Samuel 2 Chapter 3
שמואל ב פרק ג
Source: https://ajew.org/reader/tanach-shmuel-b/1/3

Segment 1
HE:
ותהי המלחמה ארכה בין בית שאול ובין בית דוד ודוד הלך וחזק ובית שאול הלכים ודלים: (ס)

Segment 2
HE:
(וילדו) ויולדו לדוד בנים בחברון ויהי בכורו אמנון לאחינעם היזרעאלת:

Segment 3
HE:
ומשנהו כלאב (לאביגל) לאביגיל אשת נבל הכרמלי והשלשי אבשלום בן מעכה בת תלמי מלך גשור:

Segment 4
HE:
והרביעי אדניה בן חגית והחמישי שפטיה בן אביטל:

Segment 5
HE:
והששי יתרעם לעגלה אשת דוד אלה ילדו לדוד בחברון: (פ)

Segment 6
HE:
ויהי בהיות המלחמה בין בית שאול ובין בית דוד ואבנר היה מתחזק בבית שאול:

Segment 7
HE:
ולשאול פלגש ושמה רצפה בת איה ויאמר אל אבנר מדוע באתה אל פילגש אבי:

Segment 8
HE:
ויחר לאבנר מאד על דברי איש בשת ויאמר הראש כלב אנכי אשר ליהודה היום אעשה חסד עם בית שאול אביך אל אחיו ואל מרעהו ולא המציתך ביד דוד ותפקד עלי עון האשה היום:

Segment 9
HE:
כה יעשה אלהים לאבנר וכה יסיף לו כי כאשר נשבע יהוה לדוד כי כן אעשה לו:

Segment 10
HE:
להעביר הממלכה מבית שאול ולהקים את כסא דוד על ישראל ועל יהודה מדן ועד באר שבע:

Segment 11
HE:
ולא יכל עוד להשיב את אבנר דבר מיראתו אתו: (ס)

Segment 12
HE:
וישלח אבנר מלאכים אל דוד (תחתו) תחתיו לאמר למי ארץ לאמר כרתה בריתך אתי והנה ידי עמך להסב אליך את כל ישראל:

Segment 13
HE:
ויאמר טוב אני אכרת אתך ברית אך דבר אחד אנכי שאל מאתך לאמר לא תראה את פני כי אם לפני הביאך את מיכל בת שאול בבאך לראות את פני: (ס)

Segment 14
HE:
וישלח דוד מלאכים אל איש בשת בן שאול לאמר תנה את אשתי את מיכל אשר ארשתי לי במאה ערלות פלשתים:

Segment 15
HE:
וישלח איש בשת ויקחה מעם איש מעם פלטיאל בן (לוש) ליש:

Segment 16
HE:
וילך אתה אישה הלוך ובכה אחריה עד בחרים ויאמר אליו אבנר לך שוב וישב:

Segment 17
HE:
ודבר אבנר היה עם זקני ישראל לאמר גם תמול גם שלשם הייתם מבקשים את דוד למלך עליכם:

Segment 18
HE:
ועתה עשו כי יהוה אמר אל דוד לאמר ביד דוד עבדי הושיע את עמי ישראל מיד פלשתים ומיד כל איביהם:

Segment 19
HE:
וידבר גם אבנר באזני בנימין וילך גם אבנר לדבר באזני דוד בחברון את כל אשר טוב בעיני ישראל ובעיני כל בית בנימן:

Segment 20
HE:
ויבא אבנר אל דוד חברון ואתו עשרים אנשים ויעש דוד לאבנר ולאנשים אשר אתו משתה:

Segment 21
HE:
ויאמר אבנר אל דוד אקומה ואלכה ואקבצה אל אדני המלך את כל ישראל ויכרתו אתך ברית ומלכת בכל אשר תאוה נפשך וישלח דוד את אבנר וילך בשלום:

Segment 22
HE:
והנה עבדי דוד ויואב בא מהגדוד ושלל רב עמם הביאו ואבנר איננו עם דוד בחברון כי שלחו וילך בשלום:

Segment 23
HE:
ויואב וכל הצבא אשר אתו באו ויגדו ליואב לאמר בא אבנר בן נר אל המלך וישלחהו וילך בשלום:

Segment 24
HE:
ויבא יואב אל המלך ויאמר מה עשיתה הנה בא אבנר אליך למה זה שלחתו וילך הלוך:

Segment 25
HE:
ידעת את אבנר בן נר כי לפתתך בא ולדעת את מוצאך ואת (מבואך) מובאך ולדעת את כל אשר אתה עשה:

Segment 26
HE:
ויצא יואב מעם דוד וישלח מלאכים אחרי אבנר וישבו אתו מבור הסרה ודוד לא ידע:

Segment 27
HE:
וישב אבנר חברון ויטהו יואב אל תוך השער לדבר אתו בשלי ויכהו שם החמש וימת בדם עשה אל אחיו:

Segment 28
HE:
וישמע דוד מאחרי כן ויאמר נקי אנכי וממלכתי מעם יהוה עד עולם מדמי אבנר בן נר:

Segment 29
HE:
יחלו על ראש יואב ואל כל בית אביו ואל יכרת מבית יואב זב ומצרע ומחזיק בפלך ונפל בחרב וחסר לחם:

Segment 30
HE:
ויואב ואבישי אחיו הרגו לאבנר על אשר המית את עשהאל אחיהם בגבעון במלחמה: (פ)

Segment 31
HE:
ויאמר דוד אל יואב ואל כל העם אשר אתו קרעו בגדיכם וחגרו שקים וספדו לפני אבנר והמלך דוד הלך אחרי המטה:

Segment 32
HE:
ויקברו את אבנר בחברון וישא המלך את קולו ויבך אל קבר אבנר ויבכו כל העם: (פ)

Segment 33
HE:
ויקנן המלך אל אבנר ויאמר הכמות נבל ימות אבנר:

Segment 34
HE:
ידך לא אסרות ורגליך לא לנחשתים הגשו כנפול לפני בני עולה נפלת ויספו כל העם לבכות עליו:

Segment 35
HE:
ויבא כל העם להברות את דוד לחם בעוד היום וישבע דוד לאמר כה יעשה לי אלהים וכה יסיף כי אם לפני בוא השמש אטעם לחם או כל מאומה:

Segment 36
HE:
וכל העם הכירו וייטב בעיניהם ככל אשר עשה המלך בעיני כל העם טוב:

Segment 37
HE:
וידעו כל העם וכל ישראל ביום ההוא כי לא היתה מהמלך להמית את אבנר בן נר: (פ)

Segment 38
HE:
ויאמר המלך אל עבדיו הלוא תדעו כי שר וגדול נפל היום הזה בישראל:

Segment 39
HE:
ואנכי היום רך ומשוח מלך והאנשים האלה בני צרויה קשים ממני ישלם יהוה לעשה הרעה כרעתו: (פ)