Ezekiel Chapter 31
יחזקאל פרק לא
Source: https://ajew.org/reader/tanach-yechezkel/1/31

Segment 1
HE:
ויהי באחת עשרה שנה בשלישי באחד לחדש היה דבר יהוה אלי לאמר:

Segment 2
HE:
בן אדם אמר אל פרעה מלך מצרים ואל המונו אל מי דמית בגדלך:

Segment 3
HE:
הנה אשור ארז בלבנון יפה ענף וחרש מצל וגבה קומה ובין עבתים היתה צמרתו:

Segment 4
HE:
מים גדלוהו תהום רממתהו את נהרתיה הלך סביבות מטעה ואת תעלתיה שלחה אל כל עצי השדה:

Segment 5
HE:
על כן גבהא קמתו מכל עצי השדה ותרבינה סרעפתיו ותארכנה (פארתו) פארתיו ממים רבים בשלחו:

Segment 6
HE:
בסעפתיו קננו כל עוף השמים ותחת פארתיו ילדו כל חית השדה ובצלו ישבו כל גוים רבים:

Segment 7
HE:
וייף בגדלו בארך דליותיו כי היה שרשו אל מים רבים:

Segment 8
HE:
ארזים לא עממהו בגן אלהים ברושים לא דמו אל סעפתיו וערמנים לא היו כפארתיו כל עץ בגן אלהים לא דמה אליו ביפיו:

Segment 9
HE:
יפה עשיתיו ברב דליותיו ויקנאהו כל עצי עדן אשר בגן האלהים: (פ)

Segment 10
HE:
לכן כה אמר אדני יהוה יען אשר גבהת בקומה ויתן צמרתו אל בין עבותים ורם לבבו בגבהו:

Segment 11
HE:
ואתנהו ביד איל גוים עשו יעשה לו כרשעו גרשתהו:

Segment 12
HE:
ויכרתהו זרים עריצי גוים ויטשהו אל ההרים ובכל גאיות נפלו דליותיו ותשברנה פארתיו בכל אפיקי הארץ וירדו מצלו כל עמי הארץ ויטשהו:

Segment 13
HE:
על מפלתו ישכנו כל עוף השמים ואל פארתיו היו כל חית השדה:

Segment 14
HE:
למען אשר לא יגבהו בקומתם כל עצי מים ולא יתנו את צמרתם אל בין עבתים ולא יעמדו אליהם בגבהם כל שתי מים כי כלם נתנו למות אל ארץ תחתית בתוך בני אדם אל יורדי בור: (פ)

Segment 15
HE:
כה אמר אדני יהוה ביום רדתו שאולה האבלתי כסתי עליו את תהום ואמנע נהרותיה ויכלאו מים רבים ואקדר עליו לבנון וכל עצי השדה עליו עלפה:

Segment 16
HE:
מקול מפלתו הרעשתי גוים בהורדי אתו שאולה את יורדי בור וינחמו בארץ תחתית כל עצי עדן מבחר וטוב לבנון כל שתי מים:

Segment 17
HE:
גם הם אתו ירדו שאולה אל חללי חרב וזרעו ישבו בצלו בתוך גוים:

Segment 18
HE:
אל מי דמית ככה בכבוד ובגדל בעצי עדן והורדת את עצי עדן אל ארץ תחתית בתוך ערלים תשכב את חללי חרב הוא פרעה וכל המונה נאם אדני יהוה: (פ)