Ezekiel Chapter 36
יחזקאל פרק לו
Source: https://ajew.org/reader/tanach-yechezkel/1/36

Segment 1
HE:
ואתה בן אדם הנבא אל הרי ישראל ואמרת הרי ישראל שמעו דבר יהוה:

Segment 2
HE:
כה אמר אדני יהוה יען אמר האויב עליכם האח ובמות עולם למורשה היתה לנו:

Segment 3
HE:
לכן הנבא ואמרת כה אמר אדני יהוה יען ביען שמות ושאף אתכם מסביב להיותכם מורשה לשארית הגוים ותעלו על שפת לשון ודבת עם:

Segment 4
HE:
לכן הרי ישראל שמעו דבר אדני יהוה כה אמר אדני יהוה להרים ולגבעות לאפיקים ולגאיות ולחרבות השממות ולערים הנעזבות אשר היו לבז וללעג לשארית הגוים אשר מסביב:

Segment 5
HE:
לכן כה אמר אדני יהוה אם לא באש קנאתי דברתי על שארית הגוים ועל אדום כלא אשר נתנו את ארצי להם למורשה בשמחת כל לבב בשאט נפש למען מגרשה לבז:

Segment 6
HE:
לכן הנבא על אדמת ישראל ואמרת להרים ולגבעות לאפיקים ולגאיות כה אמר אדני יהוה הנני בקנאתי ובחמתי דברתי יען כלמת גוים נשאתם:

Segment 7
HE:
לכן כה אמר אדני יהוה אני נשאתי את ידי אם לא הגוים אשר לכם מסביב המה כלמתם ישאו:

Segment 8
HE:
ואתם הרי ישראל ענפכם תתנו ופריכם תשאו לעמי ישראל כי קרבו לבוא:

Segment 9
HE:
כי הנני אליכם ופניתי אליכם ונעבדתם ונזרעתם:

Segment 10
HE:
והרביתי עליכם אדם כל בית ישראל כלה ונשבו הערים והחרבות תבנינה:

Segment 11
HE:
והרביתי עליכם אדם ובהמה ורבו ופרו והושבתי אתכם כקדמותיכם והטבתי מראשתיכם וידעתם כי אני יהוה:

Segment 12
HE:
והולכתי עליכם אדם את עמי ישראל וירשוך והיית להם לנחלה ולא תוסף עוד לשכלם: (ס)

Segment 13
HE:
כה אמר אדני יהוה יען אמרים לכם אכלת אדם (אתי) את ומשכלת (גויך) גוייך היית:

Segment 14
HE:
לכן אדם לא תאכלי עוד (וגויך) וגוייך לא (תכשלי) תשכלי עוד נאם אדני יהוה:

Segment 15
HE:
ולא אשמיע אליך עוד כלמת הגוים וחרפת עמים לא תשאי עוד (וגויך) וגוייך לא תכשלי עוד נאם אדני יהוה: (פ)

Segment 16
HE:
ויהי דבר יהוה אלי לאמר:

Segment 17
HE:
בן אדם בית ישראל ישבים על אדמתם ויטמאו אותה בדרכם ובעלילותם כטמאת הנדה היתה דרכם לפני:

Segment 18
HE:
ואשפך חמתי עליהם על הדם אשר שפכו על הארץ ובגלוליהם טמאוה:

Segment 19
HE:
ואפיץ אתם בגוים ויזרו בארצות כדרכם וכעלילותם שפטתים:

Segment 20
HE:
ויבוא אל הגוים אשר באו שם ויחללו את שם קדשי באמר להם עם יהוה אלה ומארצו יצאו:

Segment 21
HE:
ואחמל על שם קדשי אשר חללוהו בית ישראל בגוים אשר באו שמה: (פ)

Segment 22
HE:
לכן אמר לבית ישראל כה אמר אדני יהוה לא למענכם אני עשה בית ישראל כי אם לשם קדשי אשר חללתם בגוים אשר באתם שם:

Segment 23
HE:
וקדשתי את שמי הגדול המחלל בגוים אשר חללתם בתוכם וידעו הגוים כי אני יהוה נאם אדני יהוה בהקדשי בכם לעיניהם:

Segment 24
HE:
ולקחתי אתכם מן הגוים וקבצתי אתכם מכל הארצות והבאתי אתכם אל אדמתכם:

Segment 25
HE:
וזרקתי עליכם מים טהורים וטהרתם מכל טמאותיכם ומכל גלוליכם אטהר אתכם:

Segment 26
HE:
ונתתי לכם לב חדש ורוח חדשה אתן בקרבכם והסרתי את לב האבן מבשרכם ונתתי לכם לב בשר:

Segment 27
HE:
ואת רוחי אתן בקרבכם ועשיתי את אשר בחקי תלכו ומשפטי תשמרו ועשיתם:

Segment 28
HE:
וישבתם בארץ אשר נתתי לאבתיכם והייתם לי לעם ואנכי אהיה לכם לאלהים:

Segment 29
HE:
והושעתי אתכם מכל טמאותיכם וקראתי אל הדגן והרביתי אתו ולא אתן עליכם רעב:

Segment 30
HE:
והרביתי את פרי העץ ותנובת השדה למען אשר לא תקחו עוד חרפת רעב בגוים:

Segment 31
HE:
וזכרתם את דרכיכם הרעים ומעלליכם אשר לא טובים ונקטתם בפניכם על עונתיכם ועל תועבותיכם:

Segment 32
HE:
לא למענכם אני עשה נאם אדני יהוה יודע לכם בושו והכלמו מדרכיכם בית ישראל: (ס)

Segment 33
HE:
כה אמר אדני יהוה ביום טהרי אתכם מכל עונותיכם והושבתי את הערים ונבנו החרבות:

Segment 34
HE:
והארץ הנשמה תעבד תחת אשר היתה שממה לעיני כל עובר:

Segment 35
HE:
ואמרו הארץ הלזו הנשמה היתה כגן עדן והערים החרבות והנשמות והנהרסות בצורות ישבו:

Segment 36
HE:
וידעו הגוים אשר ישארו סביבותיכם כי אני יהוה בניתי הנהרסות נטעתי הנשמה אני יהוה דברתי ועשיתי: (ס)

Segment 37
HE:
כה אמר אדני יהוה עוד זאת אדרש לבית ישראל לעשות להם ארבה אתם כצאן אדם:

Segment 38
HE:
כצאן קדשים כצאן ירושלם במועדיה כן תהיינה הערים החרבות מלאות צאן אדם וידעו כי אני יהוה: (פ)