשת לקראתו וצמד חמרים חבשים ועליהם מאתים לחם ומאה צמוקים ומאה קיץ ונבל יין:

Segment 2
HE:
ויאמר המלך אל ציבא מה אלה לך ויאמר ציבא החמורים לבית המלך לרכב (ולהלחם) והלחם והקיץ לאכול הנערים והיין לשתות היעף במדבר:

Segment 3
HE:
ויאמר המלך ואיה בן אדניך ויאמר ציבא אל המלך הנה יושב בירושלם כי אמר היום ישיבו לי בית ישראל את ממלכות אבי:

Segment 4
HE:
ויאמר המלך לצבא הנה לך כל אשר למפי בשת ויאמר ציבא השתחויתי אמצא חן בעיניך אדני המלך:

Segment 5
HE:
ובא המלך דוד עד בחורים והנה משם איש יוצא ממשפחת בית שאול ושמו שמעי בן גרא יצא יצוא ומקלל:

Segment 6
HE:
ויסקל באבנים את דוד ואת כל עבדי המלך דוד וכל העם וכל הגברים מימינו ומשמאלו:

Segment 7
HE:
וכה אמר שמעי בקללו צא צא איש הדמים ואיש הבליעל:

Segment 8
HE:
השיב עליך יהוה כל דמי בית שאול אשר מלכת (תחתו) תחתיו ויתן יהוה את המלוכה ביד אבשלום בנך והנך ברעתך כי איש דמים אתה:

Segment 9
HE:
ויאמר אבישי בן צרויה אל המלך למה יקלל הכלב המת הזה את אדני המלך אעברה נא ואסירה את ראשו: (ס)

Segment 10
HE:
ויאמר המלך מה לי ולכם בני צריה (כי) כה יקלל (וכי) כי יהוה אמר לו קלל את דוד ומי יאמר מדוע עשיתה כן: (ס)

Segment 11
HE:
ויאמר דוד אל אבישי ואל כל עבדיו הנה בני אשר יצא ממעי מבקש את נפשי ואף כי עתה בן הימיני הנחו לו ויקלל כי אמר לו יהוה:

Segment 12
HE:
אולי יראה יהוה (בעוני) בעיני והשיב יהוה לי טובה תחת קללתו היום הזה:

Segment 13
HE:
וילך דוד ואנשיו בדרך (ס) ושמעי הלך בצלע ההר לעמתו הלוך ויקלל ויסקל באבנים לעמתו ועפר בעפר: (פ)

Segment 14
HE:
ויבא המלך וכל העם אשר אתו עיפים וינפש שם:

Segment 15
HE:
ואבשלום וכל העם איש ישראל באו ירושלם ואחיתפל אתו:

Segment 16
HE:
ויהי כאשר בא חושי הארכי רעה דוד אל אבשלום ויאמר חושי אל אבשלם יחי המלך יחי המלך:

Segment 17
HE:
ויאמר אבשלום אל חושי זה חסדך את רעך למה לא הלכת את רעך:

Segment 18
HE:
ויאמר חושי אל אבשלם לא כי אשר בחר יהוה והעם הזה וכל איש ישראל (לא) לו אהיה ואתו אשב:

Segment 19
HE:
והשנית למי אני אעבד הלוא לפני בנו כאשר עבדתי לפני אביך כן אהיה לפניך: (פ)

Segment 20
HE:
ויאמר אבשלום אל אחיתפל הבו לכם עצה מה נעשה:

Segment 21
HE:
ויאמר אחיתפל אל אבשלם בוא אל פלגשי אביך אשר הניח לשמור הבית ושמע כל ישראל כי נבאשת את אביך וחזקו ידי כל אשר אתך:

Segment 22
HE:
ויטו לאבשלום האהל על הגג ויבא אבשלום אל פלגשי אביו לעיני כל ישראל:

Segment 23
HE:
ועצת אחיתפל אשר יעץ בימים ההם כאשר ישאל איש בדבר האלהים כן כל עצת אחיתפל גם לדוד גם לאבשלם: (ס)