Ezekiel Chapter 23
יחזקאל פרק כג
Source: https://ajew.org/reader/tanach-yechezkel/1/23

Segment 1
HE:
ויהי דבר יהוה אלי לאמר:

Segment 2
HE:
בן אדם שתים נשים בנות אם אחת היו:

Segment 3
HE:
ותזנינה במצרים בנעוריהן זנו שמה מעכו שדיהן ושם עשו דדי בתוליהן:

Segment 4
HE:
ושמותן אהלה הגדולה ואהליבה אחותה ותהיינה לי ותלדנה בנים ובנות ושמותן שמרון אהלה וירושלם אהליבה:

Segment 5
HE:
ותזן אהלה תחתי ותעגב על מאהביה אל אשור קרובים:

Segment 6
HE:
לבשי תכלת פחות וסגנים בחורי חמד כלם פרשים רכבי סוסים:

Segment 7
HE:
ותתן תזנותיה עליהם מבחר בני אשור כלם ובכל אשר עגבה בכל גלוליהם נטמאה:

Segment 8
HE:
ואת תזנותיה ממצרים לא עזבה כי אותה שכבו בנעוריה והמה עשו דדי בתוליה וישפכו תזנותם עליה:

Segment 9
HE:
לכן נתתיה ביד מאהביה ביד בני אשור אשר עגבה עליהם:

Segment 10
HE:
המה גלו ערותה בניה ובנותיה לקחו ואותה בחרב הרגו ותהי שם לנשים ושפוטים עשו בה: (ס)

Segment 11
HE:
ותרא אחותה אהליבה ותשחת עגבתה ממנה ואת תזנותיה מזנוני אחותה:

Segment 12
HE:
אל בני אשור עגבה פחות וסגנים קרבים לבשי מכלול פרשים רכבי סוסים בחורי חמד כלם:

Segment 13
HE:
וארא כי נטמאה דרך אחד לשתיהן:

Segment 14
HE:
ותוסף אל תזנותיה ותרא אנשי מחקה על הקיר צלמי (כשדיים) כשדים חקקים בששר:

Segment 15
HE:
חגורי אזור במתניהם סרוחי טבולים בראשיהם מראה שלשים כלם דמות בני בבל כשדים ארץ מולדתם:

Segment 16
HE:
(ותעגב) ותעגבה עליהם למראה עיניה ותשלח מלאכים אליהם כשדימה:

Segment 17
HE:
ויבאו אליה בני בבל למשכב דדים ויטמאו אותה בתזנותם ותטמא בם ותקע נפשה מהם:

Segment 18
HE:
ותגל תזנותיה ותגל את ערותה ותקע נפשי מעליה כאשר נקעה נפשי מעל אחותה:

Segment 19
HE:
ותרבה את תזנותיה לזכר את ימי נעוריה אשר זנתה בארץ מצרים:

Segment 20
HE:
ותעגבה על פלגשיהם אשר בשר חמורים בשרם וזרמת סוסים זרמתם:

Segment 21
HE:
ותפקדי את זמת נעוריך בעשות ממצרים דדיך למען שדי נעוריך: (ס)

Segment 22
HE:
לכן אהליבה כה אמר אדני יהוה הנני מעיר את מאהביך עליך את אשר נקעה נפשך מהם והבאתים עליך מסביב:

Segment 23
HE:
בני בבל וכל כשדים פקוד ושוע וקוע כל בני אשור אותם בחורי חמד פחות וסגנים כלם שלשים וקרואים רכבי סוסים כלם:

Segment 24
HE:
ובאו עליך הצן רכב וגלגל ובקהל עמים צנה ומגן וקובע ישימו עליך סביב ונתתי לפניהם משפט ושפטוך במשפטיהם:

Segment 25
HE:
ונתתי קנאתי בך ועשו אותך בחמה אפך ואזניך יסירו ואחריתך בחרב תפול המה בניך ובנותיך יקחו ואחריתך תאכל באש:

Segment 26
HE:
והפשיטוך את בגדיך ולקחו כלי תפארתך:

Segment 27
HE:
והשבתי זמתך ממך ואת זנותך מארץ מצרים ולא תשאי עיניך אליהם ומצרים לא תזכרי עוד: (פ)

Segment 28
HE:
כי כה אמר אדני יהוה הנני נתנך ביד אשר שנאת ביד אשר נקעה נפשך מהם:

Segment 29
HE:
ועשו אותך בשנאה ולקחו כל יגיעך ועזבוך עירם ועריה ונגלה ערות זנוניך וזמתך ותזנותיך:

Segment 30
HE:
עשה אלה לך בזנותך אחרי גוים על אשר נטמאת בגלוליהם:

Segment 31
HE:
בדרך אחותך הלכת ונתתי כוסה בידך: (ס)

Segment 32
HE:
כה אמר אדני יהוה כוס אחותך תשתי העמקה והרחבה תהיה לצחק וללעג מרבה להכיל:

Segment 33
HE:
שכרון ויגון תמלאי כוס שמה ושממה כוס אחותך שמרון:

Segment 34
HE:
ושתית אותה ומצית ואת חרשיה תגרמי ושדיך תנתקי כי אני דברתי נאם אדני יהוה: (ס)

Segment 35
HE:
לכן כה אמר אדני יהוה יען שכחת אותי ותשליכי אותי אחרי גוך וגם את שאי זמתך ואת תזנותיך: (ס)

Segment 36
HE:
ויאמר יהוה אלי בן אדם התשפוט את אהלה ואת אהליבה והגד להן את תועבותיהן:

Segment 37
HE:
כי נאפו ודם בידיהן ואת גלוליהן נאפו וגם את בניהן אשר ילדו לי העבירו להם לאכלה:

Segment 38
HE:
עוד זאת עשו לי טמאו את מקדשי ביום ההוא ואת שבתותי חללו:

Segment 39
HE:
ובשחטם את בניהם לגלוליהם ויבאו אל מקדשי ביום ההוא לחללו והנה כה עשו בתוך ביתי:

Segment 40
HE:
ואף כי תשלחנה לאנשים באים ממרחק אשר מלאך שלוח אליהם והנה באו לאשר רחצת כחלת עיניך ועדית עדי:

Segment 41
HE:
וישבת על מטה כבודה ושלחן ערוך לפניה וקטרתי ושמני שמת עליה:

Segment 42
HE:
וקול המון שלו בה ואל אנשים מרב אדם מובאים (סובאים) סבאים ממדבר ויתנו צמידים אל ידיהן ועטרת תפארת על ראשיהן:

Segment 43
HE:
ואמר לבלה נאופים (עת) עתה (יזנה) יזנו תזנותה והיא:

Segment 44
HE:
ויבוא אליה כבוא אל אשה זונה כן באו אל אהלה ואל אהליבה אשת הזמה:

Segment 45
HE:
ואנשים צדיקם המה ישפטו אותהם משפט נאפות ומשפט שפכות דם כי נאפת הנה ודם בידיהן: (ס)

Segment 46
HE:
כי כה אמר אדני יהוה העלה עליהם קהל ונתן אתהן לזעוה ולבז:

Segment 47
HE:
ורגמו עליהן אבן קהל וברא אותהן בחרבותם בניהם ובנותיהם יהרגו ובתיהן באש ישרפו:

Segment 48
HE:
והשבתי זמה מן הארץ ונוסרו כל הנשים ולא תעשינה כזמתכנה:

Segment 49
HE:
ונתנו זמתכנה עליכן וחטאי גלוליכן תשאינה וידעתם כי אני אדני יהוה: (פ)