Ezekiel Chapter 9
יחזקאל פרק ט
Source: https://ajew.org/reader/tanach-yechezkel/1/9

Segment 1
HE:
ויקרא באזני קול גדול לאמר קרבו פקדות העיר ואיש כלי משחתו בידו:

Segment 2
HE:
והנה ששה אנשים באים מדרך שער העליון אשר מפנה צפונה ואיש כלי מפצו בידו ואיש אחד בתוכם לבש בדים וקסת הספר במתניו ויבאו ויעמדו אצל מזבח הנחשת:

Segment 3
HE:
וכבוד אלהי ישראל נעלה מעל הכרוב אשר היה עליו אל מפתן הבית ויקרא אל האיש הלבש הבדים אשר קסת הספר במתניו: (פ)

Segment 4
HE:
ויאמר יהוה (אלו) אליו עבר בתוך העיר בתוך ירושלם והתוית תו על מצחות האנשים הנאנחים והנאנקים על כל התועבות הנעשות בתוכה:

Segment 5
HE:
ולאלה אמר באזני עברו בעיר אחריו והכו (על) אל תחס (עיניכם) עינכם ואל תחמלו:

Segment 6
HE:
זקן בחור ובתולה וטף ונשים תהרגו למשחית ועל כל איש אשר עליו התו אל תגשו וממקדשי תחלו ויחלו באנשים הזקנים אשר לפני הבית:

Segment 7
HE:
ויאמר אליהם טמאו את הבית ומלאו את החצרות חללים צאו ויצאו והכו בעיר:

Segment 8
HE:
ויהי כהכותם ונאשאר אני ואפלה על פני ואזעק ואמר אהה אדני יהוה המשחית אתה את כל שארית ישראל בשפכך את חמתך על ירושלם:

Segment 9
HE:
ויאמר אלי עון בית ישראל ויהודה גדול במאד מאד ותמלא הארץ דמים והעיר מלאה מטה כי אמרו עזב יהוה את הארץ ואין יהוה ראה:

Segment 10
HE:
וגם אני לא תחוס עיני ולא אחמל דרכם בראשם נתתי:

Segment 11
HE:
והנה האיש לבש הבדים אשר הקסת במתניו משיב דבר לאמר עשיתי (כאשר) ככל אשר צויתני: (פ)