Segment 1
ויהי איש מהר אפרים ושמו מיכיהו:
Segment 2
ויאמר לאמו אלף ומאה הכסף אשר לקח לך (ואתי) ואת אלית וגם אמרת באזני הנה הכסף אתי אני לקחתיו ותאמר אמו ברוך בני ליהוה:
Segment 3
וישב את אלף ומאה הכסף לאמו ותאמר אמו הקדש הקדשתי את הכסף ליהוה מידי לבני לעשות פסל ומסכה ועתה אשיבנו לך:
Segment 4
וישב את הכסף לאמו ותקח אמו מאתים כסף ותתנהו לצורף ויעשהו פסל ומסכה ויהי בבית מיכיהו:
Segment 5
והאיש מיכה לו בית אלהים ויעש אפוד ותרפים וימלא את יד אחד מבניו ויהי לו לכהן:
Segment 6
בימים ההם אין מלך בישראל איש הישר בעיניו יעשה: (פ)
Segment 7
ויהי נער מבית לחם יהודה ממשפחת יהודה והוא לוי והוא גר שם:
Segment 8
וילך האיש מהעיר מבית לחם יהודה לגור באשר ימצא ויבא הר אפרים עד בית מיכה לעשות דרכו:
Segment 9
ויאמר לו מיכה מאין תבוא ויאמר אליו לוי אנכי מבית לחם יהודה ואנכי הלך לגור באשר אמצא:
Segment 10
ויאמר לו מיכה שבה עמדי והיה לי לאב ולכהן ואנכי אתן לך עשרת כסף לימים וערך בגדים ומחיתך וילך הלוי:
Segment 11
ויואל הלוי לשבת את האיש ויהי הנער לו כאחד מבניו:
Segment 12
וימלא מיכה את יד הלוי ויהי לו הנער לכהן ויהי בבית מיכה:
Segment 13
ויאמר מיכה עתה ידעתי כי ייטיב יהוה לי כי היה לי הלוי לכהן: