Judges Chapter 3
שופטים פרק ג
Source: https://ajew.org/reader/tanach-shoftim/1/3

Segment 1
HE:
ואלה הגוים אשר הניח יהוה לנסות בם את ישראל את כל אשר לא ידעו את כל מלחמות כנען:

Segment 2
HE:
רק למען דעת דרות בני ישראל ללמדם מלחמה רק אשר לפנים לא ידעום:

Segment 3
HE:
חמשת סרני פלשתים וכל הכנעני והצידני והחוי ישב הר הלבנון מהר בעל חרמון עד לבוא חמת:

Segment 4
HE:
ויהיו לנסות בם את ישראל לדעת הישמעו את מצות יהוה אשר צוה את אבותם ביד משה:

Segment 5
HE:
ובני ישראל ישבו בקרב הכנעני החתי והאמרי והפרזי והחוי והיבוסי:

Segment 6
HE:
ויקחו את בנותיהם להם לנשים ואת בנותיהם נתנו לבניהם ויעבדו את אלהיהם: (פ)

Segment 7
HE:
ויעשו בני ישראל את הרע בעיני יהוה וישכחו את יהוה אלהיהם ויעבדו את הבעלים ואת האשרות:

Segment 8
HE:
ויחר אף יהוה בישראל וימכרם ביד כושן רשעתים מלך ארם נהרים ויעבדו בני ישראל את כושן רשעתים שמנה שנים:

Segment 9
HE:
ויזעקו בני ישראל אל יהוה ויקם יהוה מושיע לבני ישראל ויושיעם את עתניאל בן קנז אחי כלב הקטן ממנו:

Segment 10
HE:
ותהי עליו רוח יהוה וישפט את ישראל ויצא למלחמה ויתן יהוה בידו את כושן רשעתים מלך ארם ותעז ידו על כושן רשעתים:

Segment 11
HE:
ותשקט הארץ ארבעים שנה וימת עתניאל בן קנז: (פ)

Segment 12
HE:
ויספו בני ישראל לעשות הרע בעיני יהוה ויחזק יהוה את עגלון מלך מואב על ישראל על כי עשו את הרע בעיני יהוה:

Segment 13
HE:
ויאסף אליו את בני עמון ועמלק וילך ויך את ישראל ויירשו את עיר התמרים:

Segment 14
HE:
ויעבדו בני ישראל את עגלון מלך מואב שמונה עשרה שנה: (ס)

Segment 15
HE:
ויזעקו בני ישראל אל יהוה ויקם יהוה להם מושיע את אהוד בן גרא בן הימיני איש אטר יד ימינו וישלחו בני ישראל בידו מנחה לעגלון מלך מואב:

Segment 16
HE:
ויעש לו אהוד חרב ולה שני פיות גמד ארכה ויחגר אותה מתחת למדיו על ירך ימינו:

Segment 17
HE:
ויקרב את המנחה לעגלון מלך מואב ועגלון איש בריא מאד:

Segment 18
HE:
ויהי כאשר כלה להקריב את המנחה וישלח את העם נשאי המנחה:

Segment 19
HE:
והוא שב מן הפסילים אשר את הגלגל ויאמר דבר סתר לי אליך המלך ויאמר הס ויצאו מעליו כל העמדים עליו:

Segment 20
HE:
ואהוד בא אליו והוא ישב בעלית המקרה אשר לו לבדו ויאמר אהוד דבר אלהים לי אליך ויקם מעל הכסא:

Segment 21
HE:
וישלח אהוד את יד שמאלו ויקח את החרב מעל ירך ימינו ויתקעה בבטנו:

Segment 22
HE:
ויבא גם הנצב אחר הלהב ויסגר החלב בעד הלהב כי לא שלף החרב מבטנו ויצא הפרשדנה:

Segment 23
HE:
ויצא אהוד המסדרונה ויסגר דלתות העליה בעדו ונעל:

Segment 24
HE:
והוא יצא ועבדיו באו ויראו והנה דלתות העליה נעלות ויאמרו אך מסיך הוא את רגליו בחדר המקרה:

Segment 25
HE:
ויחילו עד בוש והנה איננו פתח דלתות העליה ויקחו את המפתח ויפתחו והנה אדניהם נפל ארצה מת:

Segment 26
HE:
ואהוד נמלט עד התמהמהם והוא עבר את הפסילים וימלט השעירתה:

Segment 27
HE:
ויהי בבואו ויתקע בשופר בהר אפרים וירדו עמו בני ישראל מן ההר והוא לפניהם:

Segment 28
HE:
ויאמר אלהם רדפו אחרי כי נתן יהוה את איביכם את מואב בידכם וירדו אחריו וילכדו את מעברות הירדן למואב ולא נתנו איש לעבר:

Segment 29
HE:
ויכו את מואב בעת ההיא כעשרת אלפים איש כל שמן וכל איש חיל ולא נמלט איש:

Segment 30
HE:
ותכנע מואב ביום ההוא תחת יד ישראל ותשקט הארץ שמונים שנה: (ס)

Segment 31
HE:
ואחריו היה שמגר בן ענת ויך את פלשתים שש מאות איש במלמד הבקר וישע גם הוא את ישראל: (ס)