Judges Chapter 12
שופטים פרק יב
Source: https://ajew.org/reader/tanach-shoftim/1/12

Segment 1
HE:
ויצעק איש אפרים ויעבר צפונה ויאמרו ליפתח מדוע עברת להלחם בבני עמון ולנו לא קראת ללכת עמך ביתך נשרף עליך באש:

Segment 2
HE:
ויאמר יפתח אליהם איש ריב הייתי אני ועמי ובני עמון מאד ואזעק אתכם ולא הושעתם אותי מידם:

Segment 3
HE:
ואראה כי אינך מושיע ואשימה נפשי בכפי ואעברה אל בני עמון ויתנם יהוה בידי ולמה עליתם אלי היום הזה להלחם בי:

Segment 4
HE:
ויקבץ יפתח את כל אנשי גלעד וילחם את אפרים ויכו אנשי גלעד את אפרים כי אמרו פליטי אפרים אתם גלעד בתוך אפרים בתוך מנשה:

Segment 5
HE:
וילכד גלעד את מעברות הירדן לאפרים והיה כי יאמרו פליטי אפרים אעברה ויאמרו לו אנשי גלעד האפרתי אתה ויאמר לא:

Segment 6
HE:
ויאמרו לו אמר נא שבלת ויאמר סבלת ולא יכין לדבר כן ויאחזו אותו וישחטוהו אל מעברות הירדן ויפל בעת ההיא מאפרים ארבעים ושנים אלף:

Segment 7
HE:
וישפט יפתח את ישראל שש שנים וימת יפתח הגלעדי ויקבר בערי גלעד: (פ)

Segment 8
HE:
וישפט אחריו את ישראל אבצן מבית לחם:

Segment 9
HE:
ויהי לו שלשים בנים ושלשים בנות שלח החוצה ושלשים בנות הביא לבניו מן החוץ וישפט את ישראל שבע שנים:

Segment 10
HE:
וימת אבצן ויקבר בבית לחם: (פ)

Segment 11
HE:
וישפט אחריו את ישראל אילון הזבולני וישפט את ישראל עשר שנים:

Segment 12
HE:
וימת אלון הזבולני ויקבר באילון בארץ זבולן: (פ)

Segment 13
HE:
וישפט אחריו את ישראל עבדון בן הלל הפרעתוני:

Segment 14
HE:
ויהי לו ארבעים בנים ושלשים בני בנים רכבים על שבעים עירם וישפט את ישראל שמנה שנים:

Segment 15
HE:
וימת עבדון בן הלל הפרעתוני ויקבר בפרעתון בארץ אפרים בהר העמלקי: (פ)