Judges Chapter 16
שופטים פרק טז
Source: https://ajew.org/reader/tanach-shoftim/1/16

Segment 1
HE:
וילך שמשון עזתה וירא שם אשה זונה ויבא אליה:

Segment 2
HE:
לעזתים לאמר בא שמשון הנה ויסבו ויארבו לו כל הלילה בשער העיר ויתחרשו כל הלילה לאמר עד אור הבקר והרגנהו:

Segment 3
HE:
וישכב שמשון עד חצי הלילה ויקם בחצי הלילה ויאחז בדלתות שער העיר ובשתי המזוזות ויסעם עם הבריח וישם על כתפיו ויעלם אל ראש ההר אשר על פני חברון: (פ)

Segment 4
HE:
ויהי אחרי כן ויאהב אשה בנחל שרק ושמה דלילה:

Segment 5
HE:
ויעלו אליה סרני פלשתים ויאמרו לה פתי אותו וראי במה כחו גדול ובמה נוכל לו ואסרנהו לענתו ואנחנו נתן לך איש אלף ומאה כסף:

Segment 6
HE:
ותאמר דלילה אל שמשון הגידה נא לי במה כחך גדול ובמה תאסר לענותך:

Segment 7
HE:
ויאמר אליה שמשון אם יאסרני בשבעה יתרים לחים אשר לא חרבו וחליתי והייתי כאחד האדם:

Segment 8
HE:
ויעלו לה סרני פלשתים שבעה יתרים לחים אשר לא חרבו ותאסרהו בהם:

Segment 9
HE:
והארב ישב לה בחדר ותאמר אליו פלשתים עליך שמשון וינתק את היתרים כאשר ינתק פתיל הנערת בהריחו אש ולא נודע כחו:

Segment 10
HE:
ותאמר דלילה אל שמשון הנה התלת בי ותדבר אלי כזבים עתה הגידה נא לי במה תאסר:

Segment 11
HE:
ויאמר אליה אם אסור יאסרוני בעבתים חדשים אשר לא נעשה בהם מלאכה וחליתי והייתי כאחד האדם:

Segment 12
HE:
ותקח דלילה עבתים חדשים ותאסרהו בהם ותאמר אליו פלשתים עליך שמשון והארב ישב בחדר וינתקם מעל זרעתיו כחוט:

Segment 13
HE:
ותאמר דלילה אל שמשון עד הנה התלת בי ותדבר אלי כזבים הגידה לי במה תאסר ויאמר אליה אם תארגי את שבע מחלפות ראשי עם המסכת:

Segment 14
HE:
ותתקע ביתד ותאמר אליו פלשתים עליך שמשון וייקץ משנתו ויסע את היתד הארג ואת המסכת:

Segment 15
HE:
ותאמר אליו איך תאמר אהבתיך ולבך אין אתי זה שלש פעמים התלת בי ולא הגדת לי במה כחך גדול:

Segment 16
HE:
ויהי כי הציקה לו בדבריה כל הימים ותאלצהו ותקצר נפשו למות:

Segment 17
HE:
ויגד לה את כל לבו ויאמר לה מורה לא עלה על ראשי כי נזיר אלהים אני מבטן אמי אם גלחתי וסר ממני כחי וחליתי והייתי ככל האדם:

Segment 18
HE:
ותרא דלילה כי הגיד לה את כל לבו ותשלח ותקרא לסרני פלשתים לאמר עלו הפעם כי הגיד (לה) לי את כל לבו ועלו אליה סרני פלשתים ויעלו הכסף בידם:

Segment 19
HE:
ותישנהו על ברכיה ותקרא לאיש ותגלח את שבע מחלפות ראשו ותחל לענותו ויסר כחו מעליו:

Segment 20
HE:
ותאמר פלשתים עליך שמשון ויקץ משנתו ויאמר אצא כפעם בפעם ואנער והוא לא ידע כי יהוה סר מעליו:

Segment 21
HE:
ויאחזוהו פלשתים וינקרו את עיניו ויורידו אותו עזתה ויאסרוהו בנחשתים ויהי טוחן בבית (האסירים) האסורים:

Segment 22
HE:
ויחל שער ראשו לצמח כאשר גלח: (פ)

Segment 23
HE:
וסרני פלשתים נאספו לזבח זבח גדול לדגון אלהיהם ולשמחה ויאמרו נתן אלהינו בידנו את שמשון אויבינו:

Segment 24
HE:
ויראו אתו העם ויהללו את אלהיהם כי אמרו נתן אלהינו בידנו את אויבנו ואת מחריב ארצנו ואשר הרבה את חללינו:

Segment 25
HE:
ויהי (כי) (טוב) כטוב לבם ויאמרו קראו לשמשון וישחק לנו ויקראו לשמשון מבית (האסירים) האסורים ויצחק לפניהם ויעמידו אותו בין העמודים:

Segment 26
HE:
ויאמר שמשון אל הנער המחזיק בידו הניחה אותי (והימשני) והמשני את העמדים אשר הבית נכון עליהם ואשען עליהם:

Segment 27
HE:
והבית מלא האנשים והנשים ושמה כל סרני פלשתים ועל הגג כשלשת אלפים איש ואשה הראים בשחוק שמשון:

Segment 28
HE:
ויקרא שמשון אל יהוה ויאמר אדני יהוה זכרני נא וחזקני נא אך הפעם הזה האלהים ואנקמה נקם אחת משתי עיני מפלשתים:

Segment 29
HE:
וילפת שמשון את שני עמודי התוך אשר הבית נכון עליהם ויסמך עליהם אחד בימינו ואחד בשמאלו:

Segment 30
HE:
ויאמר שמשון תמות נפשי עם פלשתים ויט בכח ויפל הבית על הסרנים ועל כל העם אשר בו ויהיו המתים אשר המית במותו רבים מאשר המית בחייו:

Segment 31
HE:
וירדו אחיו וכל בית אביהו וישאו אתו ויעלו ויקברו אותו בין צרעה ובין אשתאל בקבר מנוח אביו והוא שפט את ישראל עשרים שנה: (פ)