Isaiah Chapter 3
ישעיהו פרק ג
Source: https://ajew.org/reader/tanach-yeshayahu/1/3

Segment 1
HE:
כי הנה האדון יהוה צבאות מסיר מירושלם ומיהודה משען ומשענה כל משען לחם וכל משען מים:

Segment 2
HE:
גבור ואיש מלחמה שופט ונביא וקסם וזקן:

Segment 3
HE:
שר חמשים ונשוא פנים ויועץ וחכם חרשים ונבון לחש:

Segment 4
HE:
ונתתי נערים שריהם ותעלולים ימשלו בם:

Segment 5
HE:
ונגש העם איש באיש ואיש ברעהו ירהבו הנער בזקן והנקלה בנכבד:

Segment 6
HE:
כי יתפש איש באחיו בית אביו שמלה לכה קצין תהיה לנו והמכשלה הזאת תחת ידך:

Segment 7
HE:
ישא ביום ההוא לאמר לא אהיה חבש ובביתי אין לחם ואין שמלה לא תשימני קצין עם:

Segment 8
HE:
כי כשלה ירושלם ויהודה נפל כי לשונם ומעלליהם אל יהוה למרות עני כבודו:

Segment 9
HE:
הכרת פניהם ענתה בם וחטאתם כסדם הגידו לא כחדו אוי לנפשם כי גמלו להם רעה:

Segment 10
HE:
אמרו צדיק כי טוב כי פרי מעלליהם יאכלו:

Segment 11
HE:
אוי לרשע רע כי גמול ידיו יעשה לו:

Segment 12
HE:
עמי נגשיו מעולל ונשים משלו בו עמי מאשריך מתעים ודרך ארחתיך בלעו: (פ)

Segment 13
HE:
נצב לריב יהוה ועמד לדין עמים:

Segment 14
HE:
יהוה במשפט יבוא עם זקני עמו ושריו ואתם בערתם הכרם גזלת העני בבתיכם:

Segment 15
HE:
(מלכם) מה לכם תדכאו עמי ופני עניים תטחנו נאם אדני יהוה צבאות: (ס)

Segment 16
HE:
ויאמר יהוה יען כי גבהו בנות ציון ותלכנה (נטוות) נטויות גרון ומשקרות עינים הלוך וטפף תלכנה וברגליהם תעכסנה:

Segment 17
HE:
ושפח אדני קדקד בנות ציון ויהוה פתהן יערה: (ס)

Segment 18
HE:
ביום ההוא יסיר אדני את תפארת העכסים והשביסים והשהרנים:

Segment 19
HE:
הנטיפות והשירות והרעלות:

Segment 20
HE:
הפארים והצעדות והקשרים ובתי הנפש והלחשים:

Segment 21
HE:
הטבעות ונזמי האף:

Segment 22
HE:
המחלצות והמעטפות והמטפחות והחריטים:

Segment 23
HE:
והגלינים והסדינים והצניפות והרדידים:

Segment 24
HE:
והיה תחת בשם מק יהיה ותחת חגורה נקפה ותחת מעשה מקשה קרחה ותחת פתיגיל מחגרת שק כי תחת יפי:

Segment 25
HE:
מתיך בחרב יפלו וגבורתך במלחמה:

Segment 26
HE:
ואנו ואבלו פתחיה ונקתה לארץ תשב: