Psalms Chapter 56

למנצח על יונת אלם רחקים לדוד מכתם באחז אתו פלשתים בגת:

חנני אלהים כי שאפני אנוש כל היום לחם ילחצני:

שאפו שוררי כל היום כי רבים לחמים לי מרום:

יום אירא אני אליך אבטח:

באלהים אהלל דברו באלהים בטחתי לא אירא מה יעשה בשר לי:

כל היום דברי יעצבו עלי כל מחשבתם לרע:

יגורו (יצפינו) יצפונו המה עקבי ישמרו כאשר קוו נפשי:

על און פלט למו באף עמים הורד אלהים:

נדי ספרתה אתה שימה דמעתי בנאדך הלא בספרתך:

אז ישובו אויבי אחור ביום אקרא זה ידעתי כי אלהים לי:

באלהים אהלל דבר ביהוה אהלל דבר:

באלהים בטחתי לא אירא מה יעשה אדם לי:

עלי אלהים נדריך אשלם תודת לך:

כי הצלת נפשי ממות הלא רגלי מדחי להתהלך לפני אלהים באור החיים: (פ)