{
  "bookId": "tanach-shoftim",
  "part": "1",
  "torah": "16",
  "title": "Judges Chapter 16",
  "hebrewTitle": "שופטים פרק טז",
  "sourceUrl": "/reader/tanach-shoftim/1/16",
  "plainUrl": "/reader-plain/tanach-shoftim/1/16/",
  "segments": [
    {
      "index": 1,
      "he": "וילך שמשון עזתה וירא שם אשה זונה ויבא אליה:",
      "en": ""
    },
    {
      "index": 2,
      "he": "לעזתים לאמר בא שמשון הנה ויסבו ויארבו לו כל הלילה בשער העיר ויתחרשו כל הלילה לאמר עד אור הבקר והרגנהו:",
      "en": ""
    },
    {
      "index": 3,
      "he": "וישכב שמשון עד חצי הלילה ויקם בחצי הלילה ויאחז בדלתות שער העיר ובשתי המזוזות ויסעם עם הבריח וישם על כתפיו ויעלם אל ראש ההר אשר על פני חברון: (פ)",
      "en": ""
    },
    {
      "index": 4,
      "he": "ויהי אחרי כן ויאהב אשה בנחל שרק ושמה דלילה:",
      "en": ""
    },
    {
      "index": 5,
      "he": "ויעלו אליה סרני פלשתים ויאמרו לה פתי אותו וראי במה כחו גדול ובמה נוכל לו ואסרנהו לענתו ואנחנו נתן לך איש אלף ומאה כסף:",
      "en": ""
    },
    {
      "index": 6,
      "he": "ותאמר דלילה אל שמשון הגידה נא לי במה כחך גדול ובמה תאסר לענותך:",
      "en": ""
    },
    {
      "index": 7,
      "he": "ויאמר אליה שמשון אם יאסרני בשבעה יתרים לחים אשר לא חרבו וחליתי והייתי כאחד האדם:",
      "en": ""
    },
    {
      "index": 8,
      "he": "ויעלו לה סרני פלשתים שבעה יתרים לחים אשר לא חרבו ותאסרהו בהם:",
      "en": ""
    },
    {
      "index": 9,
      "he": "והארב ישב לה בחדר ותאמר אליו פלשתים עליך שמשון וינתק את היתרים כאשר ינתק פתיל הנערת בהריחו אש ולא נודע כחו:",
      "en": ""
    },
    {
      "index": 10,
      "he": "ותאמר דלילה אל שמשון הנה התלת בי ותדבר אלי כזבים עתה הגידה נא לי במה תאסר:",
      "en": ""
    },
    {
      "index": 11,
      "he": "ויאמר אליה אם אסור יאסרוני בעבתים חדשים אשר לא נעשה בהם מלאכה וחליתי והייתי כאחד האדם:",
      "en": ""
    },
    {
      "index": 12,
      "he": "ותקח דלילה עבתים חדשים ותאסרהו בהם ותאמר אליו פלשתים עליך שמשון והארב ישב בחדר וינתקם מעל זרעתיו כחוט:",
      "en": ""
    },
    {
      "index": 13,
      "he": "ותאמר דלילה אל שמשון עד הנה התלת בי ותדבר אלי כזבים הגידה לי במה תאסר ויאמר אליה אם תארגי את שבע מחלפות ראשי עם המסכת:",
      "en": ""
    },
    {
      "index": 14,
      "he": "ותתקע ביתד ותאמר אליו פלשתים עליך שמשון וייקץ משנתו ויסע את היתד הארג ואת המסכת:",
      "en": ""
    },
    {
      "index": 15,
      "he": "ותאמר אליו איך תאמר אהבתיך ולבך אין אתי זה שלש פעמים התלת בי ולא הגדת לי במה כחך גדול:",
      "en": ""
    },
    {
      "index": 16,
      "he": "ויהי כי הציקה לו בדבריה כל הימים ותאלצהו ותקצר נפשו למות:",
      "en": ""
    },
    {
      "index": 17,
      "he": "ויגד לה את כל לבו ויאמר לה מורה לא עלה על ראשי כי נזיר אלהים אני מבטן אמי אם גלחתי וסר ממני כחי וחליתי והייתי ככל האדם:",
      "en": ""
    },
    {
      "index": 18,
      "he": "ותרא דלילה כי הגיד לה את כל לבו ותשלח ותקרא לסרני פלשתים לאמר עלו הפעם כי הגיד (לה) לי את כל לבו ועלו אליה סרני פלשתים ויעלו הכסף בידם:",
      "en": ""
    },
    {
      "index": 19,
      "he": "ותישנהו על ברכיה ותקרא לאיש ותגלח את שבע מחלפות ראשו ותחל לענותו ויסר כחו מעליו:",
      "en": ""
    },
    {
      "index": 20,
      "he": "ותאמר פלשתים עליך שמשון ויקץ משנתו ויאמר אצא כפעם בפעם ואנער והוא לא ידע כי יהוה סר מעליו:",
      "en": ""
    },
    {
      "index": 21,
      "he": "ויאחזוהו פלשתים וינקרו את עיניו ויורידו אותו עזתה ויאסרוהו בנחשתים ויהי טוחן בבית (האסירים) האסורים:",
      "en": ""
    },
    {
      "index": 22,
      "he": "ויחל שער ראשו לצמח כאשר גלח: (פ)",
      "en": ""
    },
    {
      "index": 23,
      "he": "וסרני פלשתים נאספו לזבח זבח גדול לדגון אלהיהם ולשמחה ויאמרו נתן אלהינו בידנו את שמשון אויבינו:",
      "en": ""
    },
    {
      "index": 24,
      "he": "ויראו אתו העם ויהללו את אלהיהם כי אמרו נתן אלהינו בידנו את אויבנו ואת מחריב ארצנו ואשר הרבה את חללינו:",
      "en": ""
    },
    {
      "index": 25,
      "he": "ויהי (כי) (טוב) כטוב לבם ויאמרו קראו לשמשון וישחק לנו ויקראו לשמשון מבית (האסירים) האסורים ויצחק לפניהם ויעמידו אותו בין העמודים:",
      "en": ""
    },
    {
      "index": 26,
      "he": "ויאמר שמשון אל הנער המחזיק בידו הניחה אותי (והימשני) והמשני את העמדים אשר הבית נכון עליהם ואשען עליהם:",
      "en": ""
    },
    {
      "index": 27,
      "he": "והבית מלא האנשים והנשים ושמה כל סרני פלשתים ועל הגג כשלשת אלפים איש ואשה הראים בשחוק שמשון:",
      "en": ""
    },
    {
      "index": 28,
      "he": "ויקרא שמשון אל יהוה ויאמר אדני יהוה זכרני נא וחזקני נא אך הפעם הזה האלהים ואנקמה נקם אחת משתי עיני מפלשתים:",
      "en": ""
    },
    {
      "index": 29,
      "he": "וילפת שמשון את שני עמודי התוך אשר הבית נכון עליהם ויסמך עליהם אחד בימינו ואחד בשמאלו:",
      "en": ""
    },
    {
      "index": 30,
      "he": "ויאמר שמשון תמות נפשי עם פלשתים ויט בכח ויפל הבית על הסרנים ועל כל העם אשר בו ויהיו המתים אשר המית במותו רבים מאשר המית בחייו:",
      "en": ""
    },
    {
      "index": 31,
      "he": "וירדו אחיו וכל בית אביהו וישאו אתו ויעלו ויקברו אותו בין צרעה ובין אשתאל בקבר מנוח אביו והוא שפט את ישראל עשרים שנה: (פ)",
      "en": ""
    }
  ]
}