Zephaniah Chapter 2
צפניה פרק ב
Source: https://ajew.org/reader/tanach-tzefanya/1/2

Segment 1
HE:
התקוששו וקושו הגוי לא נכסף:

Segment 2
HE:
בטרם לדת חק כמץ עבר יום בטרם לא יבוא עליכם חרון אף יהוה בטרם לא יבוא עליכם יום אף יהוה:

Segment 3
HE:
בקשו את יהוה כל ענוי הארץ אשר משפטו פעלו בקשו צדק בקשו ענוה אולי תסתרו ביום אף יהוה:

Segment 4
HE:
כי עזה עזובה תהיה ואשקלון לשממה אשדוד בצהרים יגרשוה ועקרון תעקר: (ס)

Segment 5
HE:
הוי ישבי חבל הים גוי כרתים דבר יהוה עליכם כנען ארץ פלשתים והאבדתיך מאין יושב:

Segment 6
HE:
והיתה חבל הים נות כרת רעים וגדרות צאן:

Segment 7
HE:
והיה חבל לשארית בית יהודה עליהם ירעון בבתי אשקלון בערב ירבצון כי יפקדם יהוה אלהיהם ושב (שבותם) שביתם:

Segment 8
HE:
שמעתי חרפת מואב וגדופי בני עמון אשר חרפו את עמי ויגדילו על גבולם:

Segment 9
HE:
לכן חי אני נאם יהוה צבאות אלהי ישראל כי מואב כסדם תהיה ובני עמון כעמרה ממשק חרול ומכרה מלח ושממה עד עולם שארית עמי יבזום ויתר (גוי) גויי ינחלום:

Segment 10
HE:
זאת להם תחת גאונם כי חרפו ויגדלו על עם יהוה צבאות:

Segment 11
HE:
נורא יהוה עליהם כי רזה את כל אלהי הארץ וישתחוו לו איש ממקומו כל איי הגוים:

Segment 12
HE:
גם אתם כושים חללי חרבי המה:

Segment 13
HE:
ויט ידו על צפון ויאבד את אשור וישם את נינוה לשממה ציה כמדבר:

Segment 14
HE:
ורבצו בתוכה עדרים כל חיתו גוי גם קאת גם קפד בכפתריה ילינו קול ישורר בחלון חרב בסף כי ארזה ערה:

Segment 15
HE:
זאת העיר העליזה היושבת לבטח האמרה בלבבה אני ואפסי עוד איך היתה לשמה מרבץ לחיה כל עובר עליה ישרק יניע ידו: (פ)