Segment 1
כה אמר יהוה אי זה ספר כריתות אמכם אשר שלחתיה או מי מנושי אשר מכרתי אתכם לו הן בעונתיכם נמכרתם ובפשעיכם שלחה אמכם:
Segment 2
מדוע באתי ואין איש קראתי ואין עונה הקצור קצרה ידי מפדות ואם אין בי כח להציל הן בגערתי אחריב ים אשים נהרות מדבר תבאש דגתם מאין מים ותמת בצמא:
Segment 3
אלביש שמים קדרות ושק אשים כסותם: (פ)
Segment 4
אדני יהוה נתן לי לשון למודים לדעת לעות את יעף דבר יעיר בבקר בבקר יעיר לי אזן לשמע כלמודים:
Segment 5
אדני יהוה פתח לי אזן ואנכי לא מריתי אחור לא נסוגתי:
Segment 6
גוי נתתי למכים ולחיי למרטים פני לא הסתרתי מכלמות ורק:
Segment 7
ואדני יהוה יעזר לי על כן לא נכלמתי על כן שמתי פני כחלמיש ואדע כי לא אבוש:
Segment 8
קרוב מצדיקי מי יריב אתי נעמדה יחד מי בעל משפטי יגש אלי:
Segment 9
הן אדני יהוה יעזר לי מי הוא ירשיעני הן כלם כבגד יבלו עש יאכלם: (ס)
Segment 10
מי בכם ירא יהוה שמע בקול עבדו אשר הלך חשכים ואין נגה לו יבטח בשם יהוה וישען באלהיו: (ס)
Segment 11
הן כלכם קדחי אש מאזרי זיקות לכו באור אשכם ובזיקות בערתם מידי היתה זאת לכם למעצבה תשכבון: (ס)