Ezekiel Chapter 26
יחזקאל פרק כו
Source: https://ajew.org/reader/tanach-yechezkel/1/26

Segment 1
HE:
ויהי בעשתי עשרה שנה באחד לחדש היה דבר יהוה אלי לאמר:

Segment 2
HE:
בן אדם יען אשר אמרה צר על ירושלם האח נשברה דלתות העמים נסבה אלי אמלאה החרבה:

Segment 3
HE:
לכן כה אמר אדני יהוה הנני עליך צר והעליתי עליך גוים רבים כהעלות הים לגליו:

Segment 4
HE:
ושחתו חמות צר והרסו מגדליה וסחיתי עפרה ממנה ונתתי אותה לצחיח סלע:

Segment 5
HE:
משטח חרמים תהיה בתוך הים כי אני דברתי נאם אדני יהוה והיתה לבז לגוים:

Segment 6
HE:
ובנותיה אשר בשדה בחרב תהרגנה וידעו כי אני יהוה: (ס)

Segment 7
HE:
כי כה אמר אדני יהוה הנני מביא אל צר נבוכדראצר מלך בבל מצפון מלך מלכים בסוס וברכב ובפרשים וקהל ועם רב:

Segment 8
HE:
בנותיך בשדה בחרב יהרג ונתן עליך דיק ושפך עליך סללה והקים עליך צנה:

Segment 9
HE:
ומחי קבלו יתן בחמותיך ומגדלתיך יתץ בחרבותיו:

Segment 10
HE:
משפעת סוסיו יכסך אבקם מקול פרש וגלגל ורכב תרעשנה חומותיך בבאו בשעריך כמבואי עיר מבקעה:

Segment 11
HE:
בפרסות סוסיו ירמס את כל חוצותיך עמך בחרב יהרג ומצבות עזך לארץ תרד:

Segment 12
HE:
ושללו חילך ובזזו רכלתך והרסו חומותיך ובתי חמדתך יתצו ואבניך ועציך ועפרך בתוך מים ישימו:

Segment 13
HE:
והשבתי המון שיריך וקול כנוריך לא ישמע עוד:

Segment 14
HE:
ונתתיך לצחיח סלע משטח חרמים תהיה לא תבנה עוד כי אני יהוה דברתי נאם אדני יהוה: (ס)

Segment 15
HE:
כה אמר אדני יהוה לצור הלא מקול מפלתך באנק חלל בהרג הרג בתוכך ירעשו האיים:

Segment 16
HE:
וירדו מעל כסאותם כל נשיאי הים והסירו את מעיליהם ואת בגדי רקמתם יפשטו חרדות ילבשו על הארץ ישבו וחרדו לרגעים ושממו עליך:

Segment 17
HE:
ונשאו עליך קינה ואמרו לך איך אבדת נושבת מימים העיר ההללה אשר היתה חזקה בים היא וישביה אשר נתנו חתיתם לכל יושביה:

Segment 18
HE:
עתה יחרדו האין יום מפלתך ונבהלו האיים אשר בים מצאתך: (ס)

Segment 19
HE:
כי כה אמר אדני יהוה בתתי אתך עיר נחרבת כערים אשר לא נושבו בהעלות עליך את תהום וכסוך המים הרבים:

Segment 20
HE:
והורדתיך את יורדי בור אל עם עולם והושבתיך בארץ תחתיות כחרבות מעולם את יורדי בור למען לא תשבי ונתתי צבי בארץ חיים:

Segment 21
HE:
בלהות אתנך ואינך ותבקשי ולא תמצאי עוד לעולם נאם אדני יהוה: (פ)