Ezekiel Chapter 32
יחזקאל פרק לב
Source: https://ajew.org/reader/tanach-yechezkel/1/32

Segment 1
HE:
ויהי בשתי עשרה שנה בשני עשר חדש באחד לחדש היה דבר יהוה אלי לאמר:

Segment 2
HE:
בן אדם שא קינה על פרעה מלך מצרים ואמרת אליו כפיר גוים נדמית ואתה כתנים בימים ותגח בנהרותיך ותדלח מים ברגליך ותרפס נהרותם: (ס)

Segment 3
HE:
כה אמר אדני יהוה ופרשתי עליך את רשתי בקהל עמים רבים והעלוך בחרמי:

Segment 4
HE:
ונטשתיך בארץ על פני השדה אטילך והשכנתי עליך כל עוף השמים והשבעתי ממך חית כל הארץ:

Segment 5
HE:
ונתתי את בשרך על ההרים ומלאתי הגאיות רמותך:

Segment 6
HE:
והשקיתי ארץ צפתך מדמך אל ההרים ואפקים ימלאון ממך:

Segment 7
HE:
וכסיתי בכבותך שמים והקדרתי את ככביהם שמש בענן אכסנו וירח לא יאיר אורו:

Segment 8
HE:
כל מאורי אור בשמים אקדירם עליך ונתתי חשך על ארצך נאם אדני יהוה:

Segment 9
HE:
והכעסתי לב עמים רבים בהביאי שברך בגוים על ארצות אשר לא ידעתם:

Segment 10
HE:
והשמותי עליך עמים רבים ומלכיהם ישערו עליך שער בעופפי חרבי על פניהם וחרדו לרגעים איש לנפשו ביום מפלתך: (פ)

Segment 11
HE:
כי כה אמר אדני יהוה חרב מלך בבל תבואך:

Segment 12
HE:
בחרבות גבורים אפיל המונך עריצי גוים כלם ושדדו את גאון מצרים ונשמד כל המונה:

Segment 13
HE:
והאבדתי את כל בהמתה מעל מים רבים ולא תדלחם רגל אדם עוד ופרסות בהמה לא תדלחם:

Segment 14
HE:
אז אשקיע מימיהם ונהרותם כשמן אוליך נאם אדני יהוה:

Segment 15
HE:
בתתי את ארץ מצרים שממה ונשמה ארץ ממלאה בהכותי את כל יושבי בה וידעו כי אני יהוה:

Segment 16
HE:
קינה היא וקוננוה בנות הגוים תקוננה אותה על מצרים ועל כל המונה תקוננה אותה נאם אדני יהוה: (פ)

Segment 17
HE:
ויהי בשתי עשרה שנה בחמשה עשר לחדש היה דבר יהוה אלי לאמר:

Segment 18
HE:
בן אדם נהה על המון מצרים והורדהו אותה ובנות גוים אדרם אל ארץ תחתיות את יורדי בור:

Segment 19
HE:
ממי נעמת רדה והשכבה את ערלים:

Segment 20
HE:
בתוך חללי חרב יפלו חרב נתנה משכו אותה וכל המוניה:

Segment 21
HE:
ידברו לו אלי גבורים מתוך שאול את עזריו ירדו שכבו הערלים חללי חרב:

Segment 22
HE:
שם אשור וכל קהלה סביבותיו קברתיו כלם חללים הנפלים בחרב:

Segment 23
HE:
אשר נתנו קברתיה בירכתי בור ויהי קהלה סביבות קברתה כלם חללים נפלים בחרב אשר נתנו חתית בארץ חיים:

Segment 24
HE:
שם עילם וכל המונה סביבות קברתה כלם חללים הנפלים בחרב אשר ירדו ערלים אל ארץ תחתיות אשר נתנו חתיתם בארץ חיים וישאו כלמתם את יורדי בור:

Segment 25
HE:
בתוך חללים נתנו משכב לה בכל המונה סביבותיו קברתה כלם ערלים חללי חרב כי נתן חתיתם בארץ חיים וישאו כלמתם את יורדי בור בתוך חללים נתן:

Segment 26
HE:
שם משך תבל וכל המונה סביבותיו קברותיה כלם ערלים מחללי חרב כי נתנו חתיתם בארץ חיים:

Segment 27
HE:
ולא ישכבו את גבורים נפלים מערלים אשר ירדו שאול בכלי מלחמתם ויתנו את חרבותם תחת ראשיהם ותהי עונתם על עצמותם כי חתית גבורים בארץ חיים:

Segment 28
HE:
ואתה בתוך ערלים תשבר ותשכב את חללי חרב:

Segment 29
HE:
שמה אדום מלכיה וכל נשיאיה אשר נתנו בגבורתם את חללי חרב המה את ערלים ישכבו ואת ירדי בור:

Segment 30
HE:
שמה נסיכי צפון כלם וכל צדני אשר ירדו את חללים בחתיתם מגבורתם בושים וישכבו ערלים את חללי חרב וישאו כלמתם את יורדי בור:

Segment 31
HE:
אותם יראה פרעה ונחם על כל (המונה) המונו חללי חרב פרעה וכל חילו נאם אדני יהוה:

Segment 32
HE:
כי נתתי את (חתיתו) חתיתי בארץ חיים והשכב בתוך ערלים את חללי חרב פרעה וכל המונה נאם אדני יהוה: (פ)