Psalms Chapter 140

למנצח מזמור לדוד:

חלצני יהוה מאדם רע מאיש חמסים תנצרני:

אשר חשבו רעות בלב כל יום יגורו מלחמות:

שננו לשונם כמו נחש חמת עכשוב תחת שפתימו סלה:

שמרני יהוה מידי רשע מאיש חמסים תנצרני אשר חשבו לדחות פעמי:

טמנו גאים פח לי וחבלים פרשו רשת ליד מעגל מקשים שתו לי סלה:

אמרתי ליהוה אלי אתה האזינה יהוה קול תחנוני:

יהוה אדני עז ישועתי סכתה לראשי ביום נשק:

אל תתן יהוה מאויי רשע זממו אל תפק ירומו סלה:

ראש מסבי עמל שפתימו (יכסומו) יכסמו:

(ימיטו) ימוטו עליהם גחלים באש יפלם במהמרות בל יקומו:

איש לשון בל יכון בארץ איש חמס רע יצודנו למדחפת:

(ידעת) ידעתי כי יעשה יהוה דין עני משפט אבינים:

אך צדיקים יודו לשמך ישבו ישרים את פניך: (פ)