Joshua Chapter 2
יהושע פרק ב
Source: https://ajew.org/reader/tanach-yehoshua/1/2

Segment 1
HE:
וישלח יהושע בן נון מן השטים שנים אנשים מרגלים חרש לאמר לכו ראו את הארץ ואת יריחו וילכו ויבאו בית אשה זונה ושמה רחב וישכבו שמה:

Segment 2
HE:
ויאמר למלך יריחו לאמר הנה אנשים באו הנה הלילה מבני ישראל לחפר את הארץ:

Segment 3
HE:
וישלח מלך יריחו אל רחב לאמר הוציאי האנשים הבאים אליך אשר באו לביתך כי לחפר את כל הארץ באו:

Segment 4
HE:
ותקח האשה את שני האנשים ותצפנו ותאמר כן באו אלי האנשים ולא ידעתי מאין המה:

Segment 5
HE:
ויהי השער לסגור בחשך והאנשים יצאו לא ידעתי אנה הלכו האנשים רדפו מהר אחריהם כי תשיגום:

Segment 6
HE:
והיא העלתם הגגה ותטמנם בפשתי העץ הערכות לה על הגג:

Segment 7
HE:
והאנשים רדפו אחריהם דרך הירדן על המעברות והשער סגרו אחרי כאשר יצאו הרדפים אחריהם:

Segment 8
HE:
והמה טרם ישכבון והיא עלתה עליהם על הגג:

Segment 9
HE:
ותאמר אל האנשים ידעתי כי נתן יהוה לכם את הארץ וכי נפלה אימתכם עלינו וכי נמגו כל ישבי הארץ מפניכם:

Segment 10
HE:
כי שמענו את אשר הוביש יהוה את מי ים סוף מפניכם בצאתכם ממצרים ואשר עשיתם לשני מלכי האמרי אשר בעבר הירדן לסיחן ולעוג אשר החרמתם אותם:

Segment 11
HE:
ונשמע וימס לבבנו ולא קמה עוד רוח באיש מפניכם כי יהוה אלהיכם הוא אלהים בשמים ממעל ועל הארץ מתחת:

Segment 12
HE:
ועתה השבעו נא לי ביהוה כי עשיתי עמכם חסד ועשיתם גם אתם עם בית אבי חסד ונתתם לי אות אמת:

Segment 13
HE:
והחיתם את אבי ואת אמי ואת אחי ואת (אחותי) אחיותי ואת כל אשר להם והצלתם את נפשתינו ממות:

Segment 14
HE:
ויאמרו לה האנשים נפשנו תחתיכם למות אם לא תגידו את דברנו זה והיה בתת יהוה לנו את הארץ ועשינו עמך חסד ואמת:

Segment 15
HE:
ותורדם בחבל בעד החלון כי ביתה בקיר החומה ובחומה היא יושבת: (ס)

Segment 16
HE:
ותאמר להם ההרה לכו פן יפגעו בכם הרדפים ונחבתם שמה שלשת ימים עד שוב הרדפים ואחר תלכו לדרככם:

Segment 17
HE:
ויאמרו אליה האנשים נקים אנחנו משבעתך הזה אשר השבעתנו:

Segment 18
HE:
הנה אנחנו באים בארץ את תקות חוט השני הזה תקשרי בחלון אשר הורדתנו בו ואת אביך ואת אמך ואת אחיך ואת כל בית אביך תאספי אליך הביתה:

Segment 19
HE:
והיה כל אשר יצא מדלתי ביתך החוצה דמו בראשו ואנחנו נקים וכל אשר יהיה אתך בבית דמו בראשנו אם יד תהיה בו:

Segment 20
HE:
ואם תגידי את דברנו זה והיינו נקים משבעתך אשר השבעתנו:

Segment 21
HE:
ותאמר כדבריכם כן הוא ותשלחם וילכו ותקשר את תקות השני בחלון:

Segment 22
HE:
וילכו ויבאו ההרה וישבו שם שלשת ימים עד שבו הרדפים ויבקשו הרדפים בכל הדרך ולא מצאו: (פ)

Segment 23
HE:
וישבו שני האנשים וירדו מההר ויעברו ויבאו אל יהושע בן נון ויספרו לו את כל המצאות אותם:

Segment 24
HE:
ויאמרו אל יהושע כי נתן יהוה בידנו את כל הארץ וגם נמגו כל ישבי הארץ מפנינו: (ס)