Judges Chapter 9
שופטים פרק ט
Source: https://ajew.org/reader/tanach-shoftim/1/9

Segment 1
HE:
וילך אבימלך בן ירבעל שכמה אל אחי אמו וידבר אליהם ואל כל משפחת בית אבי אמו לאמר:

Segment 2
HE:
דברו נא באזני כל בעלי שכם מה טוב לכם המשל בכם שבעים איש כל בני ירבעל אם משל בכם איש אחד וזכרתם כי עצמכם ובשרכם אני:

Segment 3
HE:
וידברו אחי אמו עליו באזני כל בעלי שכם את כל הדברים האלה ויט לבם אחרי אבימלך כי אמרו אחינו הוא:

Segment 4
HE:
ויתנו לו שבעים כסף מבית בעל ברית וישכר בהם אבימלך אנשים ריקים ופחזים וילכו אחריו:

Segment 5
HE:
ויבא בית אביו עפרתה ויהרג את אחיו בני ירבעל שבעים איש על אבן אחת ויותר יותם בן ירבעל הקטן כי נחבא: (ס)

Segment 6
HE:
ויאספו כל בעלי שכם וכל בית מלוא וילכו וימליכו את אבימלך למלך עם אלון מצב אשר בשכם:

Segment 7
HE:
ויגדו ליותם וילך ויעמד בראש הר גרזים וישא קולו ויקרא ויאמר להם שמעו אלי בעלי שכם וישמע אליכם אלהים:

Segment 8
HE:
הלוך הלכו העצים למשח עליהם מלך ויאמרו לזית (מלוכה) מלכה עלינו:

Segment 9
HE:
ויאמר להם הזית החדלתי את דשני אשר בי יכבדו אלהים ואנשים והלכתי לנוע על העצים:

Segment 10
HE:
ויאמרו העצים לתאנה לכי את מלכי עלינו:

Segment 11
HE:
ותאמר להם התאנה החדלתי את מתקי ואת תנובתי הטובה והלכתי לנוע על העצים:

Segment 12
HE:
ויאמרו העצים לגפן לכי את (מלוכי) מלכי עלינו:

Segment 13
HE:
ותאמר להם הגפן החדלתי את תירושי המשמח אלהים ואנשים והלכתי לנוע על העצים:

Segment 14
HE:
ויאמרו כל העצים אל האטד לך אתה מלך עלינו:

Segment 15
HE:
ויאמר האטד אל העצים אם באמת אתם משחים אתי למלך עליכם באו חסו בצלי ואם אין תצא אש מן האטד ותאכל את ארזי הלבנון:

Segment 16
HE:
ועתה אם באמת ובתמים עשיתם ותמליכו את אבימלך ואם טובה עשיתם עם ירבעל ועם ביתו ואם כגמול ידיו עשיתם לו:

Segment 17
HE:
אשר נלחם אבי עליכם וישלך את נפשו מנגד ויצל אתכם מיד מדין:

Segment 18
HE:
ואתם קמתם על בית אבי היום ותהרגו את בניו שבעים איש על אבן אחת ותמליכו את אבימלך בן אמתו על בעלי שכם כי אחיכם הוא:

Segment 19
HE:
ואם באמת ובתמים עשיתם עם ירבעל ועם ביתו היום הזה שמחו באבימלך וישמח גם הוא בכם:

Segment 20
HE:
ואם אין תצא אש מאבימלך ותאכל את בעלי שכם ואת בית מלוא ותצא אש מבעלי שכם ומבית מלוא ותאכל את אבימלך:

Segment 21
HE:
וינס יותם ויברח וילך בארה וישב שם מפני אבימלך אחיו: (פ)

Segment 22
HE:
וישר אבימלך על ישראל שלש שנים:

Segment 23
HE:
וישלח אלהים רוח רעה בין אבימלך ובין בעלי שכם ויבגדו בעלי שכם באבימלך:

Segment 24
HE:
לבוא חמס שבעים בני ירבעל ודמם לשום על אבימלך אחיהם אשר הרג אותם ועל בעלי שכם אשר חזקו את ידיו להרג את אחיו:

Segment 25
HE:
וישימו לו בעלי שכם מארבים על ראשי ההרים ויגזלו את כל אשר יעבר עליהם בדרך ויגד לאבימלך: (פ)

Segment 26
HE:
ויבא געל בן עבד ואחיו ויעברו בשכם ויבטחו בו בעלי שכם:

Segment 27
HE:
ויצאו השדה ויבצרו את כרמיהם וידרכו ויעשו הלולים ויבאו בית אלהיהם ויאכלו וישתו ויקללו את אבימלך:

