Isaiah Chapter 37
ישעיהו פרק לז
Source: https://ajew.org/reader/tanach-yeshayahu/1/37

Segment 1
HE:
ויהי כשמע המלך חזקיהו ויקרע את בגדיו ויתכס בשק ויבא בית יהוה:

Segment 2
HE:
וישלח את אליקים אשר על הבית ואת שבנא הסופר ואת זקני הכהנים מתכסים בשקים אל ישעיהו בן אמוץ הנביא:

Segment 3
HE:
ויאמרו אליו כה אמר חזקיהו יום צרה ותוכחה ונאצה היום הזה כי באו בנים עד משבר וכח אין ללדה:

Segment 4
HE:
אולי ישמע יהוה אלהיך את דברי רב שקה אשר שלחו מלך אשור אדניו לחרף אלהים חי והוכיח בדברים אשר שמע יהוה אלהיך ונשאת תפלה בעד השארית הנמצאה:

Segment 5
HE:
ויבאו עבדי המלך חזקיהו אל ישעיהו:

Segment 6
HE:
ויאמר אליהם ישעיהו כה תאמרון אל אדניכם כה אמר יהוה אל תירא מפני הדברים אשר שמעת אשר גדפו נערי מלך אשור אותי:

Segment 7
HE:
הנני נותן בו רוח ושמע שמועה ושב אל ארצו והפלתיו בחרב בארצו:

Segment 8
HE:
וישב רב שקה וימצא את מלך אשור נלחם על לבנה כי שמע כי נסע מלכיש:

Segment 9
HE:
וישמע על תרהקה מלך כוש לאמר יצא להלחם אתך וישמע וישלח מלאכים אל חזקיהו לאמר:

Segment 10
HE:
כה תאמרון אל חזקיהו מלך יהודה לאמר אל ישאך אלהיך אשר אתה בוטח בו לאמר לא תנתן ירושלם ביד מלך אשור:

Segment 11
HE:
הנה אתה שמעת אשר עשו מלכי אשור לכל הארצות להחרימם ואתה תנצל:

Segment 12
HE:
ההצילו אותם אלהי הגוים אשר השחיתו אבותי את גוזן ואת חרן ורצף ובני עדן אשר בתלשר:

Segment 13
HE:
איה מלך חמת ומלך ארפד ומלך לעיר ספרוים הנע ועוה:

Segment 14
HE:
ויקח חזקיהו את הספרים מיד המלאכים ויקראהו ויעל בית יהוה ויפרשהו חזקיהו לפני יהוה: (ס)

Segment 15
HE:
ויתפלל חזקיהו אל יהוה לאמר:

Segment 16
HE:
יהוה צבאות אלהי ישראל ישב הכרבים אתה הוא האלהים לבדך לכל ממלכות הארץ אתה עשית את השמים ואת הארץ:

Segment 17
HE:
הטה יהוה אזנך ושמע פקח יהוה עינך וראה ושמע את כל דברי סנחריב אשר שלח לחרף אלהים חי:

Segment 18
HE:
אמנם יהוה החריבו מלכי אשור את כל הארצות ואת ארצם:

Segment 19
HE:
ונתן את אלהיהם באש כי לא אלהים המה כי אם מעשה ידי אדם עץ ואבן ויאבדום:

Segment 20
HE:
ועתה יהוה אלהינו הושיענו מידו וידעו כל ממלכות הארץ כי אתה יהוה לבדך:

Segment 21
HE:
וישלח ישעיהו בן אמוץ אל חזקיהו לאמר כה אמר יהוה אלהי ישראל אשר התפללת אלי אל סנחריב מלך אשור:

Segment 22
HE:
זה הדבר אשר דבר יהוה עליו בזה לך לעגה לך בתולת בת ציון אחריך ראש הניעה בת ירושלם:

Segment 23
HE:
את מי חרפת וגדפת ועל מי הרימותה קול ותשא מרום עיניך אל קדוש ישראל:

Segment 24
HE:
ביד עבדיך חרפת אדני ותאמר ברב רכבי אני עליתי מרום הרים ירכתי לבנון ואכרת קומת ארזיו מבחר ברשיו ואבוא מרום קצו יער כרמלו:

Segment 25
HE:
אני קרתי ושתיתי מים ואחרב בכף פעמי כל יארי מצור:

Segment 26
HE:
הלוא שמעת למרחוק אותה עשיתי מימי קדם ויצרתיה עתה הבאתיה ותהי להשאות גלים נצים ערים בצרות:

Segment 27
HE:
וישביהן קצרי יד חתו ובשו היו עשב שדה וירק דשא חציר גגות ושדמה לפני קמה:

Segment 28
HE:
ושבתך וצאתך ובואך ידעתי ואת התרגזך אלי:

Segment 29
HE:
יען התרגזך אלי ושאננך עלה באזני ושמתי חחי באפך ומתגי בשפתיך והשיבתיך בדרך אשר באת בה:

Segment 30
HE:
וזה לך האות אכול השנה ספיח ובשנה השנית שחיס ובשנה השלישית זרעו וקצרו ונטעו כרמים (ואכול) ואכלו פרים:

Segment 31
HE:
ויספה פליטת בית יהודה הנשארה שרש למטה ועשה פרי למעלה:

Segment 32
HE:
כי מירושלם תצא שארית ופליטה מהר ציון קנאת יהוה צבאות תעשה זאת: (ס)

Segment 33
HE:
לכן כה אמר יהוה אל מלך אשור לא יבוא אל העיר הזאת ולא יורה שם חץ ולא יקדמנה מגן ולא ישפך עליה סללה:

Segment 34
HE:
בדרך אשר בא בה ישוב ואל העיר הזאת לא יבוא נאם יהוה:

Segment 35
HE:
וגנותי על העיר הזאת להושיעה למעני ולמען דוד עבדי: (ס)

Segment 36
HE:
ויצא מלאך יהוה ויכה במחנה אשור מאה ושמנים וחמשה אלף וישכימו בבקר והנה כלם פגרים מתים:

Segment 37
HE:
ויסע וילך וישב סנחריב מלך אשור וישב בנינוה:

Segment 38
HE:
ויהי הוא משתחוה בית נסרך אלהיו ואדרמלך ושראצר בניו הכהו בחרב והמה נמלטו ארץ אררט וימלך אסר חדן בנו תחתיו: (ס)