Psalms Chapter 42
תהלים פרק מב
Source: https://ajew.org/reader/tanach-tehillim/1/42

Segment 1
HE:
למנצח משכיל לבני קרח:

Segment 2
HE:
כאיל תערג על אפיקי מים כן נפשי תערג אליך אלהים:

Segment 3
HE:
צמאה נפשי לאלהים לאל חי מתי אבוא ואראה פני אלהים:

Segment 4
HE:
היתה לי דמעתי לחם יומם ולילה באמר אלי כל היום איה אלהיך:

Segment 5
HE:
אלה אזכרה ואשפכה עלי נפשי כי אעבר בסך אדדם עד בית אלהים בקול רנה ותודה המון חוגג:

Segment 6
HE:
מה תשתוחחי נפשי ותהמי עלי הוחילי לאלהים כי עוד אודנו ישועות פניו:

Segment 7
HE:
אלהי עלי נפשי תשתוחח על כן אזכרך מארץ ירדן וחרמונים מהר מצער:

Segment 8
HE:
תהום אל תהום קורא לקול צנוריך כל משבריך וגליך עלי עברו:

Segment 9
HE:
יומם יצוה יהוה חסדו ובלילה (שירה) שירו עמי תפלה לאל חיי:

Segment 10
HE:
אומרה לאל סלעי למה שכחתני למה קדר אלך בלחץ אויב:

Segment 11
HE:
ברצח בעצמותי חרפוני צוררי באמרם אלי כל היום איה אלהיך:

Segment 12
HE:
מה תשתוחחי נפשי ומה תהמי עלי הוחילי לאלהים כי עוד אודנו ישועת פני ואלהי: (פ)