Segment 28
HE:
ויאמר געל בן עבד מי אבימלך ומי שכם כי נעבדנו הלא בן ירבעל וזבל פקידו עבדו את אנשי חמור אבי שכם ומדוע נעבדנו אנחנו:

Segment 29
HE:
ומי יתן את העם הזה בידי ואסירה את אבימלך ויאמר לאבימלך רבה צבאך וצאה:

Segment 30
HE:
וישמע זבל שר העיר את דברי געל בן עבד ויחר אפו:

Segment 31
HE:
וישלח מלאכים אל אבימלך בתרמה לאמר הנה געל בן עבד ואחיו באים שכמה והנם צרים את העיר עליך:

Segment 32
HE:
ועתה קום לילה אתה והעם אשר אתך וארב בשדה:

Segment 33
HE:
והיה בבקר כזרח השמש תשכים ופשטת על העיר והנה הוא והעם אשר אתו יצאים אליך ועשית לו כאשר תמצא ידך: (ס)

Segment 34
HE:
ויקם אבימלך וכל העם אשר עמו לילה ויארבו על שכם ארבעה ראשים:

Segment 35
HE:
ויצא געל בן עבד ויעמד פתח שער העיר ויקם אבימלך והעם אשר אתו מן המארב:

Segment 36
HE:
וירא געל את העם ויאמר אל זבל הנה עם יורד מראשי ההרים ויאמר אליו זבל את צל ההרים אתה ראה כאנשים: (ס)

Segment 37
HE:
ויסף עוד געל לדבר ויאמר הנה עם יורדים מעם טבור הארץ וראש אחד בא מדרך אלון מעוננים:

Segment 38
HE:
ויאמר אליו זבל איה אפוא פיך אשר תאמר מי אבימלך כי נעבדנו הלא זה העם אשר מאסתה בו צא נא עתה והלחם בו: (ס)

Segment 39
HE:
ויצא געל לפני בעלי שכם וילחם באבימלך:

Segment 40
HE:
וירדפהו אבימלך וינס מפניו ויפלו חללים רבים עד פתח השער:

Segment 41
HE:
וישב אבימלך בארומה ויגרש זבל את געל ואת אחיו משבת בשכם:

Segment 42
HE:
ויהי ממחרת ויצא העם השדה ויגדו לאבימלך:

Segment 43
HE:
ויקח את העם ויחצם לשלשה ראשים ויארב בשדה וירא והנה העם יצא מן העיר ויקם עליהם ויכם:

Segment 44
HE:
ואבימלך והראשים אשר עמו פשטו ויעמדו פתח שער העיר ושני הראשים פשטו על כל אשר בשדה ויכום:

Segment 45
HE:
ואבימלך נלחם בעיר כל היום ההוא וילכד את העיר ואת העם אשר בה הרג ויתץ את העיר ויזרעה מלח: (פ)

Segment 46
HE:
וישמעו כל בעלי מגדל שכם ויבאו אל צריח בית אל ברית:

Segment 47
HE:
ויגד לאבימלך כי התקבצו כל בעלי מגדל שכם:

Segment 48
HE:
ויעל אבימלך הר צלמון הוא וכל העם אשר אתו ויקח אבימלך את הקרדמות בידו ויכרת שוכת עצים וישאה וישם על שכמו ויאמר אל העם אשר עמו מה ראיתם עשיתי מהרו עשו כמוני:

Segment 49
HE:
ויכרתו גם כל העם איש שוכה וילכו אחרי אבימלך וישימו על הצריח ויציתו עליהם את הצריח באש וימתו גם כל אנשי מגדל שכם כאלף איש ואשה: (פ)

Segment 50
HE:
וילך אבימלך אל תבץ ויחן בתבץ וילכדה:

Segment 51
HE:
ומגדל עז היה בתוך העיר וינסו שמה כל האנשים והנשים וכל בעלי העיר ויסגרו בעדם ויעלו על גג המגדל:

Segment 52
HE:
ויבא אבימלך עד המגדל וילחם בו ויגש עד פתח המגדל לשרפו באש:

Segment 53
HE:
ותשלך אשה אחת פלח רכב על ראש אבימלך ותרץ את גלגלתו:

Segment 54
HE:
ויקרא מהרה אל הנער נשא כליו ויאמר לו שלף חרבך ומותתני פן יאמרו לי אשה הרגתהו וידקרהו נערו וימת:

Segment 55
HE:
ויראו איש ישראל כי מת אבימלך וילכו איש למקמו:

Segment 56
HE:
וישב אלהים את רעת אבימלך אשר עשה לאביו להרג את שבעים אחיו:

Segment 57
HE:
ואת כל רעת אנשי שכם השיב אלהים בראשם ותבא אליהם קללת יותם בן ירבעל: (פ)