Judges Chapter 10
שופטים פרק י
Source: https://ajew.org/reader/tanach-shoftim/1/10

Segment 1
HE:
ויקם אחרי אבימלך להושיע את ישראל תולע בן פואה בן דודו איש יששכר והוא ישב בשמיר בהר אפרים:

Segment 2
HE:
וישפט את ישראל עשרים ושלש שנה וימת ויקבר בשמיר: (פ)

Segment 3
HE:
ויקם אחריו יאיר הגלעדי וישפט את ישראל עשרים ושתים שנה:

Segment 4
HE:
ויהי לו שלשים בנים רכבים על שלשים עירים ושלשים עירים להם להם יקראו חות יאיר עד היום הזה אשר בארץ הגלעד:

Segment 5
HE:
וימת יאיר ויקבר בקמון: (פ)

Segment 6
HE:
ויספו בני ישראל לעשות הרע בעיני יהוה ויעבדו את הבעלים ואת העשתרות ואת אלהי ארם ואת אלהי צידון ואת אלהי מואב ואת אלהי בני עמון ואת אלהי פלשתים ויעזבו את יהוה ולא עבדוהו:

Segment 7
HE:
ויחר אף יהוה בישראל וימכרם ביד פלשתים וביד בני עמון:

Segment 8
HE:
וירעצו וירצצו את בני ישראל בשנה ההיא שמנה עשרה שנה את כל בני ישראל אשר בעבר הירדן בארץ האמרי אשר בגלעד:

Segment 9
HE:
ויעברו בני עמון את הירדן להלחם גם ביהודה ובבנימין ובבית אפרים ותצר לישראל מאד:

Segment 10
HE:
ויזעקו בני ישראל אל יהוה לאמר חטאנו לך וכי עזבנו את אלהינו ונעבד את הבעלים: (פ)

Segment 11
HE:
ויאמר יהוה אל בני ישראל הלא ממצרים ומן האמרי ומן בני עמון ומן פלשתים:

Segment 12
HE:
וצידונים ועמלק ומעון לחצו אתכם ותצעקו אלי ואושיעה אתכם מידם:

Segment 13
HE:
ואתם עזבתם אותי ותעבדו אלהים אחרים לכן לא אוסיף להושיע אתכם:

Segment 14
HE:
לכו וזעקו אל האלהים אשר בחרתם בם המה יושיעו לכם בעת צרתכם:

Segment 15
HE:
ויאמרו בני ישראל אל יהוה חטאנו עשה אתה לנו ככל הטוב בעיניך אך הצילנו נא היום הזה:

Segment 16
HE:
ויסירו את אלהי הנכר מקרבם ויעבדו את יהוה ותקצר נפשו בעמל ישראל: (פ)

Segment 17
HE:
ויצעקו בני עמון ויחנו בגלעד ויאספו בני ישראל ויחנו במצפה:

Segment 18
HE:
ויאמרו העם שרי גלעד איש אל רעהו מי האיש אשר יחל להלחם בבני עמון יהיה לראש לכל ישבי גלעד: (פ)