Judges Chapter 18
שופטים פרק יח
Source: https://ajew.org/reader/tanach-shoftim/1/18

Segment 1
HE:
בימים ההם אין מלך בישראל ובימים ההם שבט הדני מבקש לו נחלה לשבת כי לא נפלה לו עד היום ההוא בתוך שבטי ישראל בנחלה: (ס)

Segment 2
HE:
וישלחו בני דן ממשפחתם חמשה אנשים מקצותם אנשים בני חיל מצרעה ומאשתאל לרגל את הארץ ולחקרה ויאמרו אלהם לכו חקרו את הארץ ויבאו הר אפרים עד בית מיכה וילינו שם:

Segment 3
HE:
המה עם בית מיכה והמה הכירו את קול הנער הלוי ויסורו שם ויאמרו לו מי הביאך הלם ומה אתה עשה בזה ומה לך פה:

Segment 4
HE:
ויאמר אלהם כזה וכזה עשה לי מיכה וישכרני ואהי לו לכהן:

Segment 5
HE:
ויאמרו לו שאל נא באלהים ונדעה התצליח דרכנו אשר אנחנו הלכים עליה:

Segment 6
HE:
ויאמר להם הכהן לכו לשלום נכח יהוה דרככם אשר תלכו בה: (פ)

Segment 7
HE:
וילכו חמשת האנשים ויבאו לישה ויראו את העם אשר בקרבה יושבת לבטח כמשפט צדנים שקט ובטח ואין מכלים דבר בארץ יורש עצר ורחקים המה מצדנים ודבר אין להם עם אדם:

Segment 8
HE:
ויבאו אל אחיהם צרעה ואשתאל ויאמרו להם אחיהם מה אתם:

Segment 9
HE:
ויאמרו קומה ונעלה עליהם כי ראינו את הארץ והנה טובה מאד ואתם מחשים אל תעצלו ללכת לבא לרשת את הארץ:

Segment 10
HE:
כבאכם תבאו אל עם בטח והארץ רחבת ידים כי נתנה אלהים בידכם מקום אשר אין שם מחסור כל דבר אשר בארץ:

Segment 11
HE:
ויסעו משם ממשפחת הדני מצרעה ומאשתאל שש מאות איש חגור כלי מלחמה:

Segment 12
HE:
ויעלו ויחנו בקרית יערים ביהודה על כן קראו למקום ההוא מחנה דן עד היום הזה הנה אחרי קרית יערים:

Segment 13
HE:
ויעברו משם הר אפרים ויבאו עד בית מיכה:

Segment 14
HE:
ויענו חמשת האנשים ההלכים לרגל את הארץ ליש ויאמרו אל אחיהם הידעתם כי יש בבתים האלה אפוד ותרפים ופסל ומסכה ועתה דעו מה תעשו:

Segment 15
HE:
ויסורו שמה ויבאו אל בית הנער הלוי בית מיכה וישאלו לו לשלום:

Segment 16
HE:
ושש מאות איש חגורים כלי מלחמתם נצבים פתח השער אשר מבני דן:

Segment 17
HE:
ויעלו חמשת האנשים ההלכים לרגל את הארץ באו שמה לקחו את הפסל ואת האפוד ואת התרפים ואת המסכה והכהן נצב פתח השער ושש מאות האיש החגור כלי המלחמה:

Segment 18
HE:
ואלה באו בית מיכה ויקחו את פסל האפוד ואת התרפים ואת המסכה ויאמר אליהם הכהן מה אתם עשים:

Segment 19
HE:
ויאמרו לו החרש שים ידך על פיך ולך עמנו והיה לנו לאב ולכהן הטוב היותך כהן לבית איש אחד או היותך כהן לשבט ולמשפחה בישראל:

Segment 20
HE:
וייטב לב הכהן ויקח את האפוד ואת התרפים ואת הפסל ויבא בקרב העם:

Segment 21
HE:
ויפנו וילכו וישימו את הטף ואת המקנה ואת הכבודה לפניהם:

Segment 22
HE:
המה הרחיקו מבית מיכה והאנשים אשר בבתים אשר עם בית מיכה נזעקו וידביקו את בני דן:

Segment 23
HE:
ויקראו אל בני דן ויסבו פניהם ויאמרו למיכה מה לך כי נזעקת:

Segment 24
HE:
ויאמר את אלהי אשר עשיתי לקחתם ואת הכהן ותלכו ומה לי עוד ומה זה תאמרו אלי מה לך:

Segment 25
HE:
ויאמרו אליו בני דן אל תשמע קולך עמנו פן יפגעו בכם אנשים מרי נפש ואספתה נפשך ונפש ביתך:

Segment 26
HE:
וילכו בני דן לדרכם וירא מיכה כי חזקים המה ממנו ויפן וישב אל ביתו:

Segment 27
HE:
והמה לקחו את אשר עשה מיכה ואת הכהן אשר היה לו ויבאו על ליש על עם שקט ובטח ויכו אותם לפי חרב ואת העיר שרפו באש:

Segment 28
HE:
ואין מציל כי רחוקה היא מצידון ודבר אין להם עם אדם והיא בעמק אשר לבית רחוב ויבנו את העיר וישבו בה:

Segment 29
HE:
ויקראו שם העיר דן בשם דן אביהם אשר יולד לישראל ואולם ליש שם העיר לראשנה:

Segment 30
HE:
ויקימו להם בני דן את הפסל ויהונתן בן גרשם בן מנשה הוא ובניו היו כהנים לשבט הדני עד יום גלות הארץ:

Segment 31
HE:
וישימו להם את פסל מיכה אשר עשה כל ימי היות בית האלהים בשלה: (פ)