Ezekiel Chapter 37
יחזקאל פרק לז
Source: https://ajew.org/reader/tanach-yechezkel/1/37

Segment 1
HE:
היתה עלי יד יהוה ויוצאני ברוח יהוה ויניחני בתוך הבקעה והיא מלאה עצמות:

Segment 2
HE:
והעבירני עליהם סביב סביב והנה רבות מאד על פני הבקעה והנה יבשות מאד:

Segment 3
HE:
ויאמר אלי בן אדם התחיינה העצמות האלה ואמר אדני יהוה אתה ידעת:

Segment 4
HE:
ויאמר אלי הנבא על העצמות האלה ואמרת אליהם העצמות היבשות שמעו דבר יהוה:

Segment 5
HE:
כה אמר אדני יהוה לעצמות האלה הנה אני מביא בכם רוח וחייתם:

Segment 6
HE:
ונתתי עליכם גדים והעלתי עליכם בשר וקרמתי עליכם עור ונתתי בכם רוח וחייתם וידעתם כי אני יהוה:

Segment 7
HE:
ונבאתי כאשר צויתי ויהי קול כהנבאי והנה רעש ותקרבו עצמות עצם אל עצמו:

Segment 8
HE:
וראיתי והנה עליהם גדים ובשר עלה ויקרם עליהם עור מלמעלה ורוח אין בהם:

Segment 9
HE:
ויאמר אלי הנבא אל הרוח הנבא בן אדם ואמרת אל הרוח (ס) כה אמר אדני יהוה מארבע רוחות באי הרוח ופחי בהרוגים האלה ויחיו:

Segment 10
HE:
והנבאתי כאשר צוני ותבוא בהם הרוח ויחיו ויעמדו על רגליהם חיל גדול מאד מאד:

Segment 11
HE:
ויאמר אלי בן אדם העצמות האלה כל בית ישראל המה הנה אמרים יבשו עצמותינו ואבדה תקותנו נגזרנו לנו:

Segment 12
HE:
לכן הנבא ואמרת אליהם כה אמר אדני יהוה הנה אני פתח את קברותיכם והעליתי אתכם מקברותיכם עמי והבאתי אתכם אל אדמת ישראל:

Segment 13
HE:
וידעתם כי אני יהוה בפתחי את קברותיכם ובהעלותי אתכם מקברותיכם עמי:

Segment 14
HE:
ונתתי רוחי בכם וחייתם והנחתי אתכם על אדמתכם וידעתם כי אני יהוה דברתי ועשיתי נאם יהוה: (פ)

Segment 15
HE:
ויהי דבר יהוה אלי לאמר:

Segment 16
HE:
ואתה בן אדם קח לך עץ אחד וכתב עליו ליהודה ולבני ישראל (חברו) חבריו ולקח עץ אחד וכתוב עליו ליוסף עץ אפרים וכל בית ישראל (חברו) חבריו:

Segment 17
HE:
וקרב אתם אחד אל אחד לך לעץ אחד והיו לאחדים בידך:

Segment 18
HE:
וכאשר יאמרו אליך בני עמך לאמר הלוא תגיד לנו מה אלה לך:

Segment 19
HE:
דבר אלהם כה אמר אדני יהוה הנה אני לקח את עץ יוסף אשר ביד אפרים ושבטי ישראל (חברו) חבריו ונתתי אותם עליו את עץ יהודה ועשיתם לעץ אחד והיו אחד בידי:

Segment 20
HE:
והיו העצים אשר תכתב עליהם בידך לעיניהם:

Segment 21
HE:
ודבר אליהם כה אמר אדני יהוה הנה אני לקח את בני ישראל מבין הגוים אשר הלכו שם וקבצתי אתם מסביב והבאתי אותם אל אדמתם:

Segment 22
HE:
ועשיתי אתם לגוי אחד בארץ בהרי ישראל ומלך אחד יהיה לכלם למלך ולא (יהיה) יהיו עוד לשני גוים ולא יחצו עוד לשתי ממלכות עוד:

Segment 23
HE:
ולא יטמאו עוד בגלוליהם ובשקוציהם ובכל פשעיהם והושעתי אתם מכל מושבתיהם אשר חטאו בהם וטהרתי אותם והיו לי לעם ואני אהיה להם לאלהים:

Segment 24
HE:
ועבדי דוד מלך עליהם ורועה אחד יהיה לכלם ובמשפטי ילכו וחקתי ישמרו ועשו אותם:

Segment 25
HE:
וישבו על הארץ אשר נתתי לעבדי ליעקב אשר ישבו בה אבותיכם וישבו עליה המה ובניהם ובני בניהם עד עולם ודוד עבדי נשיא להם לעולם:

Segment 26
HE:
וכרתי להם ברית שלום ברית עולם יהיה אותם ונתתים והרביתי אותם ונתתי את מקדשי בתוכם לעולם:

Segment 27
HE:
והיה משכני עליהם והייתי להם לאלהים והמה יהיו לי לעם:

Segment 28
HE:
וידעו הגוים כי אני יהוה מקדש את ישראל בהיות מקדשי בתוכם לעולם: (פ)