Psalms Chapter 81

למנצח על הגתית לאסף:

הרנינו לאלהים עוזנו הריעו לאלהי יעקב:

שאו זמרה ותנו תף כנור נעים עם נבל:

תקעו בחדש שופר בכסה ליום חגנו:

כי חק לישראל הוא משפט לאלהי יעקב:

עדות ביהוסף שמו בצאתו על ארץ מצרים שפת לא ידעתי אשמע:

הסירותי מסבל שכמו כפיו מדוד תעברנה:

בצרה קראת ואחלצך אענך בסתר רעם אבחנך על מי מריבה סלה:

שמע עמי ואעידה בך ישראל אם תשמע לי:

לא יהיה בך אל זר ולא תשתחוה לאל נכר:

אנכי יהוה אלהיך המעלך מארץ מצרים הרחב פיך ואמלאהו:

ולא שמע עמי לקולי וישראל לא אבה לי:

ואשלחהו בשרירות לבם ילכו במועצותיהם:

לו עמי שמע לי ישראל בדרכי יהלכו:

כמעט אויביהם אכניע ועל צריהם אשיב ידי:

משנאי יהוה יכחשו לו ויהי עתם לעולם:

ויאכילהו מחלב חטה ומצור דבש אשביעך: (פ)