Segment 1
הוי ארץ צלצל כנפים אשר מעבר לנהרי כוש:
Segment 2
השלח בים צירים ובכלי גמא על פני מים לכו מלאכים קלים אל גוי ממשך ומורט אל עם נורא מן הוא והלאה גוי קו קו ומבוסה אשר בזאו נהרים ארצו:
Segment 3
כל ישבי תבל ושכני ארץ כנשא נס הרים תראו וכתקע שופר תשמעו: (ס)
Segment 4
כי כה אמר יהוה אלי (אשקוטה) אשקטה ואביטה במכוני כחם צח עלי אור כעב טל בחם קציר:
Segment 5
כי לפני קציר כתם פרח ובסר גמל יהיה נצה וכרת הזלזלים במזמרות ואת הנטישות הסיר התז:
Segment 6
יעזבו יחדו לעיט הרים ולבהמת הארץ וקץ עליו העיט וכל בהמת הארץ עליו תחרף: (ס)
Segment 7
בעת ההיא יובל שי ליהוה צבאות עם ממשך ומורט ומעם נורא מן הוא והלאה גוי קו קו ומבוסה אשר בזאו נהרים ארצו אל מקום שם יהוה צבאות הר ציון: (פ)