Ezekiel Chapter 14
יחזקאל פרק יד
Source: https://ajew.org/reader/tanach-yechezkel/1/14

Segment 1
HE:
ויבוא אלי אנשים מזקני ישראל וישבו לפני: (פ)

Segment 2
HE:
ויהי דבר יהוה אלי לאמר:

Segment 3
HE:
בן אדם האנשים האלה העלו גלוליהם על לבם ומכשול עונם נתנו נכח פניהם האדרש אדרש להם: (ס)

Segment 4
HE:
לכן דבר אותם ואמרת אליהם כה אמר אדני יהוה איש איש מבית ישראל אשר יעלה את גלוליו אל לבו ומכשול עונו ישים נכח פניו ובא אל הנביא אני יהוה נעניתי לו (בה) בא ברב גלוליו:

Segment 5
HE:
למען תפש את בית ישראל בלבם אשר נזרו מעלי בגלוליהם כלם: (ס)

Segment 6
HE:
לכן אמר אל בית ישראל כה אמר אדני יהוה שובו והשיבו מעל גלוליכם ומעל כל תועבתיכם השיבו פניכם:

Segment 7
HE:
כי איש איש מבית ישראל ומהגר אשר יגור בישראל וינזר מאחרי ויעל גלוליו אל לבו ומכשול עונו ישים נכח פניו ובא אל הנביא לדרש לו בי אני יהוה נענה לו בי:

Segment 8
HE:
ונתתי פני באיש ההוא והשמתיהו לאות ולמשלים והכרתיו מתוך עמי וידעתם כי אני יהוה: (ס)

Segment 9
HE:
והנביא כי יפתה ודבר דבר אני יהוה פתיתי את הנביא ההוא ונטיתי את ידי עליו והשמדתיו מתוך עמי ישראל:

Segment 10
HE:
ונשאו עונם כעון הדרש כעון הנביא יהיה:

Segment 11
HE:
למען לא יתעו עוד בית ישראל מאחרי ולא יטמאו עוד בכל פשעיהם והיו לי לעם ואני אהיה להם לאלהים נאם אדני יהוה: (פ)

Segment 12
HE:
ויהי דבר יהוה אלי לאמר:

Segment 13
HE:
בן אדם ארץ כי תחטא לי למעל מעל ונטיתי ידי עליה ושברתי לה מטה לחם והשלחתי בה רעב והכרתי ממנה אדם ובהמה:

Segment 14
HE:
והיו שלשת האנשים האלה בתוכה נח (דנאל) דניאל ואיוב המה בצדקתם ינצלו נפשם נאם אדני יהוה:

Segment 15
HE:
לו חיה רעה אעביר בארץ ושכלתה והיתה שממה מבלי עובר מפני החיה:

Segment 16
HE:
שלשת האנשים האלה בתוכה חי אני נאם אדני יהוה אם בנים ואם בנות יצילו המה לבדם ינצלו והארץ תהיה שממה:

Segment 17
HE:
או חרב אביא על הארץ ההיא ואמרתי חרב תעבר בארץ והכרתי ממנה אדם ובהמה:

Segment 18
HE:
ושלשת האנשים האלה בתוכה חי אני נאם אדני יהוה לא יצילו בנים ובנות כי הם לבדם ינצלו:

Segment 19
HE:
או דבר אשלח אל הארץ ההיא ושפכתי חמתי עליה בדם להכרית ממנה אדם ובהמה:

Segment 20
HE:
ונח (דנאל) דניאל ואיוב בתוכה חי אני נאם אדני יהוה אם בן אם בת יצילו המה בצדקתם יצילו נפשם: (פ)

Segment 21
HE:
כי כה אמר אדני יהוה אף כי ארבעת שפטי הרעים חרב ורעב וחיה רעה ודבר שלחתי אל ירושלם להכרית ממנה אדם ובהמה:

Segment 22
HE:
והנה נותרה בה פלטה המוצאים בנים ובנות הנם יוצאים אליכם וראיתם את דרכם ואת עלילותם ונחמתם על הרעה אשר הבאתי על ירושלם את כל אשר הבאתי עליה:

Segment 23
HE:
ונחמו אתכם כי תראו את דרכם ואת עלילותם וידעתם כי לא חנם עשיתי את כל אשר עשיתי בה נאם אדני יהוה: (פ)