Jeremiah Chapter 23
ירמיהו פרק כג
Source: https://ajew.org/reader/tanach-yirmiyahu/1/23

Segment 1
HE:
הוי רעים מאבדים ומפצים את צאן מרעיתי נאם יהוה: (ס)

Segment 2
HE:
לכן כה אמר יהוה אלהי ישראל על הרעים הרעים את עמי אתם הפצתם את צאני ותדחום ולא פקדתם אתם הנני פקד עליכם את רע מעלליכם נאם יהוה:

Segment 3
HE:
ואני אקבץ את שארית צאני מכל הארצות אשר הדחתי אתם שם והשבתי אתהן על נוהן ופרו ורבו:

Segment 4
HE:
והקמתי עליהם רעים ורעום ולא ייראו עוד ולא יחתו ולא יפקדו נאם יהוה: (ס)

Segment 5
HE:
הנה ימים באים נאם יהוה והקמתי לדוד צמח צדיק ומלך מלך והשכיל ועשה משפט וצדקה בארץ:

Segment 6
HE:
בימיו תושע יהודה וישראל ישכן לבטח וזה שמו אשר יקראו יהוה צדקנו: (פ)

Segment 7
HE:
לכן הנה ימים באים נאם יהוה ולא יאמרו עוד חי יהוה אשר העלה את בני ישראל מארץ מצרים:

Segment 8
HE:
כי אם חי יהוה אשר העלה ואשר הביא את זרע בית ישראל מארץ צפונה ומכל הארצות אשר הדחתים שם וישבו על אדמתם: (פ)

Segment 9
HE:
לנבאים נשבר לבי בקרבי רחפו כל עצמותי הייתי כאיש שכור וכגבר עברו יין מפני יהוה ומפני דברי קדשו:

Segment 10
HE:
כי מנאפים מלאה הארץ כי מפני אלה אבלה הארץ יבשו נאות מדבר ותהי מרוצתם רעה וגבורתם לא כן:

Segment 11
HE:
כי גם נביא גם כהן חנפו גם בביתי מצאתי רעתם נאם יהוה:

Segment 12
HE:
לכן יהיה דרכם להם כחלקלקות באפלה ידחו ונפלו בה כי אביא עליהם רעה שנת פקדתם נאם יהוה:

Segment 13
HE:
ובנביאי שמרון ראיתי תפלה הנבאו בבעל ויתעו את עמי את ישראל:

Segment 14
HE:
ובנבאי ירושלם ראיתי שערורה נאוף והלך בשקר וחזקו ידי מרעים לבלתי שבו איש מרעתו היו לי כלם כסדם וישביה כעמרה: (פ)

Segment 15
HE:
לכן כה אמר יהוה צבאות על הנבאים הנני מאכיל אותם לענה והשקתים מי ראש כי מאת נביאי ירושלם יצאה חנפה לכל הארץ: (פ)

Segment 16
HE:
כה אמר יהוה צבאות אל תשמעו על דברי הנבאים הנבאים לכם מהבלים המה אתכם חזון לבם ידברו לא מפי יהוה:

Segment 17
HE:
אמרים אמור למנאצי דבר יהוה שלום יהיה לכם וכל הלך בשררות לבו אמרו לא תבוא עליכם רעה:

Segment 18
HE:
כי מי עמד בסוד יהוה וירא וישמע את דברו מי הקשיב (דברי) דברו וישמע: (ס)

Segment 19
HE:
הנה סערת יהוה חמה יצאה וסער מתחולל על ראש רשעים יחול:

Segment 20
HE:
לא ישוב אף יהוה עד עשתו ועד הקימו מזמות לבו באחרית הימים תתבוננו בה בינה:

Segment 21
HE:
לא שלחתי את הנבאים והם רצו לא דברתי אליהם והם נבאו:

Segment 22
HE:
ואם עמדו בסודי וישמעו דברי את עמי וישבום מדרכם הרע ומרע מעלליהם: (ס)

Segment 23
HE:
האלהי מקרב אני נאם יהוה ולא אלהי מרחק:

Segment 24
HE:
אם יסתר איש במסתרים ואני לא אראנו נאם יהוה הלוא את השמים ואת הארץ אני מלא נאם יהוה:

Segment 25
HE:
שמעתי את אשר אמרו הנבאים הנבאים בשמי שקר לאמר חלמתי חלמתי:

Segment 26
HE:
עד מתי היש בלב הנבאים נבאי השקר ונביאי תרמת לבם:

Segment 27
HE:
החשבים להשכיח את עמי שמי בחלומתם אשר יספרו איש לרעהו כאשר שכחו אבותם את שמי בבעל:

Segment 28
HE:
הנביא אשר אתו חלום יספר חלום ואשר דברי אתו ידבר דברי אמת מה לתבן את הבר נאם יהוה:

Segment 29
HE:
הלוא כה דברי כאש נאם יהוה וכפטיש יפצץ סלע: (ס)

Segment 30
HE:
לכן הנני על הנבאים נאם יהוה מגנבי דברי איש מאת רעהו:

Segment 31
HE:
הנני על הנביאם נאם יהוה הלקחים לשונם וינאמו נאם:

Segment 32
HE:
הנני על נבאי חלמות שקר נאם יהוה ויספרום ויתעו את עמי בשקריהם ובפחזותם ואנכי לא שלחתים ולא צויתים והועיל לא יועילו לעם הזה נאם יהוה:

Segment 33
HE:
וכי ישאלך העם הזה או הנביא או כהן לאמר מה משא יהוה ואמרת אליהם את מה משא ונטשתי אתכם נאם יהוה:

Segment 34
HE:
והנביא והכהן והעם אשר יאמר משא יהוה ופקדתי על האיש ההוא ועל ביתו:

Segment 35
HE:
כה תאמרו איש על רעהו ואיש אל אחיו מה ענה יהוה ומה דבר יהוה:

Segment 36
HE:
ומשא יהוה לא תזכרו עוד כי המשא יהיה לאיש דברו והפכתם את דברי אלהים חיים יהוה צבאות אלהינו:

Segment 37
HE:
כה תאמר אל הנביא מה ענך יהוה ומה דבר יהוה:

Segment 38
HE:
ואם משא יהוה תאמרו לכן כה אמר יהוה יען אמרכם את הדבר הזה משא יהוה ואשלח אליכם לאמר לא תאמרו משא יהוה:

Segment 39
HE:
לכן הנני ונשיתי אתכם נשא ונטשתי אתכם ואת העיר אשר נתתי לכם ולאבותיכם מעל פני:

Segment 40
HE:
ונתתי עליכם חרפת עולם וכלמות עולם אשר לא תשכח: (פ)