Psalms Chapter 26

לדוד שפטני יהוה כי אני בתמי הלכתי וביהוה בטחתי לא אמעד:

בחנני יהוה ונסני (צרופה) צרפה כליותי ולבי:

כי חסדך לנגד עיני והתהלכתי באמתך:

לא ישבתי עם מתי שוא ועם נעלמים לא אבוא:

שנאתי קהל מרעים ועם רשעים לא אשב:

ארחץ בנקיון כפי ואסבבה את מזבחך יהוה:

לשמע בקול תודה ולספר כל נפלאותיך:

יהוה אהבתי מעון ביתך ומקום משכן כבודך:

אל תאסף עם חטאים נפשי ועם אנשי דמים חיי:

אשר בידיהם זמה וימינם מלאה שחד:

ואני בתמי אלך פדני וחנני:

רגלי עמדה במישור במקהלים אברך יהוה: (פ)