Judges Chapter 6
שופטים פרק ו
Source: https://ajew.org/reader/tanach-shoftim/1/6

Segment 1
HE:
ויעשו בני ישראל הרע בעיני יהוה ויתנם יהוה ביד מדין שבע שנים:

Segment 2
HE:
ותעז יד מדין על ישראל מפני מדין עשו להם בני ישראל את המנהרות אשר בהרים ואת המערות ואת המצדות:

Segment 3
HE:
והיה אם זרע ישראל ועלה מדין ועמלק ובני קדם ועלו עליו:

Segment 4
HE:
ויחנו עליהם וישחיתו את יבול הארץ עד בואך עזה ולא ישאירו מחיה בישראל ושה ושור וחמור:

Segment 5
HE:
כי הם ומקניהם יעלו ואהליהם (יבאו) ובאו כדי ארבה לרב ולהם ולגמליהם אין מספר ויבאו בארץ לשחתה:

Segment 6
HE:
וידל ישראל מאד מפני מדין ויזעקו בני ישראל אל יהוה: (פ)

Segment 7
HE:
ויהי כי זעקו בני ישראל אל יהוה על אדות מדין:

Segment 8
HE:
וישלח יהוה איש נביא אל בני ישראל ויאמר להם כה אמר יהוה אלהי ישראל אנכי העליתי אתכם ממצרים ואציא אתכם מבית עבדים:

Segment 9
HE:
ואצל אתכם מיד מצרים ומיד כל לחציכם ואגרש אותם מפניכם ואתנה לכם את ארצם:

Segment 10
HE:
ואמרה לכם אני יהוה אלהיכם לא תיראו את אלהי האמרי אשר אתם יושבים בארצם ולא שמעתם בקולי: (פ)

Segment 11
HE:
ויבא מלאך יהוה וישב תחת האלה אשר בעפרה אשר ליואש אבי העזרי וגדעון בנו חבט חטים בגת להניס מפני מדין:

Segment 12
HE:
וירא אליו מלאך יהוה ויאמר אליו יהוה עמך גבור החיל:

Segment 13
HE:
ויאמר אליו גדעון בי אדני ויש יהוה עמנו ולמה מצאתנו כל זאת ואיה כל נפלאתיו אשר ספרו לנו אבותינו לאמר הלא ממצרים העלנו יהוה ועתה נטשנו יהוה ויתננו בכף מדין:

Segment 14
HE:
ויפן אליו יהוה ויאמר לך בכחך זה והושעת את ישראל מכף מדין הלא שלחתיך:

Segment 15
HE:
ויאמר אליו בי אדני במה אושיע את ישראל הנה אלפי הדל במנשה ואנכי הצעיר בבית אבי:

Segment 16
HE:
ויאמר אליו יהוה כי אהיה עמך והכית את מדין כאיש אחד:

Segment 17
HE:
ויאמר אליו אם נא מצאתי חן בעיניך ועשית לי אות שאתה מדבר עמי:

Segment 18
HE:
אל נא תמש מזה עד באי אליך והצאתי את מנחתי והנחתי לפניך ויאמר אנכי אשב עד שובך:

Segment 19
HE:
וגדעון בא ויעש גדי עזים ואיפת קמח מצות הבשר שם בסל והמרק שם בפרור ויוצא אליו אל תחת האלה ויגש: (ס)

Segment 20
HE:
ויאמר אליו מלאך האלהים קח את הבשר ואת המצות והנח אל הסלע הלז ואת המרק שפוך ויעש כן:

Segment 21
HE:
וישלח מלאך יהוה את קצה המשענת אשר בידו ויגע בבשר ובמצות ותעל האש מן הצור ותאכל את הבשר ואת המצות ומלאך יהוה הלך מעיניו:

Segment 22
HE:
וירא גדעון כי מלאך יהוה הוא (ס) (ס) ויאמר גדעון אהה אדני יהוה כי על כן ראיתי מלאך יהוה פנים אל פנים:

Segment 23
HE:
ויאמר לו יהוה שלום לך אל תירא לא תמות:

Segment 24
HE:
ויבן שם גדעון מזבח ליהוה ויקרא לו יהוה שלום עד היום הזה עודנו בעפרת אבי העזרי: (פ)

Segment 25
HE:
ויהי בלילה ההוא ויאמר לו יהוה קח את פר השור אשר לאביך ופר השני שבע שנים והרסת את מזבח הבעל אשר לאביך ואת האשרה אשר עליו תכרת:

Segment 26
HE:
ובנית מזבח ליהוה אלהיך על ראש המעוז הזה במערכה ולקחת את הפר השני והעלית עולה בעצי האשרה אשר תכרת:

Segment 27
HE:
ויקח גדעון עשרה אנשים מעבדיו ויעש כאשר דבר אליו יהוה ויהי כאשר ירא את בית אביו ואת אנשי העיר מעשות יומם ויעש לילה:

Segment 28
HE:
וישכימו אנשי העיר בבקר והנה נתץ מזבח הבעל והאשרה אשר עליו כרתה ואת הפר השני העלה על המזבח הבנוי:

Segment 29
HE:
ויאמרו איש אל רעהו מי עשה הדבר הזה וידרשו ויבקשו ויאמרו גדעון בן יואש עשה הדבר הזה:

Segment 30
HE:
ויאמרו אנשי העיר אל יואש הוצא את בנך וימת כי נתץ את מזבח הבעל וכי כרת האשרה אשר עליו:

Segment 31
HE:
ויאמר יואש לכל אשר עמדו עליו האתם תריבון לבעל אם אתם תושיעון אותו אשר יריב לו יומת עד הבקר אם אלהים הוא ירב לו כי נתץ את מזבחו:

Segment 32
HE:
ויקרא לו ביום ההוא ירבעל לאמר ירב בו הבעל כי נתץ את מזבחו: (פ)

Segment 33
HE:
וכל מדין ועמלק ובני קדם נאספו יחדו ויעברו ויחנו בעמק יזרעאל:

Segment 34
HE:
ורוח יהוה לבשה את גדעון ויתקע בשופר ויזעק אביעזר אחריו:

Segment 35
HE:
ומלאכים שלח בכל מנשה ויזעק גם הוא אחריו ומלאכים שלח באשר ובזבלון ובנפתלי ויעלו לקראתם:

Segment 36
HE:
ויאמר גדעון אל האלהים אם ישך מושיע בידי את ישראל כאשר דברת:

Segment 37
HE:
הנה אנכי מציג את גזת הצמר בגרן אם טל יהיה על הגזה לבדה ועל כל הארץ חרב וידעתי כי תושיע בידי את ישראל כאשר דברת:

Segment 38
HE:
ויהי כן וישכם ממחרת ויזר את הגזה וימץ טל מן הגזה מלוא הספל מים:

Segment 39
HE:
ויאמר גדעון אל האלהים אל יחר אפך בי ואדברה אך הפעם אנסה נא רק הפעם בגזה יהי נא חרב אל הגזה לבדה ועל כל הארץ יהיה טל:

Segment 40
HE:
ויעש אלהים כן בלילה ההוא ויהי חרב אל הגזה לבדה ועל כל הארץ היה טל: (פ)