Jeremiah Chapter 19
ירמיהו פרק יט
Source: https://ajew.org/reader/tanach-yirmiyahu/1/19

Segment 1
HE:
כה אמר יהוה הלוך וקנית בקבק יוצר חרש ומזקני העם ומזקני הכהנים:

Segment 2
HE:
ויצאת אל גיא בן הנם אשר פתח שער (החרסות) החרסית וקראת שם את הדברים אשר אדבר אליך:

Segment 3
HE:
ואמרת שמעו דבר יהוה מלכי יהודה וישבי ירושלם כה אמר יהוה צבאות אלהי ישראל הנני מביא רעה על המקום הזה אשר כל שמעה תצלנה אזניו:

Segment 4
HE:
יען אשר עזבני וינכרו את המקום הזה ויקטרו בו לאלהים אחרים אשר לא ידעום המה ואבותיהם ומלכי יהודה ומלאו את המקום הזה דם נקים:

Segment 5
HE:
ובנו את במות הבעל לשרף את בניהם באש עלות לבעל אשר לא צויתי ולא דברתי ולא עלתה על לבי: (פ)

Segment 6
HE:
לכן הנה ימים באים נאם יהוה ולא יקרא למקום הזה עוד התפת וגיא בן הנם כי אם גיא ההרגה:

Segment 7
HE:
ובקתי את עצת יהודה וירושלם במקום הזה והפלתים בחרב לפני איביהם וביד מבקשי נפשם ונתתי את נבלתם למאכל לעוף השמים ולבהמת הארץ:

Segment 8
HE:
ושמתי את העיר הזאת לשמה ולשרקה כל עבר עליה ישם וישרק על כל מכתה:

Segment 9
HE:
והאכלתים את בשר בניהם ואת בשר בנתיהם ואיש בשר רעהו יאכלו במצור ובמצוק אשר יציקו להם איביהם ומבקשי נפשם:

Segment 10
HE:
ושברת הבקבק לעיני האנשים ההלכים אותך:

Segment 11
HE:
ואמרת אליהם כה אמר יהוה צבאות ככה אשבר את העם הזה ואת העיר הזאת כאשר ישבר את כלי היוצר אשר לא יוכל להרפה עוד ובתפת יקברו מאין מקום לקבור:

Segment 12
HE:
כן אעשה למקום הזה נאם יהוה וליושביו ולתת את העיר הזאת כתפת:

Segment 13
HE:
והיו בתי ירושלם ובתי מלכי יהודה כמקום התפת הטמאים לכל הבתים אשר קטרו על גגתיהם לכל צבא השמים והסך נסכים לאלהים אחרים: (פ)

Segment 14
HE:
ויבא ירמיהו מהתפת אשר שלחו יהוה שם להנבא ויעמד בחצר בית יהוה ויאמר אל כל העם: (ס)

Segment 15
HE:
כה אמר יהוה צבאות אלהי ישראל הנני (מבי) מביא אל העיר הזאת ועל כל עריה את כל הרעה אשר דברתי עליה כי הקשו את ערפם לבלתי שמוע את דברי: