Isaiah Chapter 66
ישעיהו פרק סו
Source: https://ajew.org/reader/tanach-yeshayahu/1/66

Segment 1
HE:
כה אמר יהוה השמים כסאי והארץ הדם רגלי אי זה בית אשר תבנו לי ואי זה מקום מנוחתי:

Segment 2
HE:
ואת כל אלה ידי עשתה ויהיו כל אלה נאם יהוה ואל זה אביט אל עני ונכה רוח וחרד על דברי:

Segment 3
HE:
שוחט השור מכה איש זובח השה ערף כלב מעלה מנחה דם חזיר מזכיר לבנה מברך און גם המה בחרו בדרכיהם ובשקוציהם נפשם חפצה:

Segment 4
HE:
גם אני אבחר בתעלליהם ומגורתם אביא להם יען קראתי ואין עונה דברתי ולא שמעו ויעשו הרע בעיני ובאשר לא חפצתי בחרו: (ס)

Segment 5
HE:
שמעו דבר יהוה החרדים אל דברו אמרו אחיכם שנאיכם מנדיכם למען שמי יכבד יהוה ונראה בשמחתכם והם יבשו:

Segment 6
HE:
קול שאון מעיר קול מהיכל קול יהוה משלם גמול לאיביו:

Segment 7
HE:
בטרם תחיל ילדה בטרם יבוא חבל לה והמליטה זכר:

Segment 8
HE:
מי שמע כזאת מי ראה כאלה היוחל ארץ ביום אחד אם יולד גוי פעם אחת כי חלה גם ילדה ציון את בניה:

Segment 9
HE:
האני אשביר ולא אוליד יאמר יהוה אם אני המוליד ועצרתי אמר אלהיך: (ס)

Segment 10
HE:
שמחו את ירושלם וגילו בה כל אהביה שישו אתה משוש כל המתאבלים עליה:

Segment 11
HE:
למען תינקו ושבעתם משד תנחמיה למען תמצו והתענגתם מזיז כבודה: (ס)

Segment 12
HE:
כי כה אמר יהוה הנני נטה אליה כנהר שלום וכנחל שוטף כבוד גוים וינקתם על צד תנשאו ועל ברכים תשעשעו:

Segment 13
HE:
כאיש אשר אמו תנחמנו כן אנכי אנחמכם ובירושלם תנחמו:

Segment 14
HE:
וראיתם ושש לבכם ועצמותיכם כדשא תפרחנה ונודעה יד יהוה את עבדיו וזעם את איביו: (ס)

Segment 15
HE:
כי הנה יהוה באש יבוא וכסופה מרכבתיו להשיב בחמה אפו וגערתו בלהבי אש:

Segment 16
HE:
כי באש יהוה נשפט ובחרבו את כל בשר ורבו חללי יהוה:

Segment 17
HE:
המתקדשים והמטהרים אל הגנות אחר (אחד) אחת בתוך אכלי בשר החזיר והשקץ והעכבר יחדו יספו נאם יהוה:

Segment 18
HE:
ואנכי מעשיהם ומחשבתיהם באה לקבץ את כל הגוים והלשנות ובאו וראו את כבודי:

Segment 19
HE:
ושמתי בהם אות ושלחתי מהם פליטים אל הגוים תרשיש פול ולוד משכי קשת תבל ויון האיים הרחקים אשר לא שמעו את שמעי ולא ראו את כבודי והגידו את כבודי בגוים:

Segment 20
HE:
והביאו את כל אחיכם מכל הגוים מנחה ליהוה בסוסים וברכב ובצבים ובפרדים ובכרכרות על הר קדשי ירושלם אמר יהוה כאשר יביאו בני ישראל את המנחה בכלי טהור בית יהוה:

Segment 21
HE:
וגם מהם אקח לכהנים ללוים אמר יהוה:

Segment 22
HE:
כי כאשר השמים החדשים והארץ החדשה אשר אני עשה עמדים לפני נאם יהוה כן יעמד זרעכם ושמכם:

Segment 23
HE:
והיה מדי חדש בחדשו ומדי שבת בשבתו יבוא כל בשר להשתחות לפני אמר יהוה:

Segment 24
HE:
ויצאו וראו בפגרי האנשים הפשעים בי כי תולעתם לא תמות ואשם לא תכבה והיו דראון לכל בשר: (פפפ)