Ezekiel Chapter 25
יחזקאל פרק כה
Source: https://ajew.org/reader/tanach-yechezkel/1/25

Segment 1
HE:
ויהי דבר יהוה אלי לאמר:

Segment 2
HE:
בן אדם שים פניך אל בני עמון והנבא עליהם:

Segment 3
HE:
ואמרת לבני עמון שמעו דבר אדני יהוה כה אמר אדני יהוה יען אמרך האח אל מקדשי כי נחל ואל אדמת ישראל כי נשמה ואל בית יהודה כי הלכו בגולה:

Segment 4
HE:
לכן הנני נתנך לבני קדם למורשה וישבו טירותיהם בך ונתנו בך משכניהם המה יאכלו פריך והמה ישתו חלבך:

Segment 5
HE:
ונתתי את רבה לנוה גמלים ואת בני עמון למרבץ צאן וידעתם כי אני יהוה: (פ)

Segment 6
HE:
כי כה אמר אדני יהוה יען מחאך יד ורקעך ברגל ותשמח בכל שאטך בנפש אל אדמת ישראל:

Segment 7
HE:
לכן הנני נטיתי את ידי עליך ונתתיך (לבג) לבז לגוים והכרתיך מן העמים והאבדתיך מן הארצות אשמידך וידעת כי אני יהוה: (פ)

Segment 8
HE:
כה אמר אדני יהוה יען אמר מואב ושעיר הנה ככל הגוים בית יהודה:

Segment 9
HE:
לכן הנני פתח את כתף מואב מהערים מעריו מקצהו צבי ארץ בית הישימת בעל מעון (וקריתמה) וקריתימה:

Segment 10
HE:
לבני קדם על בני עמון ונתתיה למורשה למען לא תזכר בני עמון בגוים:

Segment 11
HE:
ובמואב אעשה שפטים וידעו כי אני יהוה: (פ)

Segment 12
HE:
כה אמר אדני יהוה יען עשות אדום בנקם נקם לבית יהודה ויאשמו אשום ונקמו בהם:

Segment 13
HE:
לכן כה אמר אדני יהוה ונטתי ידי על אדום והכרתי ממנה אדם ובהמה ונתתיה חרבה מתימן ודדנה בחרב יפלו:

Segment 14
HE:
ונתתי את נקמתי באדום ביד עמי ישראל ועשו באדום כאפי וכחמתי וידעו את נקמתי נאם אדני יהוה:

Segment 15
HE:
כה אמר אדני יהוה יען עשות פלשתים בנקמה וינקמו נקם בשאט בנפש למשחית איבת עולם:

Segment 16
HE:
לכן כה אמר אדני יהוה הנני נוטה ידי על פלשתים והכרתי את כרתים והאבדתי את שארית חוף הים:

Segment 17
HE:
ועשיתי בם נקמות גדלות בתוכחות חמה וידעו כי אני יהוה בתתי את נקמתי בם: (פ)