Joshua Chapter 6
יהושע פרק ו
Source: https://ajew.org/reader/tanach-yehoshua/1/6

Segment 1
HE:
ויריחו סגרת ומסגרת מפני בני ישראל אין יוצא ואין בא: (ס)

Segment 2
HE:
ויאמר יהוה אל יהושע ראה נתתי בידך את יריחו ואת מלכה גבורי החיל:

Segment 3
HE:
וסבתם את העיר כל אנשי המלחמה הקיף את העיר פעם אחת כה תעשה ששת ימים:

Segment 4
HE:
ושבעה כהנים ישאו שבעה שופרות היובלים לפני הארון וביום השביעי תסבו את העיר שבע פעמים והכהנים יתקעו בשופרות:

Segment 5
HE:
והיה במשך בקרן היובל (בשמעכם) כשמעכם את קול השופר יריעו כל העם תרועה גדולה ונפלה חומת העיר תחתיה ועלו העם איש נגדו:

Segment 6
HE:
ויקרא יהושע בן נון אל הכהנים ויאמר אלהם שאו את ארון הברית ושבעה כהנים ישאו שבעה שופרות יובלים לפני ארון יהוה:

Segment 7
HE:
(ויאמרו) ויאמר אל העם עברו וסבו את העיר והחלוץ יעבר לפני ארון יהוה:

Segment 8
HE:
ויהי כאמר יהושע אל העם ושבעה הכהנים נשאים שבעה שופרות היובלים לפני יהוה עברו ותקעו בשופרות וארון ברית יהוה הלך אחריהם:

Segment 9
HE:
והחלוץ הלך לפני הכהנים (תקעו) תקעי השופרות והמאסף הלך אחרי הארון הלוך ותקוע בשופרות:

Segment 10
HE:
ואת העם צוה יהושע לאמר לא תריעו ולא תשמיעו את קולכם ולא יצא מפיכם דבר עד יום אמרי אליכם הריעו והריעתם:

Segment 11
HE:
ויסב ארון יהוה את העיר הקף פעם אחת ויבאו המחנה וילינו במחנה: (פ) (פ)

Segment 12
HE:
וישכם יהושע בבקר וישאו הכהנים את ארון יהוה:

Segment 13
HE:
ושבעה הכהנים נשאים שבעה שופרות היבלים לפני ארון יהוה הלכים הלוך ותקעו בשופרות והחלוץ הלך לפניהם והמאסף הלך אחרי ארון יהוה (הולך) הלוך ותקוע בשופרות:

Segment 14
HE:
ויסבו את העיר ביום השני פעם אחת וישבו המחנה כה עשו ששת ימים:

Segment 15
HE:
ויהי ביום השביעי וישכמו כעלות השחר ויסבו את העיר כמשפט הזה שבע פעמים רק ביום ההוא סבבו את העיר שבע פעמים:

Segment 16
HE:
ויהי בפעם השביעית תקעו הכהנים בשופרות ויאמר יהושע אל העם הריעו כי נתן יהוה לכם את העיר:

Segment 17
HE:
והיתה העיר חרם היא וכל אשר בה ליהוה רק רחב הזונה תחיה היא וכל אשר אתה בבית כי החבאתה את המלאכים אשר שלחנו:

Segment 18
HE:
ורק אתם שמרו מן החרם פן תחרימו ולקחתם מן החרם ושמתם את מחנה ישראל לחרם ועכרתם אותו:

Segment 19
HE:
וכל כסף וזהב וכלי נחשת וברזל קדש הוא ליהוה אוצר יהוה יבוא:

Segment 20
HE:
וירע העם ויתקעו בשפרות ויהי כשמע העם את קול השופר ויריעו העם תרועה גדולה ותפל החומה תחתיה ויעל העם העירה איש נגדו וילכדו את העיר:

Segment 21
HE:
ויחרימו את כל אשר בעיר מאיש ועד אשה מנער ועד זקן ועד שור ושה וחמור לפי חרב:

Segment 22
HE:
ולשנים האנשים המרגלים את הארץ אמר יהושע באו בית האשה הזונה והוציאו משם את האשה ואת כל אשר לה כאשר נשבעתם לה:

Segment 23
HE:
ויבאו הנערים המרגלים ויציאו את רחב ואת אביה ואת אמה ואת אחיה ואת כל אשר לה ואת כל משפחותיה הוציאו ויניחום מחוץ למחנה ישראל:

Segment 24
HE:
והעיר שרפו באש וכל אשר בה רק הכסף והזהב וכלי הנחשת והברזל נתנו אוצר בית יהוה:

Segment 25
HE:
ואת רחב הזונה ואת בית אביה ואת כל אשר לה החיה יהושע ותשב בקרב ישראל עד היום הזה כי החביאה את המלאכים אשר שלח יהושע לרגל את יריחו: (פ)

Segment 26
HE:
וישבע יהושע בעת ההיא לאמר ארור האיש לפני יהוה אשר יקום ובנה את העיר הזאת את יריחו בבכרו ייסדנה ובצעירו יציב דלתיה:

Segment 27
HE:
ויהי יהוה את יהושע ויהי שמעו בכל הארץ: