Judges Chapter 2
שופטים פרק ב
Source: https://ajew.org/reader/tanach-shoftim/1/2

Segment 1
HE:
ויעל מלאך יהוה מן הגלגל אל הבכים ויאמר אעלה אתכם ממצרים ואביא אתכם אל הארץ אשר נשבעתי לאבתיכם ואמר לא אפר בריתי אתכם לעולם:

Segment 2
HE:
ואתם לא תכרתו ברית ליושבי הארץ הזאת מזבחותיהם תתצון ולא שמעתם בקלי מה זאת עשיתם:

Segment 3
HE:
וגם אמרתי לא אגרש אותם מפניכם והיו לכם לצדים ואלהיהם יהיו לכם למוקש:

Segment 4
HE:
ויהי כדבר מלאך יהוה את הדברים האלה אל כל בני ישראל וישאו העם את קולם ויבכו:

Segment 5
HE:
ויקראו שם המקום ההוא בכים ויזבחו שם ליהוה: (פ)

Segment 6
HE:
וישלח יהושע את העם וילכו בני ישראל איש לנחלתו לרשת את הארץ:

Segment 7
HE:
ויעבדו העם את יהוה כל ימי יהושע וכל ימי הזקנים אשר האריכו ימים אחרי יהושוע אשר ראו את כל מעשה יהוה הגדול אשר עשה לישראל:

Segment 8
HE:
וימת יהושע בן נון עבד יהוה בן מאה ועשר שנים:

Segment 9
HE:
ויקברו אותו בגבול נחלתו בתמנת חרס בהר אפרים מצפון להר געש:

Segment 10
HE:
וגם כל הדור ההוא נאספו אל אבותיו ויקם דור אחר אחריהם אשר לא ידעו את יהוה וגם את המעשה אשר עשה לישראל: (ס)

Segment 11
HE:
ויעשו בני ישראל את הרע בעיני יהוה ויעבדו את הבעלים:

Segment 12
HE:
ויעזבו את יהוה אלהי אבותם המוציא אותם מארץ מצרים וילכו אחרי אלהים אחרים מאלהי העמים אשר סביבותיהם וישתחוו להם ויכעסו את יהוה:

Segment 13
HE:
ויעזבו את יהוה ויעבדו לבעל ולעשתרות:

Segment 14
HE:
ויחר אף יהוה בישראל ויתנם ביד שסים וישסו אותם וימכרם ביד אויביהם מסביב ולא יכלו עוד לעמד לפני אויביהם:

Segment 15
HE:
בכל אשר יצאו יד יהוה היתה בם לרעה כאשר דבר יהוה וכאשר נשבע יהוה להם ויצר להם מאד:

Segment 16
HE:
ויקם יהוה שפטים ויושיעום מיד שסיהם:

Segment 17
HE:
וגם אל שפטיהם לא שמעו כי זנו אחרי אלהים אחרים וישתחוו להם סרו מהר מן הדרך אשר הלכו אבותם לשמע מצות יהוה לא עשו כן:

Segment 18
HE:
וכי הקים יהוה להם שפטים והיה יהוה עם השפט והושיעם מיד איביהם כל ימי השופט כי ינחם יהוה מנאקתם מפני לחציהם ודחקיהם:

Segment 19
HE:
והיה במות השופט ישבו והשחיתו מאבותם ללכת אחרי אלהים אחרים לעבדם ולהשתחות להם לא הפילו ממעלליהם ומדרכם הקשה:

Segment 20
HE:
ויחר אף יהוה בישראל ויאמר יען אשר עברו הגוי הזה את בריתי אשר צויתי את אבותם ולא שמעו לקולי:

Segment 21
HE:
גם אני לא אוסיף להוריש איש מפניהם מן הגוים אשר עזב יהושע וימת:

Segment 22
HE:
למען נסות בם את ישראל השמרים הם את דרך יהוה ללכת בם כאשר שמרו אבותם אם לא:

Segment 23
HE:
וינח יהוה את הגוים האלה לבלתי הורישם מהר ולא נתנם ביד יהושע: (פ)