Leviticus Chapter 16
ויקרא פרק טז
Source: https://ajew.org/reader/tanach-vayikra/1/16

Segment 1
HE:
וידבר יהוה אל משה אחרי מות שני בני אהרן בקרבתם לפני יהוה וימתו:

Segment 2
HE:
ויאמר יהוה אל משה דבר אל אהרן אחיך ואל יבא בכל עת אל הקדש מבית לפרכת אל פני הכפרת אשר על הארן ולא ימות כי בענן אראה על הכפרת:

Segment 3
HE:
בזאת יבא אהרן אל הקדש בפר בן בקר לחטאת ואיל לעלה:

Segment 4
HE:
כתנת בד קדש ילבש ומכנסי בד יהיו על בשרו ובאבנט בד יחגר ובמצנפת בד יצנף בגדי קדש הם ורחץ במים את בשרו ולבשם:

Segment 5
HE:
ומאת עדת בני ישראל יקח שני שעירי עזים לחטאת ואיל אחד לעלה:

Segment 6
HE:
והקריב אהרן את פר החטאת אשר לו וכפר בעדו ובעד ביתו:

Segment 7
HE:
ולקח את שני השעירם והעמיד אתם לפני יהוה פתח אהל מועד:

Segment 8
HE:
ונתן אהרן על שני השעירם גרלות גורל אחד ליהוה וגורל אחד לעזאזל:

Segment 9
HE:
והקריב אהרן את השעיר אשר עלה עליו הגורל ליהוה ועשהו חטאת:

Segment 10
HE:
והשעיר אשר עלה עליו הגורל לעזאזל יעמד חי לפני יהוה לכפר עליו לשלח אתו לעזאזל המדברה:

Segment 11
HE:
והקריב אהרן את פר החטאת אשר לו וכפר בעדו ובעד ביתו ושחט את פר החטאת אשר לו:

Segment 12
HE:
ולקח מלא המחתה גחלי אש מעל המזבח מלפני יהוה ומלא חפניו קטרת סמים דקה והביא מבית לפרכת:

Segment 13
HE:
ונתן את הקטרת על האש לפני יהוה וכסה ענן הקטרת את הכפרת אשר על העדות ולא ימות:

Segment 14
HE:
ולקח מדם הפר והזה באצבעו על פני הכפרת קדמה ולפני הכפרת יזה שבע פעמים מן הדם באצבעו:

Segment 15
HE:
ושחט את שעיר החטאת אשר לעם והביא את דמו אל מבית לפרכת ועשה את דמו כאשר עשה לדם הפר והזה אתו על הכפרת ולפני הכפרת:

Segment 16
HE:
וכפר על הקדש מטמאת בני ישראל ומפשעיהם לכל חטאתם וכן יעשה לאהל מועד השכן אתם בתוך טמאתם:

Segment 17
HE:
וכל אדם לא יהיה באהל מועד בבאו לכפר בקדש עד צאתו וכפר בעדו ובעד ביתו ובעד כל קהל ישראל:

Segment 18
HE:
שני  ויצא אל המזבח אשר לפני יהוה וכפר עליו ולקח מדם הפר ומדם השעיר ונתן על קרנות המזבח סביב:

Segment 19
HE:
והזה עליו מן הדם באצבעו שבע פעמים וטהרו וקדשו מטמאת בני ישראל:

Segment 20
HE:
וכלה מכפר את הקדש ואת אהל מועד ואת המזבח והקריב את השעיר החי:

Segment 21
HE:
וסמך אהרן את שתי (ידו) ידיו על ראש השעיר החי והתודה עליו את כל עונת בני ישראל ואת כל פשעיהם לכל חטאתם ונתן אתם על ראש השעיר ושלח ביד איש עתי המדברה:

Segment 22
HE:
ונשא השעיר עליו את כל עונתם אל ארץ גזרה ושלח את השעיר במדבר:

Segment 23
HE:
ובא אהרן אל אהל מועד ופשט את בגדי הבד אשר לבש בבאו אל הקדש והניחם שם:

Segment 24
HE:
ורחץ את בשרו במים במקום קדוש ולבש את בגדיו ויצא ועשה את עלתו ואת עלת העם וכפר בעדו ובעד העם:

Segment 25
HE:
שלישי - שני במחוברין  ואת חלב החטאת יקטיר המזבחה:

Segment 26
HE:
והמשלח את השעיר לעזאזל יכבס בגדיו ורחץ את בשרו במים ואחרי כן יבוא אל המחנה:

Segment 27
HE:
ואת פר החטאת ואת שעיר החטאת אשר הובא את דמם לכפר בקדש יוציא אל מחוץ למחנה ושרפו באש את ערתם ואת בשרם ואת פרשם:

Segment 28
HE:
והשרף אתם יכבס בגדיו ורחץ את בשרו במים ואחרי כן יבוא אל המחנה:

Segment 29
HE:
והיתה לכם לחקת עולם בחדש השביעי בעשור לחדש תענו את נפשתיכם וכל מלאכה לא תעשו האזרח והגר הגר בתוככם:

Segment 30
HE:
כי ביום הזה יכפר עליכם לטהר אתכם מכל חטאתיכם לפני יהוה תטהרו:

Segment 31
HE:
שבת שבתון היא לכם ועניתם את נפשתיכם חקת עולם:

Segment 32
HE:
וכפר הכהן אשר ימשח אתו ואשר ימלא את ידו לכהן תחת אביו ולבש את בגדי הבד בגדי הקדש:

Segment 33
HE:
וכפר את מקדש הקדש ואת אהל מועד ואת המזבח יכפר ועל הכהנים ועל כל עם הקהל יכפר:

Segment 34
HE:
והיתה זאת לכם לחקת עולם לכפר על בני ישראל מכל חטאתם אחת בשנה ויעש כאשר צוה יהוה את משה: (פ)