Judges Chapter 21
שופטים פרק כא
Source: https://ajew.org/reader/tanach-shoftim/1/21

Segment 1
HE:
ואיש ישראל נשבע במצפה לאמר איש ממנו לא יתן בתו לבנימן לאשה:

Segment 2
HE:
ויבא העם בית אל וישבו שם עד הערב לפני האלהים וישאו קולם ויבכו בכי גדול:

Segment 3
HE:
ויאמרו למה יהוה אלהי ישראל היתה זאת בישראל להפקד היום מישראל שבט אחד:

Segment 4
HE:
ויהי ממחרת וישכימו העם ויבנו שם מזבח ויעלו עלות ושלמים: (פ)

Segment 5
HE:
ויאמרו בני ישראל מי אשר לא עלה בקהל מכל שבטי ישראל אל יהוה כי השבועה הגדולה היתה לאשר לא עלה אל יהוה המצפה לאמר מות יומת:

Segment 6
HE:
וינחמו בני ישראל אל בנימן אחיו ויאמרו נגדע היום שבט אחד מישראל:

Segment 7
HE:
מה נעשה להם לנותרים לנשים ואנחנו נשבענו ביהוה לבלתי תת להם מבנותינו לנשים:

Segment 8
HE:
ויאמרו מי אחד משבטי ישראל אשר לא עלה אל יהוה המצפה והנה לא בא איש אל המחנה מיביש גלעד אל הקהל:

Segment 9
HE:
ויתפקד העם והנה אין שם איש מיושבי יבש גלעד:

Segment 10
HE:
וישלחו שם העדה שנים עשר אלף איש מבני החיל ויצוו אותם לאמר לכו והכיתם את יושבי יבש גלעד לפי חרב והנשים והטף:

Segment 11
HE:
וזה הדבר אשר תעשו כל זכר וכל אשה ידעת משכב זכר תחרימו:

Segment 12
HE:
וימצאו מיושבי יביש גלעד ארבע מאות נערה בתולה אשר לא ידעה איש למשכב זכר ויביאו אותם אל המחנה שלה אשר בארץ כנען: (ס)

Segment 13
HE:
וישלחו כל העדה וידברו אל בני בנימן אשר בסלע רמון ויקראו להם שלום:

Segment 14
HE:
וישב בנימן בעת ההיא ויתנו להם הנשים אשר חיו מנשי יבש גלעד ולא מצאו להם כן:

Segment 15
HE:
והעם נחם לבנימן כי עשה יהוה פרץ בשבטי ישראל:

Segment 16
HE:
ויאמרו זקני העדה מה נעשה לנותרים לנשים כי נשמדה מבנימן אשה:

Segment 17
HE:
ויאמרו ירשת פליטה לבנימן ולא ימחה שבט מישראל:

Segment 18
HE:
ואנחנו לא נוכל לתת להם נשים מבנותינו כי נשבעו בני ישראל לאמר ארור נתן אשה לבנימן: (ס)

Segment 19
HE:
ויאמרו הנה חג יהוה בשלו מימים ימימה אשר מצפונה לבית אל מזרחה השמש למסלה העלה מבית אל שכמה ומנגב ללבונה:

Segment 20
HE:
(ויצו) ויצוו את בני בנימן לאמר לכו וארבתם בכרמים:

Segment 21
HE:
וראיתם והנה אם יצאו בנות שילו לחול במחלות ויצאתם מן הכרמים וחטפתם לכם איש אשתו מבנות שילו והלכתם ארץ בנימן:

Segment 22
HE:
והיה כי יבאו אבותם או אחיהם (לרוב) לריב אלינו ואמרנו אליהם חנונו אותם כי לא לקחנו איש אשתו במלחמה כי לא אתם נתתם להם כעת תאשמו: (ס)

Segment 23
HE:
ויעשו כן בני בנימן וישאו נשים למספרם מן המחללות אשר גזלו וילכו וישובו אל נחלתם ויבנו את הערים וישבו בהם:

Segment 24
HE:
ויתהלכו משם בני ישראל בעת ההיא איש לשבטו ולמשפחתו ויצאו משם איש לנחלתו:

Segment 25
HE:
בימים ההם אין מלך בישראל איש הישר בעיניו יעשה: (חזק)