Ezekiel Chapter 43
יחזקאל פרק מג
Source: https://ajew.org/reader/tanach-yechezkel/1/43

Segment 1
HE:
ויולכני אל השער שער אשר פנה דרך הקדים:

Segment 2
HE:
והנה כבוד אלהי ישראל בא מדרך הקדים וקולו כקול מים רבים והארץ האירה מכבדו:

Segment 3
HE:
וכמראה המראה אשר ראיתי כמראה אשר ראיתי בבאי לשחת את העיר ומראות כמראה אשר ראיתי אל נהר כבר ואפל אל פני:

Segment 4
HE:
וכבוד יהוה בא אל הבית דרך שער אשר פניו דרך הקדים:

Segment 5
HE:
ותשאני רוח ותביאני אל החצר הפנימי והנה מלא כבוד יהוה הבית:

Segment 6
HE:
ואשמע מדבר אלי מהבית ואיש היה עמד אצלי:

Segment 7
HE:
ויאמר אלי בן אדם את מקום כסאי ואת מקום כפות רגלי אשר אשכן שם בתוך בני ישראל לעולם ולא יטמאו עוד בית ישראל שם קדשי המה ומלכיהם בזנותם ובפגרי מלכיהם במותם:

Segment 8
HE:
בתתם ספם את ספי ומזוזתם אצל מזוזתי והקיר ביני וביניהם וטמאו את שם קדשי בתועבותם אשר עשו ואכל אתם באפי:

Segment 9
HE:
עתה ירחקו את זנותם ופגרי מלכיהם ממני ושכנתי בתוכם לעולם: (ס)

Segment 10
HE:
אתה בן אדם הגד את בית ישראל את הבית ויכלמו מעונותיהם ומדדו את תכנית:

Segment 11
HE:
ואם נכלמו מכל אשר עשו צורת הבית ותכונתו ומוצאיו ומובאיו וכל צורתו ואת כל חקתיו וכל (צורתי) צורתיו וכל (תורתו) תורתיו הודע אותם וכתב לעיניהם וישמרו את כל צורתו ואת כל חקתיו ועשו אותם:

Segment 12
HE:
זאת תורת הבית על ראש ההר כל גבלו סביב סביב קדש קדשים הנה זאת תורת הבית:

Segment 13
HE:
ואלה מדות המזבח באמות אמה אמה וטפח וחיק האמה ואמה רחב וגבולה אל שפתה סביב זרת האחד וזה גב המזבח:

Segment 14
HE:
ומחיק הארץ עד העזרה התחתונה שתים אמות ורחב אמה אחת ומהעזרה הקטנה עד העזרה הגדולה ארבע אמות ורחב האמה:

Segment 15
HE:
וההראל ארבע אמות (ומהאראיל) ומהאריאל ולמעלה הקרנות ארבע:

Segment 16
HE:
(והאראיל) והאריאל שתים עשרה ארך בשתים עשרה רחב רבוע אל ארבעת רבעיו:

Segment 17
HE:
והעזרה ארבע עשרה ארך בארבע עשרה רחב אל ארבעת רבעיה והגבול סביב אותה חצי האמה והחיק לה אמה סביב ומעלתהו פנות קדים:

Segment 18
HE:
ויאמר אלי בן אדם כה אמר אדני יהוה אלה חקות המזבח ביום העשותו להעלות עליו עולה ולזרק עליו דם:

Segment 19
HE:
ונתתה אל הכהנים הלוים אשר הם מזרע צדוק הקרבים אלי נאם אדני יהוה לשרתני פר בן בקר לחטאת:

Segment 20
HE:
ולקחת מדמו ונתתה על ארבע קרנתיו ואל ארבע פנות העזרה ואל הגבול סביב וחטאת אותו וכפרתהו:

Segment 21
HE:
ולקחת את הפר החטאת ושרפו במפקד הבית מחוץ למקדש:

Segment 22
HE:
וביום השני תקריב שעיר עזים תמים לחטאת וחטאו את המזבח כאשר חטאו בפר:

Segment 23
HE:
בכלותך מחטא תקריב פר בן בקר תמים ואיל מן הצאן תמים:

Segment 24
HE:
והקרבתם לפני יהוה והשליכו הכהנים עליהם מלח והעלו אותם עלה ליהוה:

Segment 25
HE:
שבעת ימים תעשה שעיר חטאת ליום ופר בן בקר ואיל מן הצאן תמימים יעשו:

Segment 26
HE:
שבעת ימים יכפרו את המזבח וטהרו אתו ומלאו (ידו) ידיו:

Segment 27
HE:
ויכלו את הימים (ס) והיה ביום השמיני והלאה יעשו הכהנים על המזבח את עולותיכם ואת שלמיכם ורצאתי אתכם נאם אדני יהוה: (ס)