Ezekiel Chapter 16
יחזקאל פרק טז
Source: https://ajew.org/reader/tanach-yechezkel/1/16

Segment 1
HE:
ויהי דבר יהוה אלי לאמר:

Segment 2
HE:
בן אדם הודע את ירושלם את תועבתיה:

Segment 3
HE:
ואמרת כה אמר אדני יהוה לירושלם מכרתיך ומלדתיך מארץ הכנעני אביך האמרי ואמך חתית:

Segment 4
HE:
ומולדותיך ביום הולדת אתך לא כרת שרך ובמים לא רחצת למשעי והמלח לא המלחת והחתל לא חתלת:

Segment 5
HE:
לא חסה עליך עין לעשות לך אחת מאלה לחמלה עליך ותשלכי אל פני השדה בגעל נפשך ביום הלדת אתך:

Segment 6
HE:
ואעבר עליך ואראך מתבוססת בדמיך ואמר לך בדמיך חיי ואמר לך בדמיך חיי:

Segment 7
HE:
רבבה כצמח השדה נתתיך ותרבי ותגדלי ותבאי בעדי עדיים שדים נכנו ושערך צמח ואת ערם ועריה:

Segment 8
HE:
ואעבר עליך ואראך והנה עתך עת דדים ואפרש כנפי עליך ואכסה ערותך ואשבע לך ואבוא בברית אתך נאם אדני יהוה ותהיי לי:

Segment 9
HE:
וארחצך במים ואשטף דמיך מעליך ואסכך בשמן:

Segment 10
HE:
ואלבישך רקמה ואנעלך תחש ואחבשך בשש ואכסך משי:

Segment 11
HE:
ואעדך עדי ואתנה צמידים על ידיך ורביד על גרונך:

Segment 12
HE:
ואתן נזם על אפך ועגילים על אזניך ועטרת תפארת בראשך:

Segment 13
HE:
ותעדי זהב וכסף ומלבושך (ששי) שש ומשי ורקמה סלת ודבש ושמן (אכלתי) אכלת ותיפי במאד מאד ותצלחי למלוכה:

Segment 14
HE:
ויצא לך שם בגוים ביפיך כי כליל הוא בהדרי אשר שמתי עליך נאם אדני יהוה:

Segment 15
HE:
ותבטחי ביפיך ותזני על שמך ותשפכי את תזנותיך על כל עובר לו יהי:

Segment 16
HE:
ותקחי מבגדיך ותעשי לך במות טלאות ותזני עליהם לא באות ולא יהיה:

Segment 17
HE:
ותקחי כלי תפארתך מזהבי ומכספי אשר נתתי לך ותעשי לך צלמי זכר ותזני בם:

Segment 18
HE:
ותקחי את בגדי רקמתך ותכסים ושמני וקטרתי (נתתי) נתת לפניהם:

Segment 19
HE:
ולחמי אשר נתתי לך סלת ושמן ודבש האכלתיך ונתתיהו לפניהם לריח ניחח ויהי נאם אדני יהוה:

Segment 20
HE:
ותקחי את בניך ואת בנותיך אשר ילדת לי ותזבחים להם לאכול המעט (מתזנתך) מתזנותיך:

Segment 21
HE:
ותשחטי את בני ותתנים בהעביר אותם להם:

Segment 22
HE:
ואת כל תועבתיך ותזנתיך לא (זכרתי) זכרת את ימי נעוריך בהיותך ערם ועריה מתבוססת בדמך היית:

Segment 23
HE:
ויהי אחרי כל רעתך אוי אוי לך נאם אדני יהוה:

Segment 24
HE:
ותבני לך גב ותעשי לך רמה בכל רחוב:

Segment 25
HE:
אל כל ראש דרך בנית רמתך ותתעבי את יפיך ותפשקי את רגליך לכל עובר ותרבי את (תזנתך) תזנותיך:

Segment 26
HE:
ותזני אל בני מצרים שכניך גדלי בשר ותרבי את תזנתך להכעיסני:

Segment 27
HE:
והנה נטיתי ידי עליך ואגרע חקך ואתנך בנפש שנאותיך בנות פלשתים הנכלמות מדרכך זמה:

Segment 28
HE:
ותזני אל בני אשור מבלתי שבעתך ותזנים וגם לא שבעת:

Segment 29
HE:
ותרבי את תזנותך אל ארץ כנען כשדימה וגם בזאת לא שבעת:

Segment 30
HE:
מה אמלה לבתך נאם אדני יהוה בעשותך את כל אלה מעשה אשה זונה שלטת:

Segment 31
HE:
בבנותיך גבך בראש כל דרך ורמתך (עשיתי) עשית בכל רחוב ולא (הייתי) היית כזונה לקלס אתנן:

Segment 32
HE:
האשה המנאפת תחת אישה תקח את זרים:

Segment 33
HE:
לכל זנות יתנו נדה ואת נתת את נדניך לכל מאהביך ותשחדי אותם לבוא אליך מסביב בתזנותיך:

Segment 34
HE:
ויהי בך הפך מן הנשים בתזנותיך ואחריך לא זונה ובתתך אתנן ואתנן לא נתן לך ותהי להפך:

Segment 35
HE:
לכן זונה שמעי דבר יהוה: (פ)

Segment 36
HE:
כה אמר אדני יהוה יען השפך נחשתך ותגלה ערותך בתזנותיך על מאהביך ועל כל גלולי תועבותיך וכדמי בניך אשר נתת להם:

Segment 37
HE:
לכן הנני מקבץ את כל מאהביך אשר ערבת עליהם ואת כל אשר אהבת על כל אשר שנאת וקבצתי אתם עליך מסביב וגליתי ערותך אלהם וראו את כל ערותך:

Segment 38
HE:
ושפטתיך משפטי נאפות ושפכת דם ונתתיך דם חמה וקנאה:

Segment 39
HE:
ונתתי אותך בידם והרסו גבך ונתצו רמתיך והפשיטו אותך בגדיך ולקחו כלי תפארתך והניחוך עירם ועריה:

Segment 40
HE:
והעלו עליך קהל ורגמו אותך באבן ובתקוך בחרבותם:

Segment 41
HE:
ושרפו בתיך באש ועשו בך שפטים לעיני נשים רבות והשבתיך מזונה וגם אתנן לא תתני עוד:

Segment 42
HE:
והנחתי חמתי בך וסרה קנאתי ממך ושקטתי ולא אכעס עוד:

Segment 43
HE:
יען אשר לא (זכרתי) זכרת את ימי נעוריך ותרגזי לי בכל אלה וגם אני הא דרכך בראש נתתי נאם אדני יהוה ולא (עשיתי) עשית את הזמה על כל תועבתיך:

Segment 44
HE:
הנה כל המשל עליך ימשל לאמר כאמה בתה:

Segment 45
HE:
בת אמך את געלת אישה ובניה ואחות אחותך את אשר געלו אנשיהן ובניהן אמכן חתית ואביכן אמרי:

Segment 46
HE:
ואחותך הגדולה שמרון היא ובנותיה היושבת על שמאולך ואחותך הקטנה ממך היושבת מימינך סדם ובנותיה:

Segment 47
HE:
ולא בדרכיהן הלכת ובתועבותיהן (עשיתי) עשית כמעט קט ותשחתי מהן בכל דרכיך:

Segment 48
HE:
חי אני נאם אדני יהוה אם עשתה סדם אחותך היא ובנותיה כאשר עשית את ובנותיך:

Segment 49
HE:
הנה זה היה עון סדם אחותך גאון שבעת לחם ושלות השקט היה לה ולבנותיה ויד עני ואביון לא החזיקה:

Segment 50
HE:
ותגבהינה ותעשינה תועבה לפני ואסיר אתהן כאשר ראיתי: (ס)

Segment 51
HE:
ושמרון כחצי חטאתיך לא חטאה ותרבי את תועבותיך מהנה ותצדקי את (אחותך) אחותיך בכל תועבותיך אשר (עשיתי) עשית:

Segment 52
HE:
גם את שאי כלמתך אשר פללת לאחותך בחטאתיך אשר התעבת מהן תצדקנה ממך וגם את בושי ושאי כלמתך בצדקתך אחיותך:

Segment 53
HE:
ושבתי את שביתהן את (שבית) שבות סדם ובנותיה ואת (שבית) שבות שמרון ובנותיה (ושבית) ושבות שביתיך בתוכהנה:

Segment 54
HE:
למען תשאי כלמתך ונכלמת מכל אשר עשית בנחמך אתן:

Segment 55
HE:
ואחותיך סדם ובנותיה תשבן לקדמתן ושמרון ובנותיה תשבן לקדמתן ואת ובנותיך תשבינה לקדמתכן:

Segment 56
HE:
ולוא היתה סדם אחותך לשמועה בפיך ביום גאוניך:

Segment 57
HE:
בטרם תגלה רעתך כמו עת חרפת בנות ארם וכל סביבותיה בנות פלשתים השאטות אותך מסביב:

Segment 58
HE:
את זמתך ואת תועבותיך את נשאתים נאם יהוה: (ס)

Segment 59
HE:
כי כה אמר אדני יהוה (ועשית) ועשיתי אותך כאשר עשית אשר בזית אלה להפר ברית:

Segment 60
HE:
וזכרתי אני את בריתי אותך בימי נעוריך והקמותי לך ברית עולם:

Segment 61
HE:
וזכרת את דרכיך ונכלמת בקחתך את אחותיך הגדלות ממך אל הקטנות ממך ונתתי אתהן לך לבנות ולא מבריתך:

Segment 62
HE:
והקימותי אני את בריתי אתך וידעת כי אני יהוה:

Segment 63
HE:
למען תזכרי ובשת ולא יהיה לך עוד פתחון פה מפני כלמתך בכפרי לך לכל אשר עשית נאם אדני יהוה: (פ)