Jeremiah Chapter 20
ירמיהו פרק כ
Source: https://ajew.org/reader/tanach-yirmiyahu/1/20

Segment 1
HE:
וישמע פשחור בן אמר הכהן והוא פקיד נגיד בבית יהוה את ירמיהו נבא את הדברים האלה:

Segment 2
HE:
ויכה פשחור את ירמיהו הנביא ויתן אתו על המהפכת אשר בשער בנימן העליון אשר בבית יהוה:

Segment 3
HE:
ויהי ממחרת ויצא פשחור את ירמיהו מן המהפכת ויאמר אליו ירמיהו לא פשחור קרא יהוה שמך כי אם מגור מסביב: (ס)

Segment 4
HE:
כי כה אמר יהוה הנני נתנך למגור לך ולכל אהביך ונפלו בחרב איביהם ועיניך ראות ואת כל יהודה אתן ביד מלך בבל והגלם בבלה והכם בחרב:

Segment 5
HE:
ונתתי את כל חסן העיר הזאת ואת כל יגיעה ואת כל יקרה ואת כל אוצרות מלכי יהודה אתן ביד איביהם ובזזום ולקחום והביאום בבלה:

Segment 6
HE:
ואתה פשחור וכל ישבי ביתך תלכו בשבי ובבל תבוא ושם תמות ושם תקבר אתה וכל אהביך אשר נבאת להם בשקר: (פ)

Segment 7
HE:
פתיתני יהוה ואפת חזקתני ותוכל הייתי לשחוק כל היום כלה לעג לי:

Segment 8
HE:
כי מדי אדבר אזעק חמס ושד אקרא כי היה דבר יהוה לי לחרפה ולקלס כל היום:

Segment 9
HE:
ואמרתי לא אזכרנו ולא אדבר עוד בשמו והיה בלבי כאש בערת עצר בעצמתי ונלאיתי כלכל ולא אוכל:

Segment 10
HE:
כי שמעתי דבת רבים מגור מסביב הגידו ונגידנו כל אנוש שלומי שמרי צלעי אולי יפתה ונוכלה לו ונקחה נקמתנו ממנו:

Segment 11
HE:
ויהוה אותי כגבור עריץ על כן רדפי יכשלו ולא יכלו בשו מאד כי לא השכילו כלמת עולם לא תשכח:

Segment 12
HE:
ויהוה צבאות בחן צדיק ראה כליות ולב אראה נקמתך מהם כי אליך גליתי את ריבי: (ס)

Segment 13
HE:
שירו ליהוה הללו את יהוה כי הציל את נפש אביון מיד מרעים: (ס)

Segment 14
HE:
ארור היום אשר ילדתי בו יום אשר ילדתני אמי אל יהי ברוך:

Segment 15
HE:
ארור האיש אשר בשר את אבי לאמר ילד לך בן זכר שמח שמחהו:

Segment 16
HE:
והיה האיש ההוא כערים אשר הפך יהוה ולא נחם ושמע זעקה בבקר ותרועה בעת צהרים:

Segment 17
HE:
אשר לא מותתני מרחם ותהי לי אמי קברי ורחמה הרת עולם:

Segment 18
HE:
למה זה מרחם יצאתי לראות עמל ויגון ויכלו בבשת ימי: (פ)