Judges Chapter 15
שופטים פרק טו
Source: https://ajew.org/reader/tanach-shoftim/1/15

Segment 1
HE:
ויהי מימים בימי קציר חטים ויפקד שמשון את אשתו בגדי עזים ויאמר אבאה אל אשתי החדרה ולא נתנו אביה לבוא:

Segment 2
HE:
ויאמר אביה אמר אמרתי כי שנא שנאתה ואתננה למרעך הלא אחתה הקטנה טובה ממנה תהי נא לך תחתיה:

Segment 3
HE:
ויאמר להם שמשון נקיתי הפעם מפלשתים כי עשה אני עמם רעה:

Segment 4
HE:
וילך שמשון וילכד שלש מאות שועלים ויקח לפדים ויפן זנב אל זנב וישם לפיד אחד בין שני הזנבות בתוך:

Segment 5
HE:
ויבער אש בלפידים וישלח בקמות פלשתים ויבער מגדיש ועד קמה ועד כרם זית:

Segment 6
HE:
ויאמרו פלשתים מי עשה זאת ויאמרו שמשון חתן התמני כי לקח את אשתו ויתנה למרעהו ויעלו פלשתים וישרפו אותה ואת אביה באש:

Segment 7
HE:
ויאמר להם שמשון אם תעשון כזאת כי אם נקמתי בכם ואחר אחדל:

Segment 8
HE:
ויך אותם שוק על ירך מכה גדולה וירד וישב בסעיף סלע עיטם: (ס)

Segment 9
HE:
ויעלו פלשתים ויחנו ביהודה וינטשו בלחי:

Segment 10
HE:
ויאמרו איש יהודה למה עליתם עלינו ויאמרו לאסור את שמשון עלינו לעשות לו כאשר עשה לנו:

Segment 11
HE:
וירדו שלשת אלפים איש מיהודה אל סעיף סלע עיטם ויאמרו לשמשון הלא ידעת כי משלים בנו פלשתים ומה זאת עשית לנו ויאמר להם כאשר עשו לי כן עשיתי להם:

Segment 12
HE:
ויאמרו לו לאסרך ירדנו לתתך ביד פלשתים ויאמר להם שמשון השבעו לי פן תפגעון בי אתם:

Segment 13
HE:
ויאמרו לו לאמר לא כי אסר נאסרך ונתנוך בידם והמת לא נמיתך ויאסרהו בשנים עבתים חדשים ויעלוהו מן הסלע:

Segment 14
HE:
הוא בא עד לחי ופלשתים הריעו לקראתו ותצלח עליו רוח יהוה ותהיינה העבתים אשר על זרועותיו כפשתים אשר בערו באש וימסו אסוריו מעל ידיו:

Segment 15
HE:
וימצא לחי חמור טריה וישלח ידו ויקחה ויך בה אלף איש:

Segment 16
HE:
ויאמר שמשון בלחי החמור חמור חמרתים בלחי החמור הכיתי אלף איש:

Segment 17
HE:
ויהי ככלתו לדבר וישלך הלחי מידו ויקרא למקום ההוא רמת לחי:

Segment 18
HE:
ויצמא מאד ויקרא אל יהוה ויאמר אתה נתת ביד עבדך את התשועה הגדלה הזאת ועתה אמות בצמא ונפלתי ביד הערלים:

Segment 19
HE:
ויבקע אלהים את המכתש אשר בלחי ויצאו ממנו מים וישת ותשב רוחו ויחי על כן קרא שמה עין הקורא אשר בלחי עד היום הזה:

Segment 20
HE:
וישפט את ישראל בימי פלשתים עשרים שנה: (פ)