Ezekiel Chapter 47
יחזקאל פרק מז
Source: https://ajew.org/reader/tanach-yechezkel/1/47

Segment 1
HE:
וישבני אל פתח הבית והנה מים יצאים מתחת מפתן הבית קדימה כי פני הבית קדים והמים ירדים מתחת מכתף הבית הימנית מנגב למזבח:

Segment 2
HE:
ויוצאני דרך שער צפונה ויסבני דרך חוץ אל שער החוץ דרך הפונה קדים והנה מים מפכים מן הכתף הימנית:

Segment 3
HE:
בצאת האיש קדים וקו בידו וימד אלף באמה ויעברני במים מי אפסים:

Segment 4
HE:
וימד אלף ויעברני במים מים ברכים וימד אלף ויעברני מי מתנים:

Segment 5
HE:
וימד אלף נחל אשר לא אוכל לעבר כי גאו המים מי שחו נחל אשר לא יעבר:

Segment 6
HE:
ויאמר אלי הראית בן אדם ויולכני וישבני שפת הנחל:

Segment 7
HE:
בשובני והנה אל שפת הנחל עץ רב מאד מזה ומזה:

Segment 8
HE:
ויאמר אלי המים האלה יוצאים אל הגלילה הקדמונה וירדו על הערבה ובאו הימה אל הימה המוצאים (ונרפאו) ונרפו המים:

Segment 9
HE:
והיה כל נפש חיה אשר ישרץ אל כל אשר יבוא שם נחלים יחיה והיה הדגה רבה מאד כי באו שמה המים האלה וירפאו וחי כל אשר יבוא שמה הנחל:

Segment 10
HE:
והיה (יעמדו) עמדו עליו דוגים מעין גדי ועד עין עגלים משטוח לחרמים יהיו למינה תהיה דגתם כדגת הים הגדול רבה מאד:

Segment 11
HE:
(בצאתו) בצאתיו וגבאיו ולא ירפאו למלח נתנו:

Segment 12
HE:
ועל הנחל יעלה על שפתו מזה ומזה כל עץ מאכל לא יבול עלהו ולא יתם פריו לחדשיו יבכר כי מימיו מן המקדש המה יוצאים (והיו) והיה פריו למאכל ועלהו לתרופה: (פ)

Segment 13
HE:
כה אמר אדני יהוה גה גבול אשר תתנחלו את הארץ לשני עשר שבטי ישראל יוסף חבלים:

Segment 14
HE:
ונחלתם אותה איש כאחיו אשר נשאתי את ידי לתתה לאבתיכם ונפלה הארץ הזאת לכם בנחלה:

Segment 15
HE:
וזה גבול הארץ לפאת צפונה מן הים הגדול הדרך חתלן לבוא צדדה:

Segment 16
HE:
חמת ברותה סברים אשר בין גבול דמשק ובין גבול חמת חצר התיכון אשר אל גבול חורן:

Segment 17
HE:
והיה גבול מן הים חצר עינון גבול דמשק וצפון צפונה וגבול חמת ואת פאת צפון:

Segment 18
HE:
ופאת קדים מבין חורן ומבין דמשק ומבין הגלעד ומבין ארץ ישראל הירדן מגבול על הים הקדמוני תמדו ואת פאת קדימה:

Segment 19
HE:
ופאת נגב תימנה מתמר עד מי מריבות קדש נחלה אל הים הגדול ואת פאת תימנה נגבה:

Segment 20
HE:
ופאת ים הים הגדול מגבול עד נכח לבוא חמת זאת פאת ים:

Segment 21
HE:
וחלקתם את הארץ הזאת לכם לשבטי ישראל:

Segment 22
HE:
והיה תפלו אותה בנחלה לכם ולהגרים הגרים בתוככם אשר הולדו בנים בתוככם והיו לכם כאזרח בבני ישראל אתכם יפלו בנחלה בתוך שבטי ישראל:

Segment 23
HE:
והיה בשבט אשר גר הגר אתו שם תתנו נחלתו נאם אדני יהוה: (פ)