Joshua Chapter 3
יהושע פרק ג
Source: https://ajew.org/reader/tanach-yehoshua/1/3

Segment 1
HE:
וישכם יהושע בבקר ויסעו מהשטים ויבאו עד הירדן הוא וכל בני ישראל וילנו שם טרם יעברו:

Segment 2
HE:
ויהי מקצה שלשת ימים ויעברו השטרים בקרב המחנה:

Segment 3
HE:
ויצוו את העם לאמר כראותכם את ארון ברית יהוה אלהיכם והכהנים הלוים נשאים אתו ואתם תסעו ממקומכם והלכתם אחריו:

Segment 4
HE:
אך רחוק יהיה ביניכם (ובינו) וביניו כאלפים אמה במדה אל תקרבו אליו למען אשר תדעו את הדרך אשר תלכו בה כי לא עברתם בדרך מתמול שלשום: (ס)

Segment 5
HE:
ויאמר יהושע אל העם התקדשו כי מחר יעשה יהוה בקרבכם נפלאות: (פ)

Segment 6
HE:
ויאמר יהושע אל הכהנים לאמר שאו את ארון הברית ועברו לפני העם וישאו את ארון הברית וילכו לפני העם: (ס)

Segment 7
HE:
ויאמר יהוה אל יהושע היום הזה אחל גדלך בעיני כל ישראל אשר ידעון כי כאשר הייתי עם משה אהיה עמך:

Segment 8
HE:
ואתה תצוה את הכהנים נשאי ארון הברית לאמר כבאכם עד קצה מי הירדן בירדן תעמדו: (פ)

Segment 9
HE:
ויאמר יהושע אל בני ישראל גשו הנה ושמעו את דברי יהוה אלהיכם:

Segment 10
HE:
ויאמר יהושע בזאת תדעון כי אל חי בקרבכם והורש יוריש מפניכם את הכנעני ואת החתי ואת החוי ואת הפרזי ואת הגרגשי והאמרי והיבוסי:

Segment 11
HE:
הנה ארון הברית אדון כל הארץ עבר לפניכם בירדן:

Segment 12
HE:
ועתה קחו לכם שני עשר איש משבטי ישראל איש אחד איש אחד לשבט:

Segment 13
HE:
והיה כנוח כפות רגלי הכהנים נשאי ארון יהוה אדון כל הארץ במי הירדן מי הירדן יכרתון המים הירדים מלמעלה ויעמדו נד אחד:

Segment 14
HE:
ויהי בנסע העם מאהליהם לעבר את הירדן והכהנים נשאי הארון הברית לפני העם:

Segment 15
HE:
וכבוא נשאי הארון עד הירדן ורגלי הכהנים נשאי הארון נטבלו בקצה המים והירדן מלא על כל גדותיו כל ימי קציר:

Segment 16
HE:
ויעמדו המים הירדים מלמעלה קמו נד אחד הרחק מאד (באדם) מאדם העיר אשר מצד צרתן והירדים על ים הערבה ים המלח תמו נכרתו והעם עברו נגד יריחו:

Segment 17
HE:
ויעמדו הכהנים נשאי הארון ברית יהוה בחרבה בתוך הירדן הכן וכל ישראל עברים בחרבה עד אשר תמו כל הגוי לעבר את הירדן